កុំតែមានសេចក្តីសប្បុរសរបស់ព្រះយេហូវ៉ា នោះយើងបានសូន្យបាត់អស់រលីងទៅហើយ ឯសេចក្តីមេត្តាករុណារបស់ទ្រង់ នោះមិនចេះផុតឡើយ។ សេចក្តីទាំងនោះ ចេះតែថ្មីឡើងរាល់តែព្រឹកជានិច្ច សេចក្តីស្មោះត្រង់របស់ទ្រង់ធំណាស់។ បរិទេវ ៣:២២-២៣
ក្នុងរយៈពេលប៉ុន្មានទសវត្សរ៍ចុងក្រោយនេះ គេនិយមផលិតខ្សែភាពយន្តល្បីៗឡើងវិញ បន្ទាប់ពីបានចាក់បញ្ចាំងយ៉ាងជោគជ័យជាច្រើនឆ្នាំកន្លងមក។ នៅក្នុងពិភពខ្សែភាពយន្ត គេយកខ្សែភាពយន្តចាស់ៗ មកថត និងចាក់បញ្ចាំងឡើងវិញ ដោយប្រើបច្ចេកទេសទំនើបជាងមុន។ រឿងខ្លះជារឿងដែលមនុស្សជំនាន់ចាស់ជាច្រើនបានស្គាល់ ដូចជារឿងវីរបុរស ឬរឿងនិទានជាដើម។ រឿងខ្លះទៀតជារឿងដែលគេមិនសូវស្គាល់ តែត្រូវគេយកមកផលិតឡើងវិញ ដោយការកែសម្រួលសាច់រឿង។ តែក្នុងករណីនីមួយៗ រឿងដែលបានផលិតសារជាថ្មី មានលក្ខណៈមិនសូវខុសពីរឿងចាស់ទេ។ វាជាការចាប់ផ្តើមជាថ្មី ជាការផ្តល់ឱកាសឲ្យរឿងចាស់មានជីវិតឡើងវិញ។
ដំណឹងល្អរបស់ព្រះគ្រីស្ទ ក៏បានផ្តល់ឱកាសឲ្យយើងម្នាក់ៗចាប់ផ្តើមជីវិតយើងជាថ្មីផងដែរ។ ព្រះយេស៊ូវបានត្រាស់ហៅយើង ឲ្យទទួលការអត់ទោសបាប ក៏ដូចជាជីវិតពេញបរិបូរ និងអស់កល្បជានិច្ច(យ៉ូហាន ១០:១០)។ ហើយក្នុងកណ្ឌគម្ពីរបរិទេវ ហោរាយេរេមាបានរំឭកយើងថា សេចក្តីសប្បុរសរបស់ព្រះអម្ចាស់តែងតែថ្មីជានិច្ច សម្រាប់យើង បានជាយើងអាចចាប់ផ្តើមជីវិតជាថ្មី។ គឺដូចមានសេចក្តីចែងថា “កុំតែមានសេចក្តីសប្បុរសរបស់ព្រះយេហូវ៉ា នោះយើងបានសូន្យបាត់អស់រលីងទៅហើយ ឯសេចក្តីមេត្តាករុណារបស់ទ្រង់ នោះមិនចេះផុតឡើយ។ សេចក្តីទាំងនោះ ចេះតែថ្មីឡើងរាល់តែព្រឹកជានិច្ច សេចក្តីស្មោះត្រង់របស់ទ្រង់ធំណាស់”(បរិទេវ ៣:២២-២៣)។
រៀងរាល់ថ្ងៃ ព្រះគុណព្រះបានត្រាស់ហៅយើង ឲ្យឱបក្រសោបយកឱកាសពិសោធន៍នឹងសេចក្តីស្មោះត្រង់របស់ព្រះអង្គឡើងវិញ។ ទោះយើងកំពុងជួបការលំបាក ដោយសារផលវិបាកនៃកំហុសរបស់យើង ឬកំពុងឆ្លងកាត់ទុក្ខលំបាកដទៃទៀតក្តី ព្រះទ្រង់នៅតែអាចប្រទានការអត់ទោស ជីវិត និងក្តីសង្ឃឹម ក្នុងថ្ងៃថ្មី។ ជារៀងរាល់ថ្ងៃ យើងនៅតែមានឱកាសចាប់ផ្តើមជាថ្មី តាមការដឹកនាំរបស់ព្រះអម្ចាស់ ដែលកំពុងបញ្ចូលរឿងរបស់យើង ទៅក្នុងរឿងដ៏ធំរបស់ព្រះអង្គ។—ADAM R. HOLZ
តើទស្សនៈរបស់អ្នកមានការផ្លាស់ប្តូរដូចម្តេចខ្លះ ពេលដែលអ្នកបានជញ្ជឹងគិត និងនឹកចាំអំពីសេចក្តីស្មោះត្រង់របស់ព្រះអង្គ?
តើការអត់ទោសបាប និងព្រះគុណព្រះ បាននាំឲ្យអ្នកចាប់ផ្តើមជីវិតជាថ្មីដូចម្តេចខ្លះ?
ឱព្រះវរបិតា ទូលបង្គំសូមអរព្រះគុណព្រះអង្គ ដែលបានប្រទានព្រះគុណ និងការអត់ទោសបាប ដើម្បីឲ្យទូលបង្គំមានឱកាសចាប់ផ្តើមជាថ្មី។
គម្រោងអានព្រះគម្ពីររយៈពេល១ឆ្នាំ : យ៉ូស្វេ ១៩-២១ និង លូកា ២:២៥-៥២
