ត្រូវឲ្យនឹកពីព្រះយេហូវ៉ា ជាព្រះនៃឯងវិញ។ ចោទិយកថា ៨:១៨
កាលពីថ្ងៃទី១៥ ខែមករា ឆ្នាំ១៩១៩ ឡានស៊ីទែនដឹកទឹកស្កខ្មៅ បានបែកធ្លាយ ក្នុងទីក្រុងបូស្តុន។ ពេលនោះទឹកស្កខ្មៅធ្វើពីស្កអំពៅ មានចំណុះជាង៧លានលីត្រ បានហូរចេញមកយ៉ាងគំហុកដូចទឹករលកយក្សស៊ូណាមិកម្ពស់ជាង៤ម៉ែត្រ តាមផ្លូវថ្នល់ដោយល្បឿន ៤០គីឡូម៉ែត្រក្នុងមួយម៉ោង ដោយបក់នាំរថយន្តក្រុង អគារ មនុស្ស និងសត្វ។ គេផលិតទឹកស្កខ្មៅជាអាហារ ដែលគ្មានគ្រោះថ្នាក់ តែឧប្បត្តិហេតុនៅថ្ងៃនោះ បានបណ្តាលឲ្យមានមនុស្ស២១នាក់បាត់បង់ជីវិត ហើយមនុស្សជាង១៥០នាក់បានរងរបួស។
ជួនកាល របស់ល្អៗ ដូចទឹកស្កខ្មៅ អាចបណ្តាលឲ្យមានគ្រោះថ្នាក់ ខុសពីការរំពឹងគិតរបស់យើង។ មុនពេលពួកអ៊ីស្រាអែលចូលក្នុងទឹកដី ដែលព្រះសន្យាប្រទានពួកគេ លោកម៉ូសេបានដាស់តឿនរាស្រ្តរបស់ព្រះអង្គ ឲ្យមានការប្រុងប្រយ័ត្ន កុំឲ្យសរសើរខ្លួនឯង ដោយសារការល្អដែលពួកគេបានទទួលនោះឡើយ។ គឺដូចដែលគាត់បានប្រាប់ពួកគេថា “កាលណាឯងបានបរិភោគឆ្អែត បានសង់ផ្ទះយ៉ាងល្អ បានហ្វូងគោ ហ្វូងចៀមចំរើនជាច្រើនឡើង បានប្រាក់មាសសំបូរឡើង ហើយគ្រប់ទាំងរបស់ឯង ក៏បានបរិបូរផង នោះក្រែងចិត្តឯងបានអួតអាង រួចភ្លេចព្រះយេហូវ៉ាជាព្រះនៃឯង ដែលទ្រង់បាននាំឯងចេញរួចពីផ្ទះបាវបំរើ នៅស្រុកអេស៊ីព្ទមក”។ ពួកគេមិនត្រូវសរសើរខ្លួនឯងថា ពួកគេទទួលបានរបស់ទាំងនោះ ដោយសារកម្លាំង ឬសមត្ថភាពខ្លួនឯងនោះឡើយ។ ផ្ទុយទៅវិញ លោកម៉ូសេបានប្រាប់ពួកគេថា “ត្រូវឲ្យនឹកពីព្រះយេហូវ៉ា ជាព្រះនៃឯងវិញ ដ្បិតគឺទ្រង់ហើយ ដែលប្រទានឲ្យឯងមានឥទ្ធិឫទ្ធិ ឲ្យបានទ្រព្យសម្បត្តិ” (ចោទិយកថា ៨:១២-១៤,១៧-១៨)។
គ្រប់ទាំងការល្អ ដែលរាប់បញ្ចូលទាំងសុខភាព និងជំនាញ ដែលយើងប្រើក្នុងការចិញ្ចឹមជីវិត គឺសុទ្ធតែជាព្រះពរ ចេញពីព្រះហស្តនៃព្រះនៃក្តីស្រឡាញ់។ សូម្បីតែនៅពេលដែលយើងខិតខំធ្វើការងារ ក៏ព្រះអង្គជាអ្នកទ្រទ្រង់យើងផងដែរ។ ចូរយើងចំហដៃទទួលព្រះពរព្រះអង្គ ដើម្បីឲ្យយើងបានសរសើរដំកើងព្រះអង្គ ដោយការដឹងគុណ ចំពោះសេចក្តីសប្បុរសដែលព្រះអង្គមានចំពោះយើង!—JAMES BANKS
តើអ្នកចង់អរព្រះគុណព្រះ សម្រាប់ការអ្វីខ្លះ ដែលព្រះអង្គបានប្រទានដោយសេចក្តីសប្បុរស? តើអ្នកអាចជួយនរណាខ្លះ ដោយប្រើព្រះពរដែលអ្នកបានទទួល?
ឱព្រះវរបិតា ទូលបង្គំសូមអរព្រះគុណព្រះអង្គ សម្រាប់ការទ្រទ្រង់ទូលបង្គំ គ្រប់ពេលវេលា។ សូមព្រះអង្គជួយទូលបង្គំឲ្យទទួលស្គាល់សេចក្តីសប្បុរសរបស់ព្រះអង្គ ដើម្បីឲ្យទូលបង្គំបានចែករំលែកសេចក្តីសប្បុរសរបស់ព្រះអង្គដល់អ្នកដទៃ។
For further study, read Compassion: Learning to Love Like Jesus at DiscoverySeries.org/Q0208.
គម្រោងអានព្រះគម្ពីររយៈពេល១ឆ្នាំ : និក្ខមនំ ២៥-២៦ និង ម៉ាថាយ ២០:១៧-៣៤
