កាលណាវាពោលពាក្យភូតភរ នោះដុះចេញអំពីចិត្តវាមក ដ្បិតវាជាអ្នកកំភូត ហើយជាឪពុកនៃសេចក្តីនោះឯង។ យ៉ូហាន ៨:៤៤
វីចទ័រ(Victor) បានញៀននឹងការមើលរូបអាសអាភាសបន្តិចម្តងៗ។ មិត្តភក្តិរបស់គាត់ជាច្រើនបានមើលរូបអាសអាភាស ហើយគាត់ក៏បានធ្លាក់ចូលទៅក្នុងការមើលរូបអាសអាភាសផងដែរ ដោយសារគាត់មានអារម្មណ៍ថា អផ្សុក ក្នុងការរស់នៅ។ ប៉ុន្តែ ឥឡូវនេះ គាត់ដឹងថា គាត់មានកំហុសធ្ងន់ប៉ុណ្ណា ដោយសារការមើលរូបអាសអាភាសនោះ។ គាត់បានធ្វើបាបទាស់នឹងព្រះ ហើយក៏បានធ្វើឲ្យភរិយាគាត់មានទុក្ខលំបាកយ៉ាងខ្លាំង។ គាត់ក៏បានប្តេជ្ញាចិត្តថា គាត់នឹងឈប់មើលរូបអាសអាភាសទៀត។ តែគាត់មានការភ័យខ្លាចថា គាត់យឺតពេលហើយ។ តើគាត់អាចស្រោចស្រង់ទំនាក់ទំនងប្តីប្រពន្ធរបស់គាត់បានទេ? តើគាត់នឹងមានសេរីភាព ហើយបានទទួលការអត់ទោសទាំងស្រុងឬទេ?
អារក្ស ដែលជាខ្មាំងសត្រូវរបស់យើង បានល្បួងយើង ដោយនាំឲ្យយើងគិតថា ការល្បួងនោះមិនមែនជារឿងធំដុំទេ។ វានំាយើងឲ្យគិតថា នរណាក៏ធ្វើរឿងនោះដែរ។ វាមិនអីទេ? ប៉ុន្តែ ពេលណាយើងធ្លាក់ចូលក្នុងឧបាយកលរបស់វាហើយ វាបែរជានិយាយប្រាប់យើងថា យឺតពេលហើយ! ឯងបានជ្រុលខ្លួនហើយ! ឯងគ្មានសង្ឃឹមទេ ឥឡូវនេះ!
ខ្មាំងសត្រូវខាងវិញ្ញាណនិយាយតែពាក្យអ្វី ដែលអាចបំផ្លាញយើង ពេលដែលយើងកំពុងតែស្ថិតក្នុងសង្គ្រាមខាងវិញ្ញាណ។ ព្រះយេស៊ូវមានបន្ទូលថា “វាជាអ្នកសំឡាប់គេតាំងពីដើមមក វាមិនបាននៅជាប់ក្នុងសេចក្តីពិត ព្រោះគ្មានសេចក្តីពិតនៅក្នុងវាទេ កាលណាវាពោលពាក្យភូតភរ នោះដុះចេញអំពីចិត្តវាមក ដ្បិតវាជាអ្នកកំភូត ហើយជាឪពុកនៃសេចក្តីនោះឯង”(យ៉ូហាន ៨:៤៤)។
បើអារក្សជាឪពុកនៃសេចក្តីកុហក នោះយើងមិនត្រូវស្តាប់វាឡើយ។ យើងមិនត្រូវស្តាប់តាមវា ពេលណាវានិយាយថា អំពើបាបយើង មិនមែនជារឿងធំដុំ ឬនិយាយថា យើងគ្មានសង្ឃឹម។ សូមព្រះយេស៊ូវជួយយើង ឲ្យបដិសេធពាក្យសម្ដីរបស់អារក្ស ហើយស្តាប់តាមព្រះអង្គវិញ។ ចិត្តរបស់យើងត្រូវផ្ដោតទៅលើព្រះបន្ទូលរបស់ព្រះអង្គ ដែលបានសន្យាថា “បើអ្នករាល់គ្នានៅជាប់ក្នុងពាក្យខ្ញុំ នោះអ្នករាល់គ្នាជាសិស្សខ្ញុំមែន អ្នករាល់គ្នានឹងស្គាល់សេចក្តីពិត ហើយសេចក្តីពិតនោះនឹងប្រោសឲ្យអ្នករាល់គ្នាបានរួច”(ខ.៣១-៣២)។—Mike Wittmer
តើមានអំពើបាបអ្វី ដែលនាំឲ្យអ្នកមានអារម្មណ៍ថា អស់សង្ឃឹម? តើអ្នកគិតថា ភាពអស់សង្ឃឹមនេះ កើតចេញពីសាតាំង ឬពីព្រះយេស៊ូវ? តើមានព្រះបន្ទូលសន្យាអ្វីខ្លះ ក្នុងព្រះគម្ពីរ ដែលអ្នកអាចប្រើនៅថ្ងៃនេះ?
ឱព្រះយេស៊ូវ ព្រះអង្គបានសុគត និងមានព្រះជន្មរស់ឡើងវិញ ដើម្បីសង្គ្រោះទូលបង្គំ ឲ្យរួចពីចំណងនៃអំពើបាប។ សូមព្រះអង្គជួយទូលបង្គំឲ្យរស់នៅ ក្នុងសេរីភាពនោះ នៅថ្ងៃនេះ!
Read Walking Free: Overcoming What Keeps Us from Jesus at DiscoverySeries.org/Q0222.
គម្រោងអានព្រះគម្ពីររយៈពេល១ឆ្នាំ : ១ពង្សាវតាក្សត្រ ១២-១៣ និង លូកា ២២:១-២០
