លោកចេសិន បូញ(Jason Bohn) ជានិស្សិតម្នាក់ ដែលបានវាយកូនហ្គុល ចូលរុន្ធ ដោយវាយពីចម្ងាយ តែមួយដងប៉ុណ្ណោះ ហើយគាត់ក៏ឈ្នះបានប្រាក់ជាច្រើន ។ មនុស្សជាច្រើនបានចាយវាយខ្ជះខ្ជាយប្រាក់ ដែលខ្លួនរកបាន តែលោកបូញមិនមានគម្រោងដូចនេះទេ ។ គាត់ចង់ក្លាយជាកីឡាករវាយកូនហ្គុលអាជីព ដូចនេះ គាត់បានចំណាយប្រាក់នោះ ដើម្បីផ្គត់ផ្គង់ជីវភាពប្រចាំថ្ងៃ និងសម្រាប់ការហ្វឹកហាត់ ដើម្បីឲ្យជំនាញវាយកូនហ្គុលរបស់ខ្លួន កាន់តែមានភាពល្អប្រសើរថែមទៀត ។ ប្រាក់កាសទាំងនោះ បានក្លាយជាទុន សម្រាប់អនាគតរបស់គាត់ គឺជាទុនដែលនាំមកនូវផលចំណេញជាច្រើន នៅពេលគាត់បានឈ្នះការប្រកួតដ៏ធំមួយ។ គាត់បានធ្វើការសម្រេចចិត្តដ៏ឆ្លាតវ័យ ដោយបានដាក់ទុនសម្រាប់អនាគតរបស់ខ្លួន ជាជាងចាយវាយប្រាក់នោះឲ្យអស់។
យ៉ាងណាមិញ ព្រះយេស៊ូវទ្រង់បានត្រាស់ហៅយើង ឲ្យធ្វើការសម្រេចចិត្តដូចនេះឯង ។ ព្រះទ្រង់បានផ្ទុកផ្តាក់នឹងយើង នូវធនធាន ដូចជា ពេលវេលា សមត្ថភាព និងឱកាសជាដើម ហើយយើងត្រូវសម្រេចចិត្តប្រើប្រាស់ធនធានទាំងនោះ ឲ្យបានត្រឹមត្រូវ ។ យើងចាំបាច់ត្រូវឆក់ឱកាសប្រើប្រាស់ធនធានទាំងនោះ ជាទុន សម្រាប់ពេលអនាគត ដ៏វែងឆ្ងាយខាងមុខ ។ ព្រះយេស៊ូវបានមានបន្ទូលអំពីការនេះ ក្នុងព្រះគម្ពីរ ម៉ាថាយ ៦:២០ ថា “ត្រូវប្រមូលទ្រព្យសម្បត្តិ ទុកសំរាប់ខ្លួន នៅឯស្ថានសួគ៌វិញ”។ ទ្រង់បានធានាថា គ្មានអ្វីអាចបំផ្លាញ ឬដកយកទ្រព្យសម្បត្តិទាំងនោះចេញពីយើងបានឡើយ។
សូមពិចារណាអំពីធនធានរបស់អ្នក ដែលមានដូចជា : អំណោយទាន ពេលវេលា និងចំណេះដឹង ដែលសុទ្ធតែជាធនធានបណ្តោះអាសន្ន ហើយមានកំណត់ ។ តែបើអ្នកប្រើធនធានបណ្តោះអាសន្ន ទាំងនោះ ដោយសម្លឹងឆ្ពោះទៅរកពេលអនាគតដ៏អស់កល្បជានិច្ច នោះនឹងអាចនាំឲ្យមានប្រយោជន៍ដ៏នៅអស់កល្បជានិច្ច ។ តើអ្នកកំពុងតែផ្តោតទៅលើអ្វី? តើផ្តោតទៅលើពេលបច្ចុប្បន្ន ឬពេលអនាគត? ចូរប្រើធនធានទាំងនោះ ជាទុនសម្រាប់ពេលអនាគតចុះ ព្រោះវាមិនគ្រាន់តែផ្តល់នូវប្រយោជន៍អស់កល្បជានិច្ចប៉ុណ្ណោះទេ តែថែមទាំងផ្លាស់ប្តូរការគិតរបស់អ្នក ជារៀងរាល់ថ្ងៃផងដែរ ។ – Bill Crowder
