ព្រឹត្តិការណ៍ដែលផ្លាស់ប្តូរអ្វីៗគ្រប់យ៉ាង
ដោយWinn Collier
April 17, 2022
ព្រះគ្រីស្ទទ្រង់មានព្រះជន្មរស់ពីស្លាប់ឡើងវិញជាពិត ជាផលដំបូងពីពួកអ្នកដែលបានដេកលក់ទៅហើយ។ ១កូរិនថូស ១៥:២០ លោកយ៉ារ៉ូស្លាវ ផេលីកាន(Jaroslav Pelikan) ជាសាស្រ្តាចារ្យនៅសកលវិទ្យាល័យយេល អស់ជាច្រើនឆ្នាំ ហើយគេបានចាត់ទុកគាត់ ក្នុងចំណោមអ្នកនិពន្ធឈានមុន ក្នុងជំនាន់របស់គាត់ ក្នុងប្រវត្តិសាស្រ្តគ្រីស្ទបរិស័ទ។ គាត់ក៏មានឈ្មោះល្បី ដោយសារអាជីពក្នុងវិស័យអប់រំ អស់ពេលជាយូរ។ គាត់បានបោះពុម្ភសៀវភៅជាង ៣០មុខ ហើយក៏បានទទួលពានរង្វាន់សម្រាប់ការនិពន្ធសៀវភៅច្រើនមុខ។ ទោះជាយ៉ាងណាក៏ដោយ សិស្សរបស់គាត់ម្នាក់បានរំឭក អំពីពាក្យសំខាន់បំផុតរបស់គាត់ ដែលមានប្រសាសន៍ មុនពេលគាត់លាចាកលោក នៅលើគ្រែថា “បើព្រះគ្រីស្ទមានព្រះជន្មរស់ឡើងវិញ នោះអ្វីៗផ្សេងទៀតមិនសំខាន់ទេ ហើយបើព្រះគ្រីស្ទមិនមានព្រះជន្មរស់ឡើងវិញ នោះអ្វីផ្សេងទៀតក៏មិនសំខាន់ដែរ”។ ពាក្យសម្តីនេះបានធ្វើឲ្យខ្ញុំនឹកចាំ អំពីការបង្រៀនរបស់សាវ័កប៉ុល ក្នុងបទគម្ពីរដែលចែងថា “បើព្រះគ្រីស្ទមិនបានរស់ឡើងវិញ នោះដំណឹងដែលយើងខ្ញុំផ្សាយនេះ ជាការឥតប្រយោជន៍ទទេ ហើយសេចក្តីជំនឿរបស់អ្នករាល់គ្នា ក៏ឥតអំពើដែរ”(១កូរិនថូស ១៥:១៤)។ សាវ័កប៉ុលហ៊ាននិយាយដូចនេះ ព្រោះគាត់ដឹងថា ការមានព្រះជន្មរស់ឡើងវិញរបស់ព្រះគ្រីស្ទ មិនមែនជាការអស្ចារ្យ ដែលកើតឡើង សម្រាប់តែមួយពេលនោះទេ តែជាព្រឹត្តិការណ៍ដ៏ជោគជ័យបំផុត នៃព្រះរាជកិច្ចប្រោសលោះរបស់ព្រះ ក្នុងប្រវត្តិសាស្ត្រមនុស្សជាតិ។ ព្រះបន្ទូលដែលសន្យា អំពីការមានព្រះជន្មរស់ឡើងវិញ មិនគ្រាន់តែជាការធានាថា ព្រះយេស៊ូវនឹងមានព្រះជន្មរស់ឡើងវិញប៉ុណ្ណោះឡើយ តែក៏ជាការបញ្ជាក់ថា អ្វីផ្សេងទៀតដែលស្លាប់ និងប្រេះបែក (ជីវិត អ្នកជិតខាង និងទំនាក់ទំនង) នឹងមានជីវិតឡើងវិញ តាមរយៈព្រះគ្រីស្ទ។ ទោះជាយ៉ាងណាក៏ដោយ សាវ័កប៉ុលដឹងថា បើព្រះយេស៊ូវមិនបានមានព្រះជន្មរស់ឡើងវិញទេ នោះសេចក្តីស្លាប់ និងសេចក្តីហិនវិនាសនឹងមានជ័យជម្នះ។ ប៉ុន្តែ ជាការពិតណាស់ ព្រះគ្រីស្ទពិតជាមានព្រះជន្មរស់ឡើងវិញ(ខ.២០)។ ព្រះដ៏មានជ័យជម្នះបានវាយបំបាក់សេចក្តីស្លាប់ ឲ្យបរាជ័យហើយ។ ហើយព្រះយេស៊ូវជា “ផលដំបូង” នៃជីវិតមនុស្សទាំងអស់ដែលនឹងរស់ឡើងវិញ។ ព្រះអង្គបានឈ្នះសេចក្តីអាក្រក់ និងសេចក្តីស្លាប់ ដើម្បីឲ្យយើងអាចរស់នៅដោយចិត្តក្លាហាន និងសេរីភាព។ ការមានព្រះជន្មឡើងវិញបានផ្លាស់ប្តូរអ្វីៗគ្រប់យ៉ាង។—Winn Collier តើការយល់ដឹងអំពីក្តីសង្ឃឹមដ៏មានតម្លៃ នៃការមានព្រះជន្មឡើងវិញរបស់ព្រះយេស៊ូវ បាននាំឲ្យមានការផ្លាស់ប្តូរអ្វីខ្លះ? តើផ្នែកណាខ្លះ ក្នុងជីវិតអ្នកត្រូវការការស្តាឡើងវិញ? ឱព្រះអម្ចាស់ សូមព្រះអង្គជួយទូលបង្គំឲ្យយល់ច្បាស់ អំពីការផ្លាស់ប្រែដែលកើតឡើង ក្នុងជីវិតទូលបង្គំ ដោយសារការមានព្រះជន្មរស់ឡើងវិញ ក្នុងពេលសព្វថ្ងៃ និងជារៀងរហូត។ គម្រោងអានព្រះគម្ពីររយៈពេល១ឆ្នាំ : ២សាំយ៉ូអែល ១-២ និង លូកា ១៤:១-២៤