តែអ្នកណាដែលពិនិត្យមើលក្នុងក្រឹត្យវិន័យដ៏គ្រប់លក្ខណ៍ គឺជាក្រឹត្យវិន័យខាងឯសេរីភាព ហើយក៏ជាប់ចិត្តចំពោះ… អ្នកនោះនឹងមានពរក្នុងគ្រប់ទាំងការដែលខ្លួនធ្វើទាំងប៉ុន្មាន។ យ៉ាកុប ១:២៥
អ្នកជំនាញផ្នែកចិត្តសាស្ត្របានធ្វើតេស្ត អំពីការស្គាល់ខ្លួនឯង ដោយសួរក្មេងៗថា “តើនរណានៅក្នុងកញ្ចក់?” តាមធម្មតា ក្មេងដែលមានអាយុក្រោម១៨ខែ មិនស្គាល់រូបខ្លួនឯង នៅក្នុងកញ្ចក់ឆ្លុះមុខនោះឡើយ។ តែពេលដែលក្មេងៗលូតលាស់កាន់តែធំ ពួកគេកំពុងតែមើលរូបខ្លួនឯង នៅក្នុងកញ្ចក់ឆ្លុះមុខ។ ការស្គាល់ខ្លួនឯង ជាកំណត់សំគាល់ដ៏សំខាន់ នៃការលូតលាស់ និងមានភាពពេញវ័យដ៏ល្អ។
ការនេះក៏សំខាន់ចំពោះការលូតលាស់របស់អ្នកជឿព្រះយេស៊ូវ ផងដែរ។ សាវ័កយ៉ាកុបបានលើកឡើង អំពីការឆ្លុះកញ្ចក់មើលមុខខ្លួនឯងផងដែរ។ កញ្ចក់ គឺជា “ព្រះបន្ទូលនៃសេចក្តីពិត” មកពីព្រះ(យ៉ាកុប ១:១៨)។ ពេលណាយើងអានព្រះគម្ពីរ តើយើងមើលឃើញអ្វី? ពេលយើងអានខគម្ពីរដែលនិយាយអំពីសេចក្តីស្រឡាញ់ និងការបន្ទាបខ្លួន តើយើងមើលឃើញខ្លួនយើងមានសេចក្តីស្រឡាញ់ និងការបន្ទាបខ្លួនឬទេ? ពេលយើងអានព្រះរាជបញ្ជារបស់ព្រះ តើយើងឃើញថា ខ្លួនយើងបានប្រព្រឹត្តតាមព្រះរាជបញ្ជារបស់ព្រះអង្គហើយឬនៅ? ពេលយើងពិនិត្យមើលចិត្តខ្លួនឯង ហើយពិនិត្យមើលការប្រព្រឹត្តរបស់យើង ព្រះគម្ពីរអាចជួយយើងឲ្យដឹងថា ការប្រព្រឹត្តរបស់យើងមានភាពសមស្របតាមបំណងព្រះទ័យ ដែលព្រះទ្រង់មានសម្រាប់យើងឬទេ ពុំនោះទេ តើយើងត្រូវស្វែងរកការប្រែចិត្ត និងការផ្លាស់ប្រែដែរឬទេ។
កណ្ឌគម្ពីរយ៉ាកុបបានដាស់តឿនយើងថា “ចូរឲ្យអ្នករាល់គ្នាប្រព្រឹត្តតាមព្រះបន្ទូលទៅ កុំឲ្យគ្រាន់តែស្តាប់ប៉ុណ្ណោះ ហើយបញ្ឆោតខ្លួនវិញ”(ខ.២២) ដោយភ្លេចព្រះបន្ទូលដែលយើងបានអាននោះឡើយ។ ព្រះគម្ពីរបានផ្តល់ឲ្យយើងនូវក្បួនសម្រាប់រស់នៅ ដោយប្រាជ្ញា ស្របតាមផែនការព្រះ។ ពេលណាយើងអាន និងជញ្ជឹងគិតព្រះបន្ទូល ហើយអនុញ្ញាតឲ្យព្រះបន្ទូលធ្វើការក្នុងជីវិតយើង យើងអាចទូលសូមព្រះអង្គ ឲ្យបើកភ្នែកយើង ឲ្យមើលឃើញសណ្ឋាននៃចិត្តរបស់យើងច្បាស់ ហើយសូមកម្លាំងពីព្រះអង្គ ដើម្បីធ្វើការកែប្រែតាមដែលចាំបាច់។—KATARA PATTON
តើអ្នកមើលឃើញអ្វី ពេលដែលអ្នកមើលទៅក្នុងកញ្ចក់នៃព្រះគម្ពីរ? តើអ្នកចាំបាច់ត្រូវធ្វើការផ្លាស់ប្តូរអ្វីខ្លះ?
ឱព្រះអម្ចាស់ សូមព្រះអង្គជួយទូលបង្គំឲ្យប្រើព្រះគម្ពីរ ជាកញ្ចក់ឆ្លុះមើលជីវិត បំណងចិត្ត និងការប្រព្រឹត្តរបស់ទូលបង្គំ។
To better understand who you are, visit ODBU.org/SF108.
គម្រោងអានព្រះគម្ពីររយៈពេល១ឆ្នាំ : អេសាយ ១៧-១៩ និង អេភេសូរ ៥:១៧-៣៣
