អេលីសេសួរនាងថា “តើចង់ឲ្យខ្ញុំធ្វើអ្វីឲ្យអ្នក សូមប្រាប់ខ្ញុំចុះ តើអ្នកមានអ្វីនៅផ្ទះ?” ២ពង្សាវតាក្សត្រ ៤:២
បាត់ឌី(Buddy) ជាក្មេងអាយុ៣ឆ្នាំ បានទៅព្រះវិហារជាមួយម្តាយគាត់រៀងរាល់សប្តាហ៍ ដើម្បីជួយជញ្ជូនគ្រឿងទេស ពីឡានចែកអាហារ។ ពេលដែលបាត់ឌីបានឮម្តាយគាត់និយាយជាមួយជីដូនគាត់ថា ឡានដឹកអាហារនោះបានខូចហើយ គាត់ក៏បានសួរថា “អូហ៍ ទេ។ តើគេបានអីដឹកអាហារ យកទៅចែកអ្នកក្រ?” ម្តាយរបស់គាត់ក៏បានពន្យល់គាត់ថា ពួកជំនុំនឹងរ៉ៃអង្គាសប្រាក់ ទិញឡានថ្មីមួយគ្រឿង។ បាត់ឌីក៏បានញញឹម។ គាត់ថា “ខ្ញុំមានលុយ” រួចគាត់ក៏បានចេញពីបន្ទាប់។ គាត់ត្រឡប់មកវិញ ដោយមានកាន់ផើងជ័រមួយ ដែលមានបិទស្ទីគ័រពណ៌ចម្រុះ មានពេញដោយកាក់ ដែលមានតម្លៃជាសរុបជាង៣៨ដុល្លា។ បាត់ឌីមិនមានលុយច្រើនទេ តែព្រះទ្រង់បានយកដង្វាយគាត់ ទៅបូករួមជាមួយអំណោយអ្នកដទៃទៀត ដើម្បីប្រទានឡានដឹកអាហារថ្មីមួយ ដើម្បីឲ្យពួកជំនុំគាត់នៅតែអាចបន្តបម្រើសហគមន៍របស់ពួកគេ។
ដង្វាយតិចតួច ដែលថ្វាយដោយចិត្តសប្បុរស តែងតែលើសពីគ្រប់គ្រាន់ ពេលដែលយើងថ្វាយក្នុងព្រះហស្តព្រះ។ ក្នុងបទគម្ពីរ ២ពង្សាវតាក្សត្រ ជំពូក៤ ស្រ្តីមេម៉ាយក្រីក្រម្នាក់ បានសុំលោកអេលីសេ ឲ្យជួយផ្គត់ផ្គង់គាត់។ គាត់ក៏បានប្រាប់នាងឲ្យយកអ្វីដែលនាងមានមកបង្ហាញគាត់ ហើយឲ្យទៅខ្ចីភាជនៈពីអ្នកជិតខាង ហើយធ្វើតាមការណែនាំរបស់គាត់(ខ.១-៤)។ ព្រះទ្រង់ក៏បានផ្គត់ផ្គង់គាត់ ដោយការអស្ចារ្យ ដោយប្រើប្រេងដ៏តិចតួចរបស់ស្រ្តីមេម៉ាយ ដើម្បីបំពេញភាជនៈទាំងអស់ ដែលគាត់បានខ្ចីពីអ្នកជិតខាងគាត់(ខ.៥-៦)។ លោកអេលីសេក៏បានប្រាប់គាត់ថា “ចូរយកប្រេងនោះទៅលក់ សងបំណុលគេទៅ ឯចំណែកដែលសល់នៅ នោះចូរទុកចិញ្ចឹមខ្លួន និងកូនចុះ”(ខ.៧)។
ពេលណាយើងផ្តោតទៅលើអ្វីដែលយើងមិនមាន យើងងាយនឹងខកខានមិនបានអនុញ្ញាតឲ្យព្រះទ្រង់ប្រើអ្វីដែលយើងមាន ដោយការអស្ចារ្យ។—Xochitl Dixon
តើព្រះទ្រង់បានធ្វើឲ្យធនធានអ្នកកើនឡើងជាពហុគុណ តាមរបៀបដ៏អស្ចារ្យ នៅពេលណា? តើព្រះទ្រង់បានប្រើដង្វាយអ្នក បូកផ្សំជាមួយដង្វាយអ្នកដទៃ ដើម្បីបំពេញតម្រូវការដែលសំខាន់ជាង ក្នុងសហគមន៍អ្នក នៅពេលណា?
ឱព្រះដែលបានផ្គត់ផ្គង់ ដោយព្រះទ័យស្មោះត្រង់ សូមព្រះអង្គជួយទូលបង្គំឲ្យមានការប្រុងប្រយ័ត្ន និងដឹងគុណ ខណៈពេលដែលទូលបង្គំចាត់ចែង និងចែករំលែកអ្វីៗដែលព្រះអង្គបានប្រទានទូលបង្គំ។
គម្រោងអានព្រះគម្ពីររយៈពេល១ឆ្នាំ : យ៉ូប ៨-១០ និង កិច្ចការ ៨:២៦-៤០
