ខ្ញុំបានតយុទ្ធយ៉ាងល្អ ខ្ញុំបានរត់ប្រណាំងជាស្រេច ខ្ញុំបានរក្សាសេចក្តីជំនឿទៅហើយ។ ២ធីម៉ូថេ ៤:៧
សាលារៀនដែលកូនប្រុសខ្ញុំ ឈ្មោះ ប្រាយអិន(Brian) បង្វឹកក្រុមបាល់ទាត់ បានចាញ់ការប្រកួតប្រចាំរដ្ឋ ក្នុងការប្រយុទ្ធដ៏ស្វិតស្វាញ។ គូរប្រកួតរបស់ពួកគេប្រកួតមិនដែលចាញ់អស់រយៈពេល២ឆ្នាំហើយ។ ខ្ញុំក៏បានផ្ញើសារបង្ហាញការសោកស្តាយ ដល់គាត់ ហើយក៏បានទទួលសារត្រឡប់មកវិញថា “ក្មេងៗបានប្រយុទ្ធយ៉ាងស្វិតស្វាញ”។
គ្មានគ្រូបង្វឹកណា ដែលបំបាក់មុខកីឡាកររបស់ខ្លួន បន្ទាប់ពីការប្រកួតចាញ់នោះទេ។ គ្មាននរណាស្រែកដាក់ពួកគេ ដោយសារពួកគេចាញ់ ឬបានធ្វើការសម្រេចចិត្តខុស ក្នុងការប្រកួតទេ។ ទេ គ្រូបង្វឹកបានបង្ហាញចេញនូវការកោតសរសើរកីឡាករវ័យក្មេង នូវចំណុចដែលអាចសរសើរ។
សម្រាប់អ្នកជឿព្រះយេស៊ូវ ដែលជាអ្នកបម្រើដ៏ស្មោះត្រង់របស់ព្រះអង្គ ក៏នឹងមិនឮពាក្យថ្កោលទោសធ្ងន់ៗ ពីព្រះអង្គដែរ។ ពេលដែលព្រះគ្រីស្ទយាងមក ហើយយើងឈរនៅចំពោះព្រះអង្គ ព្រះអង្គនឹងមិនធ្វើឲ្យយើងខ្មាសគេឡើយ។ ព្រះអង្គទតមើលការល្អត្រឹមត្រូវដែលយើងបានធ្វើ និងភាពស្មោះត្រង់របស់យើង កាលយើងដើរតាមព្រះអង្គ(២កូរិនថូស ៥:១០ អេភេសូរ ៦:៨)។ ព្រះអង្គនឹងមានបន្ទូលថា “អ្នកបម្រើដ៏ល្អស្មោះត្រង់អើយ”។ សាវ័កប៉ុលបានធ្វើបន្ទាល់ថា គាត់បាន “តយុទ្ធយ៉ាងល្អ” ហើយទន្ទឹមរង់ចាំព្រះអង្គស្វាគមន៍គាត់ នៅនគរស្ថានសួគ៌(២ធីម៉ូថេ ៤:៧-៨)។
ជីវិតជាការតស៊ូឥតឈប់ឈរ ដោយតយុទ្ធនឹងសត្រូវខាងវិញ្ញាណដ៏កាចសាហាវ ដែលប្តូរផ្តាច់ក្នុងការបំផ្លាញយើង។ វានឹងព្យាយាមរារាំងយើង មិនឲ្យមានលក្ខណៈដូចព្រះយេស៊ូវ និងស្រឡាញ់អ្នកដទៃ។ ព្រះទ្រង់ជ្រាបថា ក្នុងការតយុទ្ធនេះ យើងមានជោគជ័យ ហើយក៏មានបរាជ័យដែលគួរឲ្យសោកស្តាយ តែយើងត្រូវដឹងថា អ្នកណាដែលនៅក្នុងព្រះគ្រីស្ទយេស៊ូវ នោះគ្មានទោសសោះ(រ៉ូម ៨:១)។ បើយើងឈរនៅចំពោះព្រះអង្គ ក្នុងព្រះគុណនៃព្រះរាជបុត្រាទ្រង់ យើងនឹងបានសេចក្តីសរសើរពីព្រះរៀងខ្លួន (១កូរិនថូស ៤:៥)។—David H. Roper
ពេលអ្នកគិតអំពីការឈរនៅចំពោះព្រះនៅទីជំនុំជម្រះ តើអ្នកមានអារម្មណ៍ភ័យខ្លាច ឬមានអំណរ? តើមានកត្តាអ្វីដែលនាំឲ្យអ្នកមានអំណរ?
ឱព្រះអម្ចាស់ ទូលបង្គំសូមអរព្រះគុណ សម្រាប់ការសន្យាថា ដោយសារទូលបង្គំមានព្រះយេស៊ូវជាព្រះអង្គសង្រ្គោះ នោះទូលបង្គំនឹងគ្មានទោសអស់កល្បជានិច្ច។
គម្រោងអានព្រះគម្ពីររយៈពេល១ឆ្នាំ : អូបាឌា និង វិវរណៈ ៩
