មើល ដែល​បងប្អូន​នៅ​មូល​ជាមួយគ្នា ដោយចិត្ត​ព្រមព្រៀង នោះ​ជាការល្អ ហើយ​សមគួរ​យ៉ាងណា​ទៅ។ ទំនុកដំកើង ១៣៣:១

ជនជាតិយូដា​បាន​បរិភោគ​អាហារ​ជុំគ្នា ដើម្បី​បន្ត​ប្រារព្ធ​ពិធីបុណ្យ​រំលង ដើម្បី​នឹក​ចាំ អំពី​ភាព​អស្ចារ្យ​នៃ​ព្រះរាជកិច្ច​ជួយ​សង្គ្រោះ​របស់​ព្រះ នៅ​គ្រា​សញ្ញាចាស់។ នៅ​ចុងបញ្ចប់​នៃ​ការ​ញាំ​អាហារ​នោះ សមាជិក​ពួក​ជំនុំ​នៃ​សាសន៍​យូដា​បាន​បង្ហាញ​ចេញ​នូវ​ក្តី​អំណរ ដោយ​រាំ​ជា​រង្វង់​មូល​ទាំងអស់គ្នា។ ប៊ែ​រី(Barry) បាន​ឈរ​មើល​ពួក​គេ ដោយ​ទឹកមុខ​ញញឹម​ស្រស់។ គាត់​បាន​បង្ហាញ​អារម្មណ៍​ចូលចិត្ត​ពេល​ដ៏​រីករាយ​ដូចនេះ​ខ្លាំង​ប៉ុណ្ណា ដោយ​រៀបរាប់​ថា “ពេលនេះ ពួក​គេ​ជាគ្រួសារ​របស់ខ្ញុំ។ នេះ​ជា​សហគមន៍​របស់ខ្ញុំ។ ខ្ញុំ​បាន​រក​ឃើញ​កន្លែង ដែល​ខ្ញុំ​ដឹង​ថា ខ្ញុំ​អាច​ស្រឡាញ់ និង​ទទួល​សេចក្តី​ស្រឡាញ់​ពី​គេ … គឺ​ខ្ញុំ​ជាផ្នែក​មួយ​នៃ​គ្រួសារ​នេះ”។

កាលពីក្មេង ប៊ែ​រី​បាន​ទទួលរង​ការធ្វើបាប​ផ្លូវកាយ និង​ផ្លូវចិត្ត ដែល​ធ្វើឲ្យ​គាត់​រស់នៅ​ដោយ​គ្មាន​អំណរ។ ប៉ុន្តែ ពួក​ជំនុំ​នៅក្នុង​តំបន់​ដែល​គាត់​រស់នៅ បាន​ស្វាគមន៍​គាត់ ហើយ​នាំ​គាត់​ឲ្យ​ទទួល​ជឿ​ព្រះយេស៊ូវ​​។ ការ​រួបរួម និង​ក្តី​អំណរ​ដែល​ពួក​គេ​បាន​បង្ហាញ​ចេញ​មក បាន​ធ្វើឲ្យ​គាត់​មាន​ការ​ប៉ះពាល់​ចិត្ត​យ៉ាង​ខ្លាំង ហើយក៏​បាន​ចាប់ផ្តើម​ដើរតាម​ព្រះគ្រីស្ទ ហើយ​មាន​អារម្មណ៍​ថា គេ​ស្រឡាញ់ និង​ទទួល​គាត់។

ក្នុង​បទ​គម្ពីរ​ទំនុកដំកើង ជំពូក១៣៣ ស្តេច​ដាវីឌ​បាន​ពិពណ៌នា ក្នុង​ន័យធៀប​ដ៏​មានអំណាច ដើម្បី​បកស្រាយ អំពី​ឥទ្ធិពល នៃ​ការ​រួបរួម “ដ៏​ល្អ និង​សមគួរ” របស់​រាស្រ្ត​ព្រះ។ ទ្រង់​មាន​បន្ទូល​ថា ការ​រួបរួម​នោះ គឺ​ប្រៀប​ដូចជា​ប្រេង​ដ៏​វិសេស​ដែល​ចាក់​លើ​ក្បាល ក៏​ហូរ​ចុះ​មកដល់​ពុកចង្កា(ខ.២)។ ការ​ចាក់​ប្រេង​ដូចនេះ គឺជា​រឿង​ធម្មតា នៅ​សម័យ​បុរាណ ដែល​ជួនកាល គេ​ធ្វើឡើង​ដើម្បី​ស្វាគមន៍​ភ្ញៀវ​ដែល​ចូល​មក​ក្នុង​ផ្ទះ។ ស្តេច​ដាវីឌ​ក៏បាន​ប្រៀបធៀប​ការ​រួបរួម​នេះ ជាមួយ​ទឹកសន្សើម ដែល​ធ្លាក់ចុះ​មក​លើ​ភ្នំ ដែល​នាំមក​នូវ​ជីវិត និង​ព្រះពរ​ជាច្រើន(ខ.៣)។

ប្រេង​នោះ​បញ្ចេញ​ក្លិនក្រអូប​សាយភាយ​ពេញ​បន្ទប់ ហើយ​ទឹកសន្សើម​នាំមក​នូវ​សំណើម ដល់កន្លែង​ហួតហែង។ ការ​រួបរួម​ក៏​មាន​ឥទ្ធិពល​ដ៏​ល្អ និង​សមគួរ ដោយ​ស្វាគមន៍​អ្នក​ដែល​មាន​អារម្មណ៍​ឯកោ។ ចូរ​យើង​ស្វែងរក​ការ​រួបរួម ក្នុង​ព្រះគ្រីស្ទ ដើម្បីឲ្យ​យើង​អាច​ធ្វើជា​ទី​បញ្ចេញ​ព្រះពរ។—AMY BOUCHER PYE

តើ​អ្នក​បានឃើញ​ការ​រួបរួម​កើតមាន ក្នុង​សហគមន៍​អ្នក នៅពេល​ណា? តើ​អ្នក​អាច​ឈោង​ទៅ​រក​នរណា​ម្នាក់ ដែល​អ្នក​មិន​ស្គាល់ ក្នុង​ព្រះវិហារ​អ្នក ដោយ​របៀបណា?

ឱ​ព្រះយេស៊ូវ​​ សូម​ព្រះអង្គ​ជួយ​ទូលបង្គំ ឲ្យ​បង្ហាញ​សេចក្តី​ស្រឡាញ់ ដល់​អ្នក​ដែល​ទូលបង្គំ​ងាយស្រួល​ស្វាគមន៍ ក៏ដូចជា​អ្នក​ដែល​ពិបាក​ស្វាគមន៍។  

គម្រោងអានព្រះគម្ពីរយៈពេល១ឆ្នាំ : សុភាសិត ២២-២៤ និង ២កូរិនថូស ៨