ថ្ងៃមួយ ពេលដែលខ្ញុំកំពុងរង់ចាំឡើងយន្តហោះ មានមនុស្សដែលខ្ញុំមិនបានស្គាល់ម្នាក់ បានឮខ្ញុំនិយាយថា ខ្ញុំជាអ្នកបម្រើព្រះតាមស្ថាប័ន ហើយគាត់ក៏បានរៀបរាប់ប្រាប់ខ្ញុំ អំពីជីវិត របស់គាត់មុនពេលស្គាល់ព្រះគ្រីស្ទ ។ គាត់បានប្រាប់ថា “ជីវិតរបស់ខ្ញុំ គឺមានជាប់ដោយអំពើបាប និងភាពអាត្មានិយម តែក្រោយមកខ្ញុំក៏បានស្គាល់ព្រះយេស៊ូវ”។
ខ្ញុំក៏បានស្តាប់គាត់និយាយ ដោយចាប់អារម្មណ៍ ចំពោះការរៀបរាប់អំពីការផ្លាស់ប្រែជាច្រើនចំណុច ក្នុងជីវិតគាត់ និង ការល្អដែលគាត់បានធ្វើ ។ តែ ដោយសារការរៀបរាប់ទាំងប៉ុន្មានរបស់គាត់ បានបង្ហាញអំពីការជាប់រវល់របស់គាត់ នោះខ្ញុំក៏អាចដឹងថា គាត់គ្មានពេលប្រកបជាមួយព្រះទេ ។ ខ្ញុំមិនភ្ញាក់ផ្អើលទេ ពេលដែលគាត់និយាយទៀតថា “លោក ខ្ញុំបានគិតថា ខ្ញុំនឹងមានអារម្មណ៍ថាខ្លួនឯងនឹងមានភាពល្អប្រសើរជាងមុខ នៅពេលឥឡូវនេះ”។
ខ្ញុំជឿថា នាងម៉ាថា ដែលជាតួអង្គក្នុងព្រះគម្ពីរសញ្ញាថ្មី អាចយល់អំពីការសង្កេតរបស់បុរសម្នាក់នេះ ។ ពេលដែលព្រះយេស៊ូវយាងមកផ្ទះនាងម៉ាថា ក្នុងនាមជាភ្ញៀវ នាងបានជាប់រវល់ធ្វើកិច្ចការ ដែលនាងបានរាប់ជាសំខាន់ ។ តែ ការជាប់រវល់នេះ គឺមានន័យថា នាងមិនអាចផ្តោតអារម្មណ៍មកលើព្រះយេស៊ូវឡើយ ។ ពេលដែលនាងម៉ារាមិនបានជួយធ្វើការ នាងម៉ាថាក៏បានសូមឲ្យព្រះយេស៊ូវស្តីបន្ទោស នាង ។ ក្នុងចំណោមយើង មានមនុស្សជាច្រើនបានធ្វើនូវកំហុសដូចនេះដែរ គឺនៅពេលដែលយើងមានការជាប់រវល់ធ្វើការល្អពេក យើងមិនបានចំណាយពេលស្គាល់ព្រះយេស៊ូវ ឲ្យបានកាន់តែច្បាស់ទេ ។
ចំពោះមិត្តរួមដំណើរតាមយន្តហោះម្នាក់នោះ ខ្ញុំក៏បានផ្តល់យោបលឲ្យគាត់ ដោយផ្អែកទៅលើព្រះបន្ទូលដែលព្រះយេស៊ូវទ្រង់បានមានចំពោះនាងម៉ាថា ក្នុងព្រះគម្ពីរលូកា ១០:៤១-៤២ ។ ខ្ញុំបានប្រាប់គាត់ថា “សូមលោកបង្អង់កិច្ចការដែលលោករវល់ធ្វើនោះ ហើយសូមលះបង់ពេល ដើម្បីរៀនស្គាល់ព្រះវិញ ។ សូមអនុញ្ញាតឲ្យព្រះបើកសម្តែងព្រះអង្គទ្រង់ ដល់លោក”។ បើសិនជាយើងជាប់វវល់ខ្លាំងពេក ហើយមិនអាចចំណាយពេលជាមួយព្រះបាន ការនេះគឺគ្រាន់តែមានន័យថា យើងមានការរវល់ខ្លាំងពេកហើយ ។ – Randy Kigore
