ឯទិសខាងកើតនៅឆ្ងាយពីទិសខាងលិចយ៉ាងណា ទ្រង់បានដកយកអស់ទាំងការល្មើសនៃយើង ឲ្យឃ្លាតឆ្ងាយពីយើងយ៉ាងនោះដែរ។ ទំនុកដំកើង ១០៣:១២
ខ្ញុំមានប្រអប់បួនជ្រុងទ្រវែងពណ៌ខៀវតូចមួយ ដែលមានលក្ខណៈអស្ចារ្យណាស់។ កាលពីក្មេង ខ្ញុំអាចលេងវាអស់ជាច្រើនម៉ោង។ ពេលដែលខ្ញុំមួលគន្លឹះមួយនៅលើប្រអប់នោះ ខ្ញុំអាចបង្កើតខ្សែបន្ទាត់ផ្តេកមួយនៅលើអេក្រង់របស់វា។ ពេលខ្ញុំមួលគន្លឹះមួយទៀត ខ្សែបន្ទាត់ឈរក៏បានលេចរូបរាងឡើង។ ពេលខ្ញុំមួលគន្លឹះទាំងពីរក្នុងពេលតែមួយ ខ្ញុំអាចបង្កើតខ្សែបន្ទាត់ទ្រេត រង្វង់ និងរូបរាងប្លែកៗជាច្រើនទៀត។ ប៉ុន្តែ ភាពអស្ចារ្យពិតប្រាកដរបស់វាកើតឡើង នៅពេលដែលខ្ញុំក្រឡាប់ក្បាលវាចុះក្រោម ហើយអង្រួនវាបន្តិច រួចត្រឡប់ក្បាលវាឡើងទៅលើវិញ។ អេក្រង់វាក៏ប្រែជាទទេដូចដើមវិញ ធ្វើឲ្យខ្ញុំមានឱកាសធ្វើការរចនាថ្មីមួយទៀត។
ការអត់ទោសរបស់ព្រះ មានលក្ខណៈដូចនេះផងដែរ។ ព្រះអង្គលាងជម្រះអំពើបាបយើង ឲ្យជ្រះស្អាតដូចផ្ទាំងដែលគ្មានស្នាមប្រឡាក់។ ទោះយើងនៅចាំកំហុសដែលយើងបានប្រព្រឹត្ត ព្រះអង្គនៅតែជ្រើសរើសការអត់ទោស និងបំភ្លេចអំពើបាបយើង។ ព្រះអង្គលាងសម្អាតយើងឲ្យស្អាត ហើយមិនប្រកាន់ទោសបាបរបស់យើងទៀតទេ។ ព្រះអង្គមិនប្រព្រឹត្តចំពោះយើង ឲ្យធួននឹងអំពើបាបរបស់យើងនោះទេ(ទំនុកដំកើង ១០៣:១០) តែបានប្រទានព្រះគុណ តាមរយៈការអត់ទោសបាប។ យើងមានជីវិតថ្មីកំពុងរង់ចាំយើង ពេលយើងស្វែងរកការអត់ទោសបាបរបស់ព្រះ។ ព្រះអង្គអាចលុបទោសកំហុស និងក្តីអាម៉ាស់របស់យើង ដោយសារអំណោយដ៏អស្ចារ្យ ដែលព្រះអង្គបានប្រទានយើង។
អ្នកនិពន្ធបទគម្ពីរទំនុកដំកើង បានរំឭកយើងថា ដែលទិសខាងកើតនៅឆ្ងាយពីទិសខាងលិចយ៉ាងណា នោះទ្រង់បានដកយកអស់ទាំងការល្មើសនៃយើង ឲ្យឃ្លាតឆ្ងាយពីយើងយ៉ាងនោះដែរ(ខ.១២)។ ក្នុងព្រះនេត្ររបស់ព្រះ អំពើបាបរបស់យើងមិននៅជាប់នឹងយើង ដូចស្នាមប្រឡាក់នៅលើក្រដាស ឬរូបគំនូរក្រវេមក្រវាមនោះទេ។ នេះជាមូលហេតុដែលយើងត្រូវមានអំណរ និងអរព្រះគុណព្រះអង្គ សម្រាប់ព្រះគុណ និងសេចក្តីមេត្តាដ៏អស្ចារ្យរបស់ព្រះអង្គ។—Katara Patton
តើអ្នកគិតថា ហេតុអ្វីព្រះទ្រង់សម្រេចព្រះទ័យមិនប្រព្រឹត្តចំពោះអ្នក ឲ្យសមនឹងអំពើបាបរបស់អ្នក? តើអ្នកអាចអរព្រះគុណព្រះអង្គយ៉ាងដូចម្តេចខ្លះ សម្រាប់ការដកអំពើបាបអ្នកចេញពីអ្នក?
ឱព្រះនៃសេចក្តីស្រឡាញ់ ទូលបង្គំសូមអរព្រះគុណសម្រាប់ការអត់ទោសបាបឲ្យទូលបង្គំ។ សូមជួយទូលបង្គំឲ្យនឹកចាំថា ព្រះអង្គមិននឹកចាំអំពើបាបរបស់ទូលបង្គំទៀតទេ។
Read The Forgiveness of God at DiscoverySeries.org/Q0602.
គម្រោងអានព្រះគម្ពីររយៈពេល១ឆ្នាំ : លោកុប្បត្តិ ២៥-២៦ និង ម៉ាថាយ ៨:១-១៧
