ចូរបង្ហាត់កូនក្មេង ឲ្យប្រព្រឹត្តតាមផ្លូវដែលគួរប្រព្រឹត្តនោះវានឹងមិនលះបង់ពីផ្លូវនោះដរាបដល់ចាស់។ សុភាសិត ២២:៦
គ្មាននរណាម្នាក់នឹកស្មានថា អ្នកជិះក្តារស្គី អាយុ១៦ឆ្នាំ ជាជនជាតិប្រេស៊ីល ឈ្មោះ ហ្វេលីពេ ហ្កាស្តាវ៉ូ(Felipe Gustavo) នឹងក្លាយជា “អ្នកជិះក្តារស្គីដ៏អស្ចារ្យបំផុតនៅលើពិភពលោក”នោះទេ។ ឪពុករបស់ហ្កាស្តាវ៉ូ ជឿថា កូនប្រុសគាត់ចាំបាច់ត្រូវដេញតាមក្តីសុបិនដែលចង់ធ្វើជាអ្នកជិះក្តារស្គីអាជីព ប៉ុន្តែ ពួកគេមិនមានលុយគ្រប់គ្រាន់ឡើយ។ ដូចនេះ ឪពុកគាត់ក៏បានលក់ឡាន ហើយនាំគាត់ទៅចូលរួមការប្រកួតជិះក្តារស្គី ថាមផា អាម ដ៏ល្បីល្បាញនៅរដ្ឋ ផ្លូរីដា។ កាលនោះ មុនពេលហ្កាស្តាវ៉ូឈ្នះការប្រកួត គ្មាននរណាស្គាល់គាត់ទេ។ ហើយជោគជ័យនៅថ្ងៃនេះ ក៏បានជួយឲ្យគាត់ចូលទៅក្នុងអាជីពដ៏អស្ចារ្យ។
ឪពុករបស់ហ្កាស្តាវ៉ូអាចយល់ចិត្ត និងមើលឃើញក្តីស្រមៃរបស់គាត់។ ហ្កាស្តាវ៉ូក៏បាននិយាយថា “ពេលណាខ្ញុំមានកូន ខ្ញុំចង់មានលក្ខណៈសម្បត្តិល្អដូចប៉ាខ្ញុំ តែ៥ភាគរយប៉ុណ្ណោះ គឺគ្រប់គ្រាន់ណាស់ទៅហើយ”។
កណ្ឌគម្ពីរសុភាសិតបានពិពណ៌នា អំពីឱកាស ដែលឪពុកម្តាយមាន ក្នុងការជួយកូនខ្លួន ឲ្យស្គាល់ព្រះដែលបានបង្កើតចិត្ត កម្លាំង និងបុគ្គលិកលក្ខណៈរបស់ពួកគេ ហើយបន្ទាប់មកចង្អុលបង្ហាញ និងលើកទឹកចិត្តពួកគេ ឲ្យងាកទៅរកផ្លូវ ដែលឆ្លុះបញ្ចាំងឲ្យដឹងថា ព្រះទ្រង់បានបង្កើតពួកគេមកឲ្យរស់នៅ ជាមនុស្សប្រភេទណា។ គឺដូចដែលបទគម្ពីរទំនុកដំកើងបានចែងថា “ចូរបង្ហាត់កូនក្មេង ឲ្យប្រព្រឹត្តតាមផ្លូវដែលគួរប្រព្រឹត្តនោះវានឹងមិនលះបង់ពីផ្លូវនោះដរាបដល់ចាស់”(២២:៦)។
យើងប្រហែលមិនមានធនធានច្រើន ឬមានចំណេះដឹងខ្ពង់ខ្ពស់ទេ។ ទោះជាយ៉ាងណាក៏ដោយ យើងអាចផ្តល់ឲ្យកូនយើង និងក្មេងដទៃទៀត នូវអំណោយដ៏ច្រើនលើសលប់ ដោយប្រាជ្ញារបស់ព្រះ(ខ.១៧-២១) និងសេចក្តីស្រឡាញ់របស់យើង ដែលមានការយកចិត្តទុកដាក់។ យើងអាចជួយពួកគេឲ្យទុកចិត្តព្រះ និងស្គាល់ផ្លូវដែលពួកគេអាចដើរតាមពេញមួយជីវិត(៣:៥-៦)។—Winn Collier
តើអ្នកបានឃើញឪពុកម្តាយណាខ្លះ ដែលយកចិត្តទុកដាក់ ចំពោះចិត្ត ឬកម្លាំងរបស់កូន? តើព្រះទ្រង់បានបើកបង្ហាញការយកព្រះទ័យទុកដាក់ចំពោះអ្នក ដោយរបៀបណាខ្លះ?
ឱព្រះវរបិតា ដែលគង់នៅស្ថានសួគ៌ ខណៈពេលដែលទូលបង្គំ ពិចារណាអំពីឪពុកម្តាយដែលយកចិត្តទុកដាក់ចំពោះកូនខ្លួន ទូលបង្គំដឹងថា ព្រះអង្គជាឪពុកម្តាយដែលត្រឹមត្រូវបំផុត។ ទូលបង្គំសូមអរព្រះគុណព្រះអង្គ ដែលបានទតឃើញ និងដឹកនាំទូលបង្គំ។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ៧៤-៧៦ និង រ៉ូម ៩:១៦-៣៣
