ព្រះគ្រីស្ទ ជាព្រះដ៏ប្រោសលោះ
ដោយJennifer Benson Schuldt
June 29, 2017
នៅទីក្រុងរីអូ ដឺ ចេនេរ៉ូ(Rio de Janeiro) មានរូបចម្លាក់ព្រះគ្រីស្ទ ជាព្រះដ៏ប្រោសលោះ ដ៏ធំសម្បើម ដែលខ្ពស់ត្រដែតនៅលើភ្នំ ទតមើលមកទីក្រុងនោះ នៅខាងក្រោម។ រូបចម្លាក់ដ៏ល្បីល្បាញមួយនេះ ជារូបចម្លាក់ព្រះយេស៊ូវលាតសន្ធឹងព្រះហស្តទាំងសងខាង ដែលយើងមើលទៅតួខ្លួននៃរូបចម្លាក់នោះទាំងមូល មានរាង្គជាឈើឆ្កាង។ លោកហេតទ័រ ដឺ ស៊ីលវ៉ា ខូស្តា(Heitor de Silva Costa) ដែលជាស្ថាបត្យករប្រេស៊ីល បានរចនារូបចម្លាក់មួយនេះ។ គាត់បានស្រមៃថា ពេលពលរដ្ឋនៅទីក្រុងនោះ ក្រោកពីព្រលឹម ពួកគេនឹងបានឃើញរូបចម្លាក់ព្រះយេស៊ូវ លេចឡើង ចេញពីភាពងងឹតមុនគេ នៅពេលពេលទៀបភ្លឺ។ គាត់ក៏សង្ឃឹមផងដែរថា ពេលថ្ងៃលិច អ្នកក្រុងរីអូ នឹងបានឃើញពន្លឺព្រះអាទិត្យលិច ពីក្រោយព្រះកេសរូបចម្លាក់ព្រះយេស៊ូវ។ ជាការពិតណាស់ យើងមិនថ្វាយបង្គំរូបចម្លាក់របស់ព្រះយេស៊ូវទេ តែរូបចម្លាក់របស់ទ្រង់ ដែលគេបានសាងសង់ នៅទីក្រុងរីអូ ប្រទេសប្រេស៊ីល បានធ្វើឲ្យខ្ញុំនឹកចាំថា ជារៀងរាល់ថ្ងៃ យើងចាំបាច់ត្រូវមើលទៅព្រះសង្រ្គោះយើង ដែលជាព្រះដ៏ពិត ជារៀងរាល់ថ្ងៃ ក្នុងពេលដែលយើងមានសេចក្តីសុខ ក៏ដូចជានៅពេលយើងមានទុក្ខលំបាក។ ពេលលោកយ៉ូបកំពុងរងទុក្ខវេទនា គាត់មានប្រសាសន៍ថា “ឯខ្ញុំៗដឹងថា អ្នកដែលលោះខ្ញុំទ្រង់មានព្រះជន្មរស់នៅ ហើយដល់ជាន់ក្រោយ ទ្រង់នឹងមកឈរនៅលើផែនដី”(យ៉ូប ១៩:២៥)។ ត្រង់ចំណុចនេះ ការស្រែកយំរបស់លោកយ៉ូប កំពុងនាំចិត្តយើង ឲ្យមើលទៅព្រះយេស៊ូវ ដែលជាព្រះសង្រ្គោះ ដ៏មានព្រះជន្មរស់ ដែលនឹងយាងចុះមកផែនដីម្តងទៀត នៅថ្ងៃណាមួយ(១ថែស្សាឡូនិច ៤:១៦-១៨)។ កាលណាយើងផ្តោតភ្នែករបស់យើង ទៅរកព្រះយេស៊ូវ យើងនឹងនឹកចាំថា ទ្រង់បានរំដោះយើងឲ្យរួចពីអំពើបាបហើយ។ ព្រះយេស៊ូវ “ទ្រង់បានថ្វាយព្រះអង្គទ្រង់ជំនួសយើងរាល់គ្នា ដើម្បីនឹងលោះយើងឲ្យរួចពីគ្រប់ទាំងសេចក្តីទទឹងច្បាប់ ហើយនិងសំអាតមនុស្ស១ពួក ទុកដាច់ជារាស្ត្ររបស់ផងទ្រង់ ដែលឧស្សាហ៍ធ្វើការល្អ”(ទីតុស ២:១៤)។ អស់អ្នកណាដែលបានទទួលព្រះយេស៊ូវជាព្រះសង្រ្គោះ គឺមានមូលហេតុ ដែលត្រូវអរសប្បាយ នៅថ្ងៃនេះ។ ទោះបីជាយើងកំពុងរងទុក្ខលំបាកអ្វីក៏ដោយ នៅលើផែនដីនេះ យើងនៅតែអាចមានសង្ឃឹមនៅថ្ងៃនេះ ហើយសម្លឹងឆ្ពោះទៅរកក្តីអំណរដែលយើងនឹងមាន ជាមួយទ្រង់ អស់កល្បជានិច្ច។-Jennifer Benson Schuldt
បទគម្ពីរប្រចាំថ្ងៃ
ឯខ្ញុំៗដឹងថា អ្នកដែលលោះខ្ញុំទ្រង់មានព្រះជន្មរស់នៅ ហើយដល់ជាន់ក្រោយ ទ្រង់នឹងមកឈរនៅលើផែនដី។ -យ៉ូប ១៩:២៥