អ្នកបម្រើ នៅពេលយប់

សូម​ឲ្យ​ព្រះយេហូវ៉ា ដែល​ទ្រង់​បង្កើត​ផ្ទៃ​មេឃ និង​ផែនដី ទ្រង់​ប្រទាន​ពរ​ដល់​អ្នក​រាល់​គ្នា ពី​ក្រុង​ស៊ីយ៉ូន​មក​ផង។ ទំនុកដំកើង ១៣៤:៣

នៅ​ម៉ោង​៣​រំលង​អាធ្រាត្រ នៅ​មន្ទីរ​ព្យាបាល​ជំងឺ​កំរិត​ធ្ងន់ អ្នក​ជំងឺ​ម្នាក់​ដែល​កំពុង​មាន​ការ​ព្រួយ​បារម្ភ បាន​ចុច​ប៊ូតុង​ហៅ​គ្រូពេទ្យ​៤​ដង ក្នុង​រយៈ​ពេល១ម៉ោង។ អ្នក​គ្រូ​ពេទ្យ​ដែល​នៅ​ប្រចំា​ការ​ពេល​យប់ ក៏​បាន​ឆ្លើយ​តប ដោយ​គ្មាន​ការ​រអ៊ូរទាំ។ មិន​យូរ​ប៉ុន្មាន អ្នក​ជំងឺ​ម្នាក់​ទៀត ក៏​បាន​ស្រែក​ឡើង ដើម្បី​ឲ្យ​មាន​គេ​មក​មើល​ខ្លួន។ អ្នក​គ្រូ​ពេទ្យ​មិន​មាន​ការ​ភ្ញាក់​ផ្អើល​ទាល់​តែ​សោះ។ នាង​បាន​ស្នើ​សុំ​ឲ្យ​នាង​បាន​ធ្វើ​ការ​ពេល​យប់ តាំង​ពី​៥​ឆ្នាំ​មុន ដើម្បី​ជៀស​វាង​ភាព​រញ៉េរញ៉ៃ​នៅ​ពេល​ថ្ងៃ។ បន្ទាប់​មក នាង​ក៏​បាន​ស្គាល់​ធាតុ​ពិត​នៃ​វេន​យាម​ពេល​យប់។ ការ​ធ្វើការ​ពេល​យប់​នៅ​មន្ទីរ​ពេទ្យ ជា​ញឹក​ញាប់ គឺ​មាន​ន័យ​ថា នាង​ត្រូវ​ធ្វើ​កិច្ចការ​បន្ថែម​ដោយ​ខ្លួន​ឯង ដែល​មាន​ដូច​ជា​ការ​លើក និង​ផ្អៀង​ខ្លួន​អ្នក​ជំងឺ​ជា​ដើម។ ហើយ​ក៏​មាន​ន័យ​ថា នាង​ត្រូវ​តាម​ដាន​ស្ថានភាព​របស់​អ្នក​ជំងឺ​យ៉ាង​ផ្ចិត​ផ្ចង់ ដើម្បី​ធ្វើ​ការ​កត់​ត្រា សម្រាប់​វេជ្ជ​បណ្ឌិត ក្នុង​ពេល​សង្គ្រោះ​បន្ទាន់។

ទោះ​នាង​បាន​ជំនួយ​ពី​មិត្ត​ភាព​ដ៏​ជិត​ស្និទ្ធ​ជា​មួយ​មិត្ត​រួម​ការងារ​នៅ​ពេល​យប់​ក៏​ដោយ ក៏​នាង​នៅ​តែ​ពិបាក​គេង​ឲ្យ​បាន​គ្រប់​គ្រាន់។ ជា​ញឹក​ញាប់ នាង​បាន​សុំ​ឲ្យ​ពួក​ជំនុំ​នាង​អធិស្ឋាន​ឲ្យ​នាង ដោយ​មើល​ឃើញ​សារៈសំខាន់​នៃ​ការងារ​របស់​នាង។ នាង​ក៏​បាន​និយាយ​ថា “សូម​សរសើរ​ដំកើង​ព្រះ​អង្គ។ ការ​អធិស្ឋាន​របស់​ពួក​គេ​បាន​នាំ​មក​នូវ​ការ​ផ្លាស់​ប្តូរ”។

ការ​សរសើរ​ដំកើង​របស់​នាង ​គឺ​ជា​ទង្វើ​ដ៏​ល្អ និង​ត្រឹម​ត្រូវ សម្រាប់​អ្នក​ធ្វើ​ការ​ពេល​យប់ ក៏​ដូចជា​សម្រាប់​យើង​រាល់​គ្នា។ គឺ​ដូច​ដែល​អ្នក​និពន្ធ​បទ​គម្ពីរ​ទំនុក​ដំកើង​បាន​សរសេរ​ថា “នែ អស់​អ្នក​បំរើ​របស់​ព្រះយេហូវ៉ា ដែល​ឈរ​នៅ​ក្នុង​ដំណាក់​ទ្រង់

នៅ​ពេល​យប់​អើយ ចូរ​ថ្វាយ​ពរ​ដល់​ព្រះយេហូវ៉ា​ចុះ ចូរ​ប្រណម្យ​ដៃ​ទៅ​ឯ​ទី​បរិសុទ្ធ ហើយ​សូម​ឲ្យ​ព្រះយេហូវ៉ា​បាន​ព្រះពរ​ចុះ”(ទំនុកដំកើង ១៣៤:១-២)។

បទ​គម្ពីរ​ទំនុក​ដំកើង​នេះ ត្រូវ​បាន​សរសេរ​ឡើង សម្រាប់​ពួក​លេវី ដែល​ធ្វើ​ការ​ជា​អ្នក​យាម​ព្រះ​វិហារ ដោយ​ទទួល​ស្គាល់​ថា ការងារ​របស់​ពួក​គេ​មាន​សារៈ​សំខាន់​ណាស់ ដោយ​ពួកគេ​កំពុង​ការពារ​ព្រះ​វិហារ ទាំង​យប់​ថ្ងៃ។ ក្នុង​ពិភព​លោក ដ៏​មមាញឹក​សព្វ​ថ្ងៃ យើង​អាច​ចែក​ចាយ​បទ​គម្ពីរ​ទំនុក​ដំកើង​នេះ ដល់​អ្នក​ធ្វើ​ការ​ពេល​យប់​ជា​ពិសេស តែ​យើង​ម្នាក់​ៗ​អាច​សរសើរ​ដំកើង​ព្រះ នៅ​ពេល​យប់។ គឺ​ដូច​ដែល​បទ​គម្ពីរ​ទំនុក​ដំកើង​នេះ​បាន​ចែង​ទៀត​ថា “សូម​ឲ្យ​ព្រះយេហូវ៉ា ដែល​ទ្រង់​បង្កើត​ផ្ទៃ​មេឃ និង​ផែនដី ទ្រង់​ប្រទាន​ពរ​ដល់​អ្នក​រាល់​គ្នា ពី​ក្រុង​ស៊ីយ៉ូន​មក​ផង”(ខ.៣)។—Patricia Raybon

ពេល​ដែល​អ្នក​គិត​ដល់​អ្នក​ធ្វើ​ការ​ពេល​យប់ ​មាន​គ្រូពេទ្យ អ្នក​បោស​សម្អាត អ្នក​សង្រ្គោះ​បន្ទាន់ និង​អ្នក​ដទៃ​ទៀត តើ​អ្នក​អាច​អធិស្ឋាន​ដូចម្តេច​ខ្លះ​សម្រាប់​ពួក​គេ? តើ​ការ​សរសើរ​ដំកើង​ព្រះ អាច​នាំឲ្យ​អ្នក​ធ្វើ​ការ​ពេល​យប់​អាច​ទទួល​ព្រះ​ពរ​ពី​ព្រះ ដោយ​របៀប​ណា?

ឱ​ព្រះ​អម្ចាស់ នៅ​ពេល​យប់​ដែល​ទូល​បង្គំ​កំពុង​គេង សូម​ព្រះអង្គ​ប្រទាន​ពរ​ដល់​អ្នក​ធ្វើ​ការ​ពេល​យប់ ដែល​កំពុង​ធ្វើ​កិច្ចការ​ដ៏​សំខាន់ ក្នុង​សង្គម​ទូល​បង្គំ។ សូម​ព្រះ​អង្គ​ជួយ​ទូល​បង្គំ​សរសើរ​ដំកើង​ព្រះ​អង្គ នៅ​ពេល​យប់។

គម្រោងអានព្រះគម្ពីររយៈពេល១ឆ្នាំ : ១ពង្សាវតាក្សត្រ ៨-៩ និង លូកា ២១:១-១៩

Share this post:
Facebook
Twitter
LinkedIn
WhatsApp

From the same category:

More articles