លូកា ២:១-៧
នាងប្រសូតបានបុត្រាជាចំបងមក រួចរុំនឹងសំពត់ផ្តេកក្នុងស្នូក ពីព្រោះក្នុងផ្ទះសំណាក់គ្មានកន្លែងណានៅទេ។ លូកា ២:៧
ខ្ញុំមានការសប្បាយចិត្ត ដែលបានចំណាយពេលចុងសប្តាហ៍ នៅរដ្ឋញូអូឡិន ក្នុងអំឡុងពេលដែលមានក្បួនដង្ហែក្នុងសង្កាត់វប្បធម៌បារាំង ដោយបានដើរមើលសារមន្ទីរសង្គ្រាមលោកលើកទី២ ហើយក៏បានភ្លក់អយស្ទ័រអាំង។ ប៉ុន្តែ ពេលដែលខ្ញុំគេងលក់ក្នុងបន្ទប់សម្រាប់ភ្ញៀវស្នាក់នៅ ក្នុងផ្ទះរបស់មិត្តភក្តិខ្ញុំ ខ្ញុំក៏បាននឹកប្រពន្ធកូនរបស់ខ្ញុំ។ ខ្ញុំមានអំណរណាស់ ដែលមានឱកាសចែកចាយព្រះបន្ទូលក្នុងទីក្រុងផ្សេងទៀត ប៉ុន្តែ ខ្ញុំមានអំណរបំផុតដែលមានបន្ទប់សម្រាប់ប្រកបជាមួយព្រះយេស៊ូវ ក្នុងផ្ទះមិត្តភក្តិខ្ញុំ។
ក្នុងការស្វែងយល់អំពីព្រះរាជកិច្ចដែលព្រះយេស៊ូវបានធ្វើ កាលព្រះអង្គគង់នៅលើផែនដី ជួនកាល គេមិនបានចាប់អារម្មណ៍ថា ព្រឹត្តិការណ៍សំខាន់ៗបំផុតរបស់ព្រះអង្គបានកើតឡើង នៅតាមដងផ្លូវញឹកញាប់ប៉ុណ្ណាទេ។ ព្រះរាជបុត្រានៃព្រះបានយាងចូលក្នុងលោកិយ ដោយការប្រសូតក្នុងភូមិបេថ្លេហិម ស្ថិតនៅចម្ងាយមិនអាចវាស់បាន ពីផ្ទះរបស់ព្រះអង្គនៅនគរស្ថានសួគ៌ ហើយក៏ឆ្ងាយពីផ្ទះគ្រួសារព្រះអង្គនៅភូមិណាសារ៉ែត។ មានគ្រួសារជាច្រើនបានធ្វើដំណើរមកភូមិបេថ្លេហិម ដើម្បីធ្វើជំរឿន ហេតុនេះហើយ កណ្ឌគម្ពីរលូកាបានចែងថា នាងម៉ារា និងលោកយ៉ូសែបមិនអាចរកបានបន្ទប់ស្នាក់នៅឲ្យបានសមរម្យទេ(លូកា ២:៧)។
ការអ្វីដែលគេមិនឃើញមាន ក្នុងការប្រសូតរបស់ព្រះយេស៊ូវ គឺពិតជាបានបង្ហាញឲ្យគេឃើញ ក្នុងការសុគតរបស់ព្រះអង្គ។ កាលព្រះយេស៊ូវនាំសិស្សព្រះអង្គចូលទីក្រុងយេរូសាឡិម ព្រះអង្គបានប្រាប់សាវ័កពេត្រុស និងសាវ័កយ៉ូហាន ឲ្យរៀបចំអាហារបុណ្យរំលង។ ព្រះអង្គបានបង្គាប់ពួកគេឲ្យដើរតាមអ្នកលីក្អមទឹក ទៅដល់ផ្ទះគាត់ ហើយសុំប្រើបន្ទប់ទទួលភ្ញៀវរបស់គាត់ សម្រាប់ឲ្យព្រះគ្រីស្ទ និងពួកសិស្សព្រះអង្គអាចបរិភោគអាហារពេលល្ងាចលើកចុងក្រោយ (២២:១០-១២)។ នៅក្នុងកន្លែងដែលបានខ្ចីគេនោះ ព្រះយេស៊ូវបានបង្កើតពិធីលៀងព្រះអម្ចាស់ ជាការប្រាប់ទុកជាមុនអំពីការសុគតរបស់ព្រះអង្គនៅលើឈើឆ្កាង(ខ.១៧-២០)។
យើងស្រឡាញ់ភាពកក់ក្តៅនៅក្នុងផ្ទះរបស់យើង ប៉ុន្តែ បើយើងធ្វើដំណើរដោយព្រះវិញ្ញាណរបស់ព្រះយេស៊ូវ សូម្បីតែបន្ទប់សម្រាប់ភ្ញៀវស្នាក់នៅ ក៏អាចប្រើជាកន្លែងប្រកបជាមួយព្រះអង្គផងដែរ។—Mike Wittmer
តើរឿងដែលមានន័យបំផុតបានកើតឡើងក្នុងជីវិតអ្នក នៅកន្លែងណា ហើយរឿងទាំងនោះមានចំណុចអ្វីដែលធ្វើឲ្យអ្នកចងចាំបំផុត?
នៅពេលដែលអ្នកធ្វើដំណើរនៅតាមផ្លូវ តើអ្នកអាចចំណាយពេលប្រកបជាមួយព្រះគ្រីស្ទដោយរបៀបណា?
ឱព្រះយេស៊ូវ ព្រះអង្គបានយាងចុះពីផ្ទះរបស់ព្រះអង្គនៅស្ថានសួគ៌ដ៏សែនឆ្ងាយមករកទូលបង្គំ
សូមព្រះអង្គជួយទូលបង្គំឲ្យនឹកចាំថា ព្រះអង្គតែងតែគង់នៅជាមួយទូលបង្គំជានិច្ច។
គម្រោងអានព្រះគម្ពីររយៈពេល១ឆ្នាំ: ហូសេ ៩-១១ និង វិវរណៈ ៣
