ការប្រើអំណោយទានរបស់យើង
ដោយPatricia Raybon
March 2, 2022
គឺដោយខំបំរើគ្នាទៅវិញទៅមក តាមអំណោយទានដែលគ្រប់គ្នាបានទទួលមក។ ១ពេត្រុស ៤:១០ កាលពីឆ្នាំ២០១៣ តារាភាពយន្តអង់គ្លេស ឈ្មោះ ដាវីឌ ស៊ូឈែត(David Suchet) កំពុងតែជាប់ថតភាគចុងក្រោយ នៃខ្សែភាពយន្តសម្រាប់កម្មវិធីទូរទស្សន៍ ដោយដើរតួរជាលោកហឺឃីលី ភយរ៉ត(Hercule Poirot) ជាអ្នកស៊ើបអង្កេតប៊ែលហ្សិក និងជាមនុស្សជាទីស្រឡាញ់ របស់កញ្ញា អាហ្កាថា គ្រីស្ទី(Agatha Christie) ហើយក៏បានសម្តែងនៅលើឆាកផងដែរ។ ពេលនោះ ជាពេលដែលគាត់មានការសម្តែងជា “តួអង្គសំខាន់បំផុត ក្នុងជីវិតគាត់”។ ក្នុងអំឡុងពេលដ៏មមាញឹកនោះ គាត់ក៏បានថតសម្លេងអានព្រះគម្ពីរប៊ីបទាំងមូល ពីកណ្ឌលោកុប្បត្តិ ដល់កណ្ឌវិវរណៈ ដែលជាសរុប មាន៧៥២៧០២ពាក្យ និងចំណាយពេល២០០ម៉ោង។ លោកស៊ូឈែតបានទទួលជឿព្រះយេស៊ូវ បន្ទាប់ពីគាត់បានអានកណ្ឌគម្ពីររ៉ូម នៅក្នុងព្រះគម្ពីរមួយក្បាល ដែលគាត់បានឃើញ នៅក្នុងបន្ទប់សណ្ឋាគារ។ គាត់ក៏បានហៅគម្រោងនោះថា ការសម្រេចក្តីបំណងធំដែលគាត់មាន ២៧ឆ្នាំហើយ។ គាត់មានអារម្មណ៍ថា គាត់បានទទួលការបណ្តាលចិត្ត។ គាត់បានធ្វើការសិក្សាស្រាវជ្រាវជាច្រើន បានជាគាត់មិនបង្អង់យូរ ហើយក៏បានចាប់ផ្តើមធ្វើការបម្រើព្រះតែម្តង។ បន្ទាប់មក គាត់ក៏បានបរិច្ចាគប្រាក់ខែរបស់គាត់។ ការដែលគាត់បានថតសម្លេងអានព្រះគម្ពីរ ក្នុងពេលដ៏មមាញឹក គឺជាគំរូដែលបានបណ្តាលចិត្តអ្នកដទៃ ឲ្យថ្វាយសិរីល្អដល់ព្រះ ដោយប្រើអំណោយទានរបស់ខ្លួន ដើម្បីបម្រើព្រះ និងអ្នកដទៃ។ សាវ័ក ពេត្រុសបានជំរុញអ្នកជឿព្រះ នៅសតវត្សរ៍ទី១ ឲ្យធ្វើជាអ្នកបម្រើល្អដូចនេះផងដែរ។ ពួកគេកំពុងជួបការបៀតបៀន ដោយសារពួកគេថ្វាយបង្គំព្រះយេស៊ូវ តែមិនព្រមថ្វាយបង្គំស្តេចសេសារ ដូចនេះ គាត់ក៏បានលើកទឹកចិត្តពួកគេឲ្យផ្តោតទៅលើការរស់នៅថ្វាយព្រះ ដោយប្រើអំណោយទានខាងវិញ្ញាណរបស់ខ្លួន។ គាត់មានប្រសាសន៍ថា “បើអ្នកណាអធិប្បាយ នោះត្រូវតែអធិប្បាយ ដូចជាអ្នកដែលបញ្ចេញព្រះបន្ទូលនៃព្រះ”(១ពេត្រុស ៤:១១)។ យើងអាចប្រើអំណោយទានទាំងអស់ដែលយើងមាន ដើម្បីឲ្យព្រះបានថ្កើងឡើងក្នុងគ្រប់ការទាំងអស់ ដោយសារព្រះយេស៊ូវគ្រីស្ទ។ លោកស៊ូឈែតបានថ្វាយអំណោយទានរបស់គាត់ដល់ព្រះ។ យើងក៏អាចធ្វើដូចគាត់ផងដែរ។ ទោះព្រះទ្រង់បានប្រទានអ្វីក៏ដោយ ចូរយើងប្រើអំណោយទាន និងលទ្ធភាពទាំងនោះ ឲ្យបានល្អ ដើម្បីថ្វាយសិរីល្អដល់ព្រះអង្គ។—Patricia Raybon តើអ្នកមានទេពកោសល្យ និងអំណោយទានអ្វីខ្លះ ដែលព្រះទ្រង់បានប្រទាន? តើអ្នកអាចប្រើអំណោយទានទាំងនោះ យ៉ាងដូចម្តេច ដើម្បីថ្វាយសិរីល្អដល់ព្រះ? ឱព្រះវរបិតា ដែលគង់នៅស្ថានសួគ៌ ពេលខ្លះ ទូលបង្គំបានខ្ជះខ្ជាយអំណោយទាន និងទេពកោសល្យរបស់ទូលបង្គំ។ សូមព្រះអង្គជួយសម្រួចការប្តេជ្ញាចិត្តរបស់ទូលបង្គំឲ្យកាន់តែមុតស្រួច ដើម្បីឲ្យទូលបង្គំប្រើប្រាស់អំណោយទានដែលព្រះអង្គប្រទានឲ្យបានល្អ ដើម្បីឲ្យលោកិយបានសរសើរដំកើងព្រះអង្គ។ To learn more about your personality and gifting, visit ChristianUniversity.org/SF108. គម្រោងអានព្រះគម្ពីររយៈពេល១ឆ្នាំ : ជនគណនា ២៦-២៧ និង ម៉ាកុស ៨:១-២១