ទ្រង់នឹងសោយរាជ្យនៅអស់កល្បជានិច្ចរៀងរាបតទៅ។ វិវរណៈ ១១:១៥
លោកហ៊ែនឌែល(Handel) បានចំណាយពេល២៤ថ្ងៃ ដើម្បីនិពន្ធទំនុកភ្លេងមួយ សម្រាប់ប្រគំជាក្រុម មានចំណងជើងថា ព្រះមែស៊ី ។ នេះជារឿងដែលគួរឲ្យភ្ញាក់ផ្អើល ក្នុងវិស័យតន្ត្រី។ ទំនុកភ្លេងនេះប្រហែលជាទំនុកភ្លេងដែលល្បីល្បាញបំផុត ក្នុងពិភពលោក ដែលគេបានយកមកប្រគំរាប់ពាន់ដង នៅទូទាំងពិភពលោក ជារៀងរាល់ឆ្នាំ។ ទំនុកភ្លេងដ៏អស្ចារ្យនេះបានឈានដល់កំរិតកំពូល បន្ទាប់ពីគេចាប់ផ្តើមប្រគំ “បទខ្លីហាលេលូយ៉ា” ដែលជាផ្នែកសំខាន់បំផុតរបស់វា បានជិតពីរម៉ោង។
ខណៈពេលដែលអ្នកផ្លុំត្រែ និងអ្នកវាយស្គរធំចាប់ផ្តើមប្រគុំបទខ្លីនោះ ក្រុមចម្រៀងក៏បានច្រៀងព្រមគ្នា ដោយសម្លេងជាច្រើនស្រទាប់ នូវពាក្យពេចន៍ដែលមានចែងក្នុងបទគម្ពីរវិវរណៈ ១១:១៥ ថា ៖ “ទ្រង់នឹងសោយរាជ្យនៅអស់កល្បជានិច្ចរៀងរាបតទៅ”(វិវរណៈ ១១:១៥)។ នេះជាការប្រកាសនៃជ័យជម្នះ អំពីក្តីសង្ឃឹមថា នឹងបានរស់នៅអស់កល្បជានិច្ច ជាមួយព្រះយេស៊ូវ។
ពាក្យពេចន៍ជាច្រើន ដែលគេប្រើក្នុងទំនុកភ្លេងមានចំណងជើងថា ព្រះមែស៊ី គឺមានប្រភពមកពីកណ្ឌគម្ពីរវិវរណៈ ដែលក្នុងនោះ សាវ័កយ៉ូហានបានទទួលការបើកសម្ដែង ពេលគាត់ជិតដល់ចុងបញ្ចប់នៃជីវិតគាត់ ដោយពិពណ៌នា អំពីព្រឹត្តិការណ៍ដែលត្រូវកើតឡើង មុនពេលព្រះគ្រីស្ទយាងមកវិញ។ ក្នុងកណ្ឌវិវរណៈ លោកយ៉ូហានបានងាកមកនិយាយ ម្តងហើយម្តងទៀត អំពីប្រធានបទនៃការយាងមកវិញនៃព្រះយេស៊ូវ ដែលបានមានព្រះជន្មរស់ឡើងវិញ គឺនៅពេលដែលមានសម្លេងច្រៀងជាក្រុម ដោយអំណរដ៏អស្ចារ្យ(១៩:១-៨)។ ពិភពលោកនឹងអរសប្បាយ ព្រោះព្រះយេស៊ូវនឹងវាយបំបាក់អំណាចនៃភាពងងឹត និងសេចក្តីស្លាប់ ហើយបង្កើតនគរនៃសេចក្តីសុខសាន្ត។
ថ្ងៃមួយ មនុស្សទាំងអស់នៅស្ថានសួគ៌ នឹងច្រៀងទាំងអស់គ្នា ក្នុងក្រុមចម្រៀងដ៏ធំសម្បើម ដោយប្រកាស អំពីភាពឧត្តុង្គឧត្តមនៃព្រះយេស៊ូវ និងព្រះពរនៃរាជ្យដ៏អស់កល្បរបស់ព្រះអង្គ(៧:៩)។ ទំរាំតែពេលនោះមកដល់ ចូរយើងរស់នៅ ធ្វើការងារ អធិស្ឋាន និងរង់ចាំព្រះអង្គដោយក្តីសង្ឃឹម។—LISA M. SAMRA
តើការយាងមកវិញរបស់ព្រះយេស៊ូវ ដើម្បីគ្រងរាជ្យលើផែនដី បានផ្តល់ឲ្យអ្នកនូវក្តីសង្ឃឹម ដូចម្តេចខ្លះ? តើមានបទចម្រៀងអ្វីដែលបានលើកទឹកចិត្តអ្នក ដោយការរំឭកអំពីភាពឧត្តុង្គឧត្តមនៃព្រះយេស៊ូវ?
ឱព្រះយេស៊ូវ សូមព្រះអង្គឆាប់យាងមកវិញ ដើម្បីតាំងរាជ្យព្រះអង្គនៅលើផែនដី។
To learn more about understanding the book of Revelation, visit ODBU.org/NT030.
គម្រោងអានព្រះគម្ពីរយៈពេល១ឆ្នាំ : សុភាសិត ២៥-២៦ និង ២កូរិនថូស ៩
