ក្នុងឆ្នាំ ១៨៧៩ ក្រុមបុរាណវត្ថុវិទូ បានរកឃើញវត្ថុតូចមួយ ដែលមានលក្ខណៈដ៏គួរឲ្យកត់សម្គាល់ ក្នុងតំបន់មួយ ដែលសព្វថ្ងៃ នេះគេហៅថា ប្រទេសអ៊ីរ៉ាក់(ក្នុងសម័យសញ្ញាចាស់ គេហៅថា ចក្រភពបាប៊ីឡូន)។ គេបានដាក់ឈ្មោះសិលាចារិក ដែលមានប្រវែងប្រហែល ២២សង់ទីម៉ែត្រនោះថា Cyrus Cylinder(ប្រែមកថាស៊ីឡាំង របស់ស្តេចស៊ីរូស)។ សិលាចារិកនោះបានកត់ត្រាអំពីការអ្វី ដែលស្តេចស៊ីរូស នៃចក្រភពពើរស៊ីបានធ្វើកាលពី ២៥០០ឆ្នាំមុន។ សិលាចារិកនោះបានចែងថា ស្តេចស៊ីរូសបានអនុញ្ញាតឲ្យមនុស្សមួយក្រុម វិលត្រឡប់ទៅស្រុកកំណើតរបស់ខ្លួន ដើម្បីកសាង “ទីក្រុងបរិសុទ្ធ”របស់ខ្លួនឡើងវិញ។
រឿងនេះក៏មានចែង នៅក្នុងបទគម្ពីរ អែសរ៉ា ជំពូក១ផងដែរ។ គឺដូចមានសេចក្តីចែងថា “ព្រះយេហូវ៉ាទ្រង់បណ្តាលព្រះទ័យស៊ីរូស ជាស្តេចពើស៊ី ឲ្យទ្រង់បានចេញព្រះរាជឱង្ការ ផ្សាយទៅគ្រប់ក្នុងនគរទ្រង់”(ខ.១)។ ស្តេចស៊ីរូសបានមានបន្ទូលថា ទ្រង់នឹងដោះលែងពួកឈ្លើយសឹក ក្នុងចក្រភពបាប៊ីឡូន ឲ្យវិលត្រឡប់ទៅក្រុងយេរូសាឡិមវិញ ដើម្បីកសាងស្រុកកំណើត និងសង់ព្រះវិហាររបស់ខ្លួនឡើងវិញ(ខ.២-៥)។ ប៉ុន្តែរឿងនេះ មិនទាន់ចប់តែប៉ុណ្ណេះទេ។ ដានីយ៉ែលបានសារភាពអំពើបាបរបស់គាត់ និងអំពើបាបរបស់ប្រជាជនគាត់ ហើយក៏បានទូលអង្វរសូមឲ្យព្រះទ្រង់បញ្ចប់ភាពជាឈ្លើយសឹក ក្នុងចក្រភពបាប៊ីឡូន(ដានីយ៉ែល ៩)។ ព្រះទ្រង់ក៏បានឆ្លើយតប ដោយចាត់ទេវតា ឲ្យយាងចុះមកមានបន្ទូល ទៅកាន់ដានីយ៉ែល(ខ.២១)។ ក្រោយមក ទ្រងក៏បានធ្វើការក្នុងចិត្តស្តេចស៊ីរូស ដើម្បីឲ្យទ្រង់ដោះលែងជនជាតិហេព្រើរ។(មើល យេរមា ២៥:១១-១២ ៣៩:១០)។
សិលាចារិករបស់ស្តេចស៊ីរូស និងព្រះបន្ទូលព្រះសុទ្ធតែបានបង្ហាញយើងថា ព្រះទ័យរបស់ស្តេចអង្គនេះ បានកែប្រែ ហើយទ្រង់បានអនុញ្ញាតឲ្យជនជាតិហេព្រើរ វិលត្រឡប់ទៅស្រុកកំណើតវិញ ហើយថ្វាយបង្គំព្រះ។ រឿងនេះបានផ្តល់នូវការបង្រៀនដ៏អស្ចារ្យសម្រាប់យើង ក្នុងពេលបច្ចុប្បន្ននេះ។ ក្នុងលោកិយដែលហាក់ដូចជា វឹកវរមិនអាចគ្រប់គ្រងបាន យើងអាចទុកចិត្តថា ព្រះទ្រង់អាចកែប្រែចិត្តរបស់អ្នកដឹកនាំទាំងឡាយបាន។ គឺដូចដែលបទគម្ពីរសុភាសិត ២១:១ បានចែងថា “ព្រះទ័យនៃស្តេច នោះនៅក្នុងព្រះហស្តព្រះយេហូវ៉ា ដូចជាផ្លូវនៃទឹកហូរទាំងឡាយ ទ្រង់ឲ្យបែរហូរទៅខាងណាក៏តាមតែព្រះហឫទ័យ”។ ហើយបទគម្ពីរ រ៉ូម ១៣:១ បានចែងថា “ដ្បិតគ្មានអំណាចណាទេ លើកតែមកពីព្រះ គឺព្រះទ្រង់បានតាំងពួកលោកទាំងនោះឲ្យមានអំណាច”។
ព្រះអម្ចាស់អាចកែប្រែចិត្តយើង ក៏ដូចជាកែប្រែចិត្តអ្នកដឹកនាំទាំងឡាយ។ យើងអាចទុកចិត្តទ្រង់ ដ្បិតទ្រង់គ្រប់គ្រងការគ្រប់យ៉ាង។ ចូរយើងទូលសូមឲ្យទ្រង់ធ្វើការកែប្រែចិត្តអ្នកដឹកនាំ ដែលដើរផ្លូវខុស។-Dave Branon
