តែអរព្រះគុណដល់ព្រះអង្គ ដែលទ្រង់ចេះតែនាំយើងខ្ញុំ ឲ្យមានជ័យជំនះក្នុងព្រះគ្រីស្ទ ហើយក៏ផ្សាយក្លិនពីដំណើរដែលយើងខ្ញុំស្គាល់ព្រះ ឲ្យបានសុសសាយទួទៅគ្រប់កន្លែងផង។ ២កូរិនថូស ២:១៤
បន្ទាប់ពីខ្ញុំបានទទួលជឿព្រះយេស៊ូវហើយ ខ្ញុំបានផ្សាយដំណឹងល្អដល់ម្តាយរបស់ខ្ញុំ។ ខ្ញុំបានរំពឹងថា គាត់នឹងសម្រេចចិត្តទទួលជឿព្រះយេស៊ូវ តែផ្ទុយទៅវិញ គាត់បានឈប់និយាយរកខ្ញុំ អស់១ឆ្នាំ។ គាត់ធ្លាប់ឃើញទីបន្ទាល់អាក្រក់របស់អ្នកដែលបានតាំងខ្លួនជាអ្នកជឿព្រះយេស៊ូវ ដូចនេះ គាត់មិនទុកចិត្តអ្នកជឿព្រះយេស៊ូវឡើយ។ ខ្ញុំក៏បានអធិស្ឋានឲ្យគាត់ ហើយក៏បានព្យាយាមទាក់ទងទៅគាត់រៀងរាល់សប្តាហ៍។ ព្រះវិញ្ញាណបរិសុទ្ធបានកម្សាន្តចិត្តខ្ញុំ ហើយបានបន្តធ្វើការក្នុងចិត្តខ្ញុំ ខណៈពេលដែលម្តាយរបស់ខ្ញុំនៅតែបន្តមានភាពស្ងាត់ស្ងៀម ចំពោះខ្ញុំ។ ទីបំផុត នៅពេលដែលគាត់ព្រមលើកទូរស័ព្ទ ពេលខ្ញុំទូរស័ព្ទទៅរកគាត់ ខ្ញុំក៏បានប្ដេជ្ញាចិត្តថា នឹងស្រឡាញ់គាត់ ហើយចែកចាយអំពីសេចក្តីពិតរបស់ព្រះ ដល់គាត់ ពេលណាខ្ញុំមានឱកាស។ បន្ទាប់ពីយើងបានផ្សះផ្សាគ្នាឡើងវិញបានប៉ុន្មានខែ គាត់និយាយថា ខ្ញុំមានការផ្លាស់ប្តូរ។ ជិត១ឆ្នាំក្រោយមក គាត់ក៏បានទទួលជឿព្រះយេស៊ូវ ជាព្រះអង្គសង្គ្រោះ ហើយជាលទ្ធផល ទំនាក់ទំនងរបស់យើងក៏កាន់តែមានភាពស្និទ្ធស្នាល។
អ្នកជឿព្រះយេស៊ូវ មានឱកាសចូលទៅរកព្រះគ្រីស្ទ ដែលជាអំណោយដ៏អស្ចារ្យបំផុត ដែលព្រះបានប្រទានមកមនុស្សជាតិ។ សាវ័កប៉ុលបានមានប្រសាសន៍ថា យើងត្រូវតែ “ផ្សាយក្លិនពីដំណើរដែលយើងខ្ញុំស្គាល់ព្រះ ឲ្យបានសុសសាយទួទៅគ្រប់កន្លែងផង”(២កូរិនថូស ២:១៤)។ ត្រង់ចំណុចនេះ គាត់និយាយថា អ្នកផ្សាយដំណឹងល្អ គឺជា “ក្លិនដ៏ក្រអូបនៃព្រះគ្រីស្ទ” ទៅដល់អ្នកដែលទទួលជឿ តែជាក្លិននៃសេចក្តីស្លាប់ ដល់អ្នកដែលបដិសេធន៍មិនព្រមទទួលជឿព្រះអង្គ(ខ.១៥-១៦)។
បន្ទាប់ពីយើងបានទទួលជឿព្រះគ្រីស្ទ ជាព្រះអង្គសង្គ្រោះរបស់យើងហើយ យើងមានឯកសិទ្ធិ ក្នុងការប្រើប្រាស់ពេលវេលា ដែលនៅសល់ នៅលើផែនដី ដើម្បីផ្សព្វផ្សាយអំពីសេចក្តីពិតរបស់ព្រះអង្គ ដែលធ្វើឲ្យជីវិតផ្លាស់ប្រែ ដើម្បីបង្ហាញក្តីស្រឡាញ់ដល់អ្នកដទៃ។ សូម្បីតែក្នុងពេលដែលពិបាកបំផុត និងឯកោបំផុត យើងអាចទុកចិត្តថា ព្រះអង្គនឹងប្រទានអ្វីដែលយើងត្រូវការ។ ទោះយើងត្រូវមានការលះបង់ច្រើនប៉ុណ្ណាក៏ដោយ ដំណឹងល្អរបស់ព្រះអង្គ នៅតែសក្ដិសមនឹងឲ្យយើងផ្សាយដល់អ្នកដទៃ។—Xochitl Dixon
តើព្រះទ្រង់បានលើកទឹកចិត្តអ្នកយ៉ាងណាខ្លះ មិនឲ្យបោះបង់ការតស៊ូ បន្ទាប់ពីគេបញ្ចេញប្រតិកម្មអវិជ្ជមាន ពេលអ្នកផ្សាយដំណឹងល្អដល់គេ?
ឱព្រះអម្ចាស់ សូមព្រះអង្គជួយទូលបង្គំ ឲ្យផ្សាយដំណឹងល្អ នៅកន្លែងណាដែលព្រះអង្គបានចាត់ទូលបង្គំទៅ!
គម្រោងអានព្រះគម្ពីររយៈពេល១ឆ្នាំ : ២ពង្សាវតាក្សត្រ ១៣-១៤ និង យ៉ូហាន ២
