ឯអ្នកណាដែលមានគំនិតជាប់តាមទ្រង់ នោះទ្រង់នឹងថែរក្សាអ្នកនោះ ឲ្យមានសេចក្តីសុខពេញខ្នាត ដោយព្រោះគេទុកចិត្តនឹងទ្រង់។ អេសាយ ២៦:៣
មានពេលមួយ ខ្ញុំបានជម្នះភាពតានតឹង នៅកន្លែងធ្វើការ ដែលមានពេញដោយការប៉ះទង្គិចគ្នា។ ការព្រួយបារម្ភបានក្លាយជាទម្លាប់របស់ខ្ញុំទៅហើយ ដូចនេះ ខ្ញុំមានការភ្ញាក់ផ្អើល ពេលដែលបានឃើញខ្លួនឯងមានសន្តិភាពក្នុងចិត្ត។ ជាជាងមានការថប់បារម្ភ ខ្ញុំអាចឆ្លើយតបចំពោះបញ្ហា ដោយចិត្ត និងគំនិតដែលស្ងប់។ ខ្ញុំដឹងថា មានតែព្រះទេ ដែលអាចប្រទានសន្តិភាព ឬសេចក្តីសុខសាន្តនេះបាន។
ផ្ទុយទៅវិញ នៅពេលផ្សេងទៀត ក្នុងជីវិតខ្ញុំ ពេលដែលអ្វីៗមានដំណើរការល្អ ចិត្តរបស់ខ្ញុំបែរជាគ្មានសន្តិភាពទៅវិញ។ ខ្ញុំដឹងថា វាបណ្តាលមកពីខ្ញុំទុកចិត្តលើសមត្ថភាពខ្លួនឯង ជាជាងជឿព្រះ និងការដឹកនាំរបស់ព្រះអង្គ។ ក្រឡេកមកក្រោយវិញ ខ្ញុំក៏បានដឹងថា សន្តិភាពពិតប្រាកដ គឺសន្តិភាពរបស់ព្រះ គឺមិនផ្តេកផ្តួលទៅតាមកាលៈទេសៈរបស់យើងនោះទេ តែដោយសារយើងទុកចិត្តព្រះអង្គ។
សន្តិភាពរបស់ព្រះកើតមានដល់យើង ពេលដែលគំនិតរបស់យើងជាប់តាមព្រះអង្គ(អេសាយ ២៦:៣)។ ក្នុងព្រះគម្ពីរដើមជាភាសាហេព្រើរ ពាក្យ ជាប់តាម គឺមានន័យថា “ពឹងផ្អែកលើ”។ កាលណាយើងពឹងផ្អែកលើព្រះអង្គ យើងនឹងបានពិសោធន៍នូវព្រះវត្តមានដ៏សុខសាន្តរបស់ព្រះអង្គ។ យើងអាចទុកចិត្តព្រះ ដោយនឹកចាំថា ព្រះអង្គទម្លាក់មនុស្សអួត និងមនុស្សអាក្រក់ចុះ ឲ្យរៀបទាប ហើយតម្រង់ផ្លូវឲ្យអ្នកដែលស្រឡាញ់ព្រះអង្គ(ខ.៥-៧)។
ពេលណាខ្ញុំបានពិសោធន៍នឹងសន្តិភាព ក្នុងរដូវកាលដ៏ពិបាក ខ្ញុំរកឃើញថា សន្តិភាពរបស់ព្រះ មិនមែនជាអវត្តមាននៃជម្លោះ ឬភាពជ្រួលច្របល់នោះឡើយ តែជាការទុកចិត្តលើការការពារ និងផ្គត់ផ្គង់របស់ព្រះ សូម្បីតែក្នុងពេលដ៏តានតឹងក៏ដោយ។ ជាសន្តិភាព ឬសេចក្តីសុខសាន្តដែលល្អហួសការយល់ដឹងរបស់មនុស្ស ហើយការពារចិត្ត និងគំនិតរបស់យើង ក្នុងពេលដែលពិបាកបំផុត(ភីលីព ៤:៦-៧)។—Karen Huang
តើធ្វើដូចម្តេចឲ្យអ្នកអាចមានសន្តិភាពក្នុងចិត្ត? តើអ្នកចាំបាច់ត្រូវទុកចិត្តព្រះ និងពឹងផ្អែកលើព្រះអង្គ ក្នុងផ្នែកណាខ្លះ នៃជីវិតអ្នក?
ឱព្រះវរបិតា សូមព្រះអង្គជួយទូលបង្គំឲ្យទុកចិត្តព្រះអង្គ ហើយមានគំនិតដែលជាប់តាមព្រះអង្គ។ សូមអរព្រះគុណ សម្រាប់ការប្រទានសន្តិភាពដ៏ឥតខ្ចោះ ពេលដែលទូលបង្គំទុកចិត្តព្រះអង្គ។
គម្រោងអានព្រះគម្ពីររយៈពេល១ឆ្នាំ : ពួកចៅហ្វាយ ៤-៦ និង លូកា ៤:៣១-៤៤
