គឺទ្រង់បានលះបង់ព្រះអង្គទ្រង់ មកយករូបភាពជាបាវបំរើវិញ ព្រមទាំងប្រសូតមកមានរូបជាមនុស្សផង។ ភីលីព ២:៧
សូមស្រមៃថា ព្រះមួយអង្គដែលធ្វើឲ្យដើមឈើធំៗ កើតចេញពីគ្រាប់ពូជតូចល្អិត ហើយបង្កើតផ្កាយទំាងពួង បានបន្ទាបព្រះកាយ ចាប់កំណើតក្នុងផ្ទៃស្រ្តីព្រហ្មចារីម្នាក់ ហើយប្រសូតជាទារកតូច។ ព្រះយេស៊ូវមានលក្ខណៈជាព្រះសុទ្ធសាធ បានលះបង់ព្រះអង្គទ្រង់ យករូបភាពជាបាវបម្រើ (ភីលីព ២:៦-៧)។ នេះជារឿងដែលគួរឲ្យភ្ញាក់ផ្អើលណាស់។
សូមយើងនឹកចាំ អំពីទិដ្ឋភាពនៃការប្រសូតរបស់ព្រះអង្គ ក្នុងក្រោលសត្វ នៅភូមិជនបទមួយ មានពួកអ្នកគង្វាល នៅទីវាល ហើយទេវតាបញ្ចេញពន្លឺភ្លឺចិញ្ចាច នៅលើមេឃ។ ព្រះអង្គបានចម្រើនវ័យធំឡើង ដោយប្រាជ្ញា ដែលធ្វើឲ្យពួកអាចារ្យមានការភ្ញាក់ផ្អើល ដោយការឆ្លើយតប ចំពោះសំណួរពិបាកៗ។ ពេលព្រះអង្គពេញវ័យ នៅទន្លេយ័រដាន់ ព្រះវរបិតាបានមានបន្ទូលថា “នោះជាកូនស្ងួនភ្ងារបស់អញ ជាទីពេញចិត្តអញណាស់”។ ហើយនៅវាលរហោស្ថាន ព្រះអង្គក៏បានតយុទ្ធ ដោយភាពអត់ឃ្លាន និងការអធិស្ឋាន។
សូមយើងមើលទិដ្ឋភាពបន្ទាប់ ពេលដែលទ្រង់ចាប់ផ្តើមព្រះរាជបេសកកម្ម ដោយប្រោសជំងឺ ពាល់អ្នកកើតឃ្លង់ឲ្យជា អត់ទោសបាប ឲ្យមនុស្សមានបាប។ ព្រះអង្គក៏បានលត់ជង្គង់អធិស្ឋាន ក្នុងសួនច្បារ ដោយព្រះទ័យឈឺចាប់ ហើយគេក៏បានមកចាប់ព្រះកាយព្រះអង្គ ហើយមិត្តសំឡាញ់ទ្រង់រត់ចោលព្រះអង្គអស់។ គេក៏បានស្តោះទឹកមាត់ដាក់ព្រះអង្គ ហើយដំព្រះហស្ត និងព្រះបាទទ្រង់ជាប់នឹងឈើឆ្កាង ដោយព្រះអង្គបានទទួលបន្ទុកនៃបាបរបស់លោកិយទាំងមូលនៅលើស្មាព្រះអង្គ។ ពេលដែលថ្មមាត់ផ្នូររមៀលចេញ គេឃើញផ្នូរព្រះអង្គនៅទទេ ព្រោះព្រះអង្គមានព្រះជន្មរស់ឡើងវិញហើយ!
ព្រះវរបិតាបានលើព្រះអង្គឡើងយ៉ាងខ្ពស់(ខ.៩)។ កាលណាឮព្រះនាមព្រះយេស៊ូវ នោះឲ្យគ្រប់ទាំងជង្គង់នៅស្ថានសួគ៌ នៅផែនដី ហើយនៅក្រោមផែនដីត្រូវលុតចុះ (ខ.១០-១១)។
ព្រះអាទិករដែលបានបង្កើតហ្វូងផ្កាយ និងអ្វីៗគ្រប់យ៉ាង បានយកកំណើតជាបុត្រតូច ក្នុងផ្ទៃម្តាយ។ ព្រះអង្គជាបុត្រតូច ដែលបានចាប់កំណើត នៅថ្ងៃណូអែលដំបូងបំផុត។—Sheridan Voysey
តើជីវិត និងប្រវត្តិសាស្រ្តមានលក្ខណៈដូចម្តេច បើព្រះយេស៊ូវមិនបានប្រសូតជាមនុស្ស? តើអ្នកមានការអធិស្ឋាន ឬបទចម្រៀងអ្វីថ្វាយដល់ព្រះ ដើម្បីអរព្រះគុណព្រះអង្គ?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការបន្ទាបព្រះកាយ ដើម្បីឈោងមករក និងអត់ទោសបាបឲ្យយើងខ្ញុំ។
គម្រោងអានព្រះគម្ពីររយៈពេល១ឆ្នាំ : សេផានា ១-៣ និង វិវរណៈ ១៦
