លូកា ១០:២៧-៣៧
ព្រះយេស៊ូវមានព្រះបន្ទូលថា ទៅចុះ ចូរអ្នកប្រព្រឹត្តបែបយ៉ាងដូច្នោះដែរ។ លូកា ១០:៣៧
ថ្ងៃមួយ នៅរដូវរងា ក្នុងរដ្ឋមីឈីហ្កេន មានអ្នកដឹកជញ្ជូនម្នាក់បានកត់សំគាល់ឃើញ ដូនចាស់ម្នាក់កំពុងចូកព្រឹលចេញពីផ្លូវបត់ចូលផ្ទះរបស់ដូនចាស់។ គាត់ក៏បានឈប់ឡាន ហើយក៏បានសុំដូនចាស់ អនុញ្ញាតឲ្យគាត់ជួយចូកព្រឹលរហូតដល់រួចរាល់។ ពួកគេក៏បានចូកព្រឹលជាមួយគ្នាប្រហែល១៥នាទី ខណៈពេលដែលអ្នកជិតខាងរបស់ដូនចាស់ កំពុងមើលពួកគេពីចម្ងាយ។ ដូនចាស់ក៏បានប្រាប់គាត់ថា “យាយអរគុណចៅខ្លាំងណាស់ ដែលបានជួយយាយចូកព្រឹល។ ព្រះបានបញ្ជូនចៅឲ្យមកជួយយាយ នៅថ្ងៃនេះ”។
ក្នុងអំឡុងពេលដែលព្រះយេស៊ូវជជែកជាមួយអ្នកប្រាជ្ញក្រឹត្យវិន័យរបស់សាសន៍យូដា ព្រះអង្គក៏បានពន្យល់ពួកគេ អំពីអត្ថន័យនៃការស្រឡាញ់អ្នកដទៃ(លូកា ១០:២៥-៣៧)។ នៅពេលដែលព្រះអង្គឲ្យគាត់កាត់ស្រាយក្រឹត្យវិន័យដែលគាត់ស្គាល់ច្បាស់ គាត់និយាយថា “ឯងត្រូវស្រឡាញ់ព្រះអម្ចាស់ ជាព្រះនៃឯងឲ្យអស់អំពីចិត្ត អស់អំពីព្រលឹង អស់អំពីកំឡាំង ហើយអស់អំពីគំនិតឯង ព្រមទាំងអ្នកជិតខាង ដូចខ្លួនឯងដែរ”(ខ.២៧)។
បន្ទាប់មក ព្រះអង្គក៏បានចែកចាយរឿង ដែលអ្នកដឹកនាំសាសនាពីរនាក់មិនបានអើពើចំពោះជនរងគ្រោះម្នាក់ដែលត្រូវចោរប្លន់។ ប៉ុន្តែ សាសន៍សាម៉ារីម្នាក់ បានធ្វើការលះបង់ ដើម្បីជួយយកអសារបុរសនោះ(ខ.៣០-៣៥)។ អ្នកដឹកនាំសាសន៍យូដានៅសម័យនោះ បានចាត់ទុកសាសន៍សាម៉ារី ជាសាសន៍តូចទាបជាងសាសន៍យូដា។ ប៉ុន្តែ អ្នកប្រាជ្ញក្រឹត្យវិន័យរូបនោះក៏បានដឹងថា សាសន៍សាម៉ារីដែលមានចិត្តមេត្តាចំពោះបុរសនោះ គឺជាអ្នកជិតខាងល្អ ដែលមានសេចក្តីស្រឡាញ់។ ពេលនោះ ព្រះយេស៊ូវក៏បានលើកទឹកចិត្តគាត់ឲ្យប្រព្រឹត្តតាមគំរូរបស់សាសន៍សាម៉ារីនោះ(ខ.៣៦-៣៧)។
ការស្រឡាញ់អ្នកដទៃមិនតែងតែមានភាពងាយស្រួលឡើយ។ ប៉ុន្តែ ខណៈពេលដែលព្រះយេស៊ូវចាក់បង្ហូរសេចក្តីស្រឡាញ់ដ៏លើសលប់មកលើយើង ព្រះអង្គនឹងជួយយើងឲ្យស្រឡាញ់អ្នកជិតខាង តាមគំរូរបស់សាសន៍សាម៉ារីល្អផងដែរ។—Xochitl Dixon
តើព្រះបានបង្ហាញសេចក្តីស្រឡាញ់របស់ព្រះអង្គ តាមរយៈអ្នកជិតខាង យ៉ាងដូចម្តេចខ្លះ?
តើអ្នកអាចបង្ហាញសេចក្តីស្រឡាញ់របស់ព្រះដល់នរណាម្នាក់ នៅសប្តាហ៍នេះ ដូចម្តេចខ្លះ?
ឱព្រះយេស៊ូវ សូមព្រះអង្គប្រទានទូលបង្គំ នូវឱកាសបង្ហាញសេចក្តីស្រឡាញ់ដល់មនុស្សទាំងអស់
ដែលព្រះអង្គបានបង្កើត និងជាពិសេសអ្នកជិតខាងរបស់ទូលបង្គំ។
គម្រោងអានព្រះគម្ពីររយៈពេល១ឆ្នាំ : ជនគណនា ២៨-៣០ និង ម៉ាកុស ៨:២២-៣៨
