កាលទ្រង់បានហៅពួកសិស្សទាំង១២នាក់មកហើយ នោះក៏ប្រទានឲ្យគេមានអំណាច។ ម៉ាថាយ ១០:១
នៅយប់មួយនោះ ឆាឡុត អេលាត(Charlotte Elliott) គេងមិនលក់សោះ។ គាត់ជាមនុស្សដែលមានពិការភាពផ្នែករាងកាយ តាំងពីយូរមកហើយ ហើយនៅថ្ងៃបន្ទាប់ គាត់ត្រូវឡើងឆាក នៅកន្លែងលក់ឥវ៉ាន់រ៉ៃអង្គាសប្រាក់ ដែលពួកជំនុំបានរៀបចំ ដើម្បីឲ្យនាងអាចទទួលប្រាក់ឧបត្ថម្ភ សម្រាប់បង់ថ្លៃសាលា នៅថ្នាក់ខ្ពស់ជាមុន។ តែឆាឡុតក៏បានលើកហេតុផលថា នាងមិនមានភាពសក្តិសម ដែលគួរឲ្យគេជួយនោះទេ។ នាងត្រឡប់ខ្លួនចុះឡើងៗ ដោយគេងមិនលក់។ នាងមិនទុកចិត្តថា នាងមានលក្ខណៈសម្បត្តិគ្រប់គ្រាន់ ដោយចោទសួរផ្នែកនីមួយៗនៃជីវិតខាងវិញ្ញាណរបស់ខ្លួនឯង។ នៅថ្ងៃបន្ទាប់ នាងនៅតែមានអារម្មណ៍រសាប់រសល់ តែទីបំផុត នាងក៏បានទៅអង្គុយនៅតុរបស់នាង យកប៊ិច និងក្រដាសមកនិពន្ធបទទំនុកសកលមានចំណងជើងថា “ខ្ញុំមកថ្វាយខ្លួន” (បទលេខ ២០១) ជាបទដ៏ពេញនិយមក្នុងពេលបច្ចុប្បន្ន ដែលផ្តើមដោយពាក្យថា ៖
“ខ្ញុំមកថ្វាយខ្លួន ឥតមានអ្វីអាង អាងតែឈាមទ្រង់ហូរលើឈើឆ្កាង និងព្រះបន្ទូលជាទីសំអាង ឱព្រះអង្គសង្គ្រោះអើយ ខ្ញុំមក”។
ពាក្យពេចន៍ដែលនាងបានសរសេរក្នុងបទទំនុកសកលនេះ កាលពីឆ្នាំ១៨៣៥ គឺបានឆ្លុះបញ្ចាំងអំពីរបៀបដែលព្រះយេស៊ូវបានត្រាស់ហៅពួកសិស្សព្រះអង្គ ឲ្យចូលមកបម្រើព្រះអង្គ។ មិនមែនដោយសារពួកគេបានត្រៀមខ្លួនជាស្រេចដើម្បីដើរតាមព្រះអង្គនោះទេ។ ពួកគេមិនបានត្រៀមខ្លួន តែព្រះអង្គបានត្រាស់ហៅពួកគេ ទោះពួកគេកំពុងស្ថិតក្នុងសណ្ឋានបែបណាក៏ដោយ។ ក្រុមសាវ័ករបស់ព្រះអង្គ មានប្រភេទមនុស្សចម្រុះ១២នាក់ ដូចជា អ្នកយកពន្ធ ពួកឧស្សាហ៍ បងប្អួនពីរនាក់ដែលមានសេចក្តីប្រាថ្នាខ្ពស់ពេក(មើល ម៉ាកុស ១០:៣៥-៣៧) និងយូដាអ៊ីស្ការីយ៉ុត ដែលបានក្បត់ព្រះអង្គ(ម៉ាថាយ ១០:៤)។ តែព្រះអង្គបានប្រទានអំណាចដល់ពួកគេ ឲ្យ “ប្រោសមនុស្សជំងឺឲ្យជា មនុស្សស្លាប់ឲ្យរស់ឡើងវិញ មនុស្សឃ្លង់ឲ្យជាស្អាត ហើយដេញអារក្សចេញផង”(ខ.៨) ដោយមិនបានដាក់តាមខ្លួននូវ ប្រាក់កាក់ ឥវ៉ាន់ អាវ ឬស្បែកជើងសម្រាប់ផ្លាស់ ឬសូម្បីតែឈើច្រត់ឡើយ(ខ.៩-១០)។
ព្រះអង្គមានបន្ទូលថា “ខ្ញុំចាត់អ្នករាល់គ្នាឲ្យទៅ”(ខ.១៦) ហើយព្រះអង្គមានភាពគ្រប់គ្រាន់សម្រាប់ពួកគេ។ សម្រាប់អ្នកដែលស្តាប់តាមការត្រាស់ហៅរបស់ព្រះអង្គ នោះព្រះអង្គនៅតែមានភាពគ្រប់គ្រាន់សម្រាប់ពួកគេ។—PATRICIA RAYBON
តើអ្នកកំពុងស្ថិតក្នុងស្ថានភាព ឬសណ្ឋានបែបណា ក្នុងជីវិត? តើអ្នកមានការសង្ស័យអ្វីខ្លះ អំពីការត្រៀមខ្លួនឲ្យព្រះទ្រង់ប្រើអ្នក?
ឱព្រះយេស៊ូវ សូមព្រះអង្គត្រាស់ហៅទូលបង្គំ ឲ្យចូលមករកព្រះអង្គ ដោយពឹងផ្អែកទាំងស្រុងលើព្រះគុណ និងព្រះចេស្ដា ដើម្បីនាំឲ្យមានការផ្លាស់ប្តូរ។
គម្រោងអានព្រះគម្ពីររយៈពេល១ឆ្នាំ : សាការី ៨-១២ និង វិវរណៈ ២០
