ចូរឲ្យអ្នករាល់គ្នាបានគ្រប់លក្ខណ៍ ដូចព្រះវរបិតានៃអ្នក ដែលគង់នៅស្ថានសួគ៌ ទ្រង់គ្រប់លក្ខណ៍ដែរ។ ម៉ាថាយ ៥:៤៨
អ្នកស្រី ខាថលីន នោរីស(Kathleen Norris) បានសរសេរថា “ភាពល្អឥតខ្ចោះនិយម ជាពាក្យដែលគួរឲ្យខ្លាចបំផុត ដែលខ្ញុំបានស្គាល់”។ គាត់បានធ្វើការប្រៀបធៀប ភាពល្អឥតខ្ចោះនិយម ក្នុងសម័យបច្ចុប្បន្ន ជាមួយនឹង “ភាពគ្រប់លក្ខណ៍” ដែលបានចែងក្នុងកណ្ឌគម្ពីរម៉ាថាយ។ គាត់បានរៀបរាប់ថា ភាពល្អឥតខ្ចោះនិយម នៅសម័យនេះ គឺជា “ទារុណកម្មផ្លូវចិត្តដ៏ធ្ងន់ធ្ងរ ដែលធ្វើឲ្យមនុស្សខ្វះទំនុកចិត្ត ឬមិនហ៊ានធ្វើការប្រថុយ ដែលចាំបាច់”។ ប៉ុន្តែ ពាក្យដែលប្រែមកថា “គ្រប់លក្ខណ៍” ក្នុងកណ្ឌគម្ពីរម៉ាថាយ គឺមានន័យថា មានភាពពេញវ័យខាងវិញ្ញាណ មានភាពពេញលេញ ឬពេញបរិបូរ។ អ្នកស្រីនោរីសក៏បានសន្និដ្ឋានថា “ដើម្បីមានភាពគ្រប់លក្ខណ៍ យើងត្រូវធ្វើការបើកចំហចិត្ត សម្រាប់ការលូតលាស់ ហើយមានភាពពេញវ័យល្មម នឹងលះបង់ប្រយោជន៍ផ្ទាល់ខ្លួន ដើម្បីអ្នកដទៃ”។
កាលណាយើងមានការយល់ដឹងដូចនេះ អំពីភាពគ្រប់លក្ខណ៍ ឬភាពល្អឥតខ្ចោះ យើងនឹងកាន់តែងាយយល់សាច់រឿងដ៏សំខាន់ ដែលមានចែងក្នុងបទគម្ពីរម៉ាថាយ ជំពូក១៩ ដែលក្នុងនោះ មានបុរសម្នាក់បានទូលសួរព្រះយេស៊ូវថា តើគាត់ត្រូវធ្វើអំពើល្អអ្វីខ្លះ “ដើម្បីឲ្យអាចមានជីវិតអស់កល្បជានិច្ច”(ខ.១៦)។ បុរសនោះទូលព្រះអង្គថា គាត់បានធ្វើតាមបញ្ញត្តិទំាងប៉ុន្មានរបស់ព្រះហើយ តើនៅខ្វះអ្វីទៀត?(ខ.២០)។
ពេលនោះ ព្រះយេស៊ូវក៏បានបង្ហាញថា ទ្រព្យសម្បត្តិរបស់បុរសនោះ កំពុងតែចងរឹតចិត្តរបស់គាត់ជាប់ហើយ។ ព្រះអង្គក៏បានមានបន្ទូលថា “បើអ្នកចង់បានជាគ្រប់លក្ខណ៍ ចូរអ្នកទៅលក់របស់ទ្រព្យខ្លួន ហើយចែកដល់ពួកអ្នកក្រីក្រទៅ នោះអ្នកនឹងបានទ្រព្យសម្បត្តិ នៅឯស្ថានសួគ៌វិញ រួចឲ្យមកតាមខ្ញុំចុះ”(ខ.២១)។
ព្រះទ្រង់សព្វព្រះទ័យឲ្យយើងម្នាក់ៗ មានភាពគ្រប់លក្ខណ៍ តែយើងប្រហែលជាមានទ្រព្យសម្បត្តិ ឬទម្លាប់អ្វីមួយ ដែលបានរារាំងយើងមិនឲ្យគ្រប់លក្ខណ៍។ នៅថ្ងៃនេះ បើយើងនៅមានចំណងអ្វីមួយ ដែលមិនទាន់កាត់ផ្តាច់ ចូរយើងស្តាប់តាមការអញ្ជើញរបស់ព្រះយេស៊ូវ ឲ្យលះបង់អ្វីៗគ្រប់យ៉ាងថ្វាយព្រះអង្គ ហើយស្វែងរកសេរីភាព ក្នុងភាពពេញលេញ ដែលមានតែព្រះអង្គទេ ដែលអាចប្រទានឲ្យបាន(ខ.២៦)។—Monica La Rose
តើភាពល្អឥតខ្ចោះតាមបែបលោកិយ និងភាពគ្រប់លក្ខណៈក្នុងព្រះគម្ពីរមានភាពខុសគ្នាដូចម្តេចខ្លះ? តើការអនុញ្ញាតឲ្យព្រះទ្រង់គ្រប់គ្រងជីវិតអ្នក នាំឲ្យអ្នកមានសេរីភាពប៉ុណ្ណា?
ឱព្រះនៃសេចក្តីស្រឡាញ់ សូមព្រះអង្គអត់ទោសឲ្យទូលបង្គំ ដែលច្រើនតែមានការយល់ខុសថា ការចម្រើនឡើងខាងសាច់ឈាម ជាការលូតលាស់ក្នុងព្រះអង្គ។ សូមព្រះអង្គ គ្រងរាជ្យលើចិត្តទូលបង្គំ ហើយសូមព្រះអង្គជួយទូលបង្គំឲ្យឱបក្រសោបយកជីវិត ដែលរស់នៅ ដោយសេរីភាព ជាមួយព្រះអង្គ និងរាស្រ្តដែលព្រះអង្គស្រឡាញ់យ៉ាងខ្លាំង។
គម្រោងអានព្រះគម្ពីររយៈពេល១ឆ្នាំ : និក្ខមនំ ២១-២២ និង ម៉ាថាយ ១៩
Leave A Comment