កុំហៅខ្ញុំថាន៉ាអូមីឡើយ ត្រូវហៅថាម៉ារ៉ាវិញ ដ្បិតព្រះដ៏មានគ្រប់ទាំងព្រះចេស្ដា ទ្រង់បានប្រព្រឹត្តនឹងខ្ញុំដោយជូរល្វីងណាស់។ នាងរស់ ១:២០
អ្នកស្រីជែន(Jen) បានរៀបការម្តងទៀត បន្ទាប់ពីស្វាមីទីមួយបានស្លាប់។ កូនៗរបស់ប្តីក្រោយ មិនដែលស្វាគមន៍នាងទេ ហើយពេលនេះ គាត់ក៏បានស្លាប់ដែរ ដូចនេះ ពួកគេស្អប់នាង ដោយមិនចង់ឲ្យនាងរស់នៅក្នុងផ្ទះដែលពួកគេបានរស់នៅតាំងពីក្មេងនោះទេ។ ប្តីក្រោយបានបន្សល់ទុកប្រាក់បន្តិចបន្តួច សម្រាប់នាង តែកូនៗរបស់គាត់បាននិយាយថា នាងកំពុងតែលួចកេរមរដករបស់ពួកគេ។ អ្នកស្រីជែនមានការបាក់ទឹកចិត្ត ហើយក៏កើតមានចិត្តជូរល្វីង។
ប្តីរបស់អ្នកស្រីណាអូមីបាននាំក្រុមគ្រួសារគាត់ ទៅរស់នៅក្នុងស្រុកម៉ូអាប់ ដែលនៅទីនោះ គាត់និងកូនប្រុសគាត់ទាំងពីរនាក់ក៏បានស្លាប់។ ប៉ុន្មានឆ្នាំក្រោយមក អ្នកស្រីណាអូមីក៏បានក៏បានវិលត្រឡប់ទៅភូមិបេថ្លេហិមវិញ ដោយមិនមានទ្រព្យសម្បត្តិអ្វីជាប់ខ្លួន លើកលែងតែនាងរស់ ជាកូនប្រសារប៉ុណ្ណោះ ដែលមកជាមួយនាង។ អ្នកភូមិមានការរំជួលចិត្ត ហើយក៏បានសួរនាងថា “នេះតើជាណាអូមីមែនឬអី?”(នាងរស់ ១:១៩)។ នាងប្រាប់ពួកគេ ឲ្យឈប់ហៅឈ្មោះនេះទៀត តែត្រូវហៅនាងថា “ម៉ារ៉ា” ដែលមានន័យថា “ជូរល្វីង” នាងក៏បានពន្យល់ថា “ដ្បិតព្រះដ៏មានគ្រប់ទាំងព្រះចេស្តា ទ្រង់បានប្រព្រឹត្តនឹងនាងដោយជូរល្វីងណាស់ ខ្ញុំបានចេញទៅទាំងពោរពេញ តែព្រះយេហូវ៉ាបាននាំខ្ញុំឲ្យត្រឡប់វិលមកដោយទទេវិញ”(ខ.២០-២១)។
តើឈ្មោះអ្នកមានន័យថា “ជូរល្វីង” ដែរឬទេ? អ្នកបានជួបការខកចិត្ត ដោយសារមិត្តភក្តិ ក្រុមគ្រួសារ ឬបញ្ហាសុខភាពដែលកំពុងអន់ខ្សោយ។ អ្នកគិតថា អ្នកសមនឹងទទួលអ្វីដែលល្អជាងនេះ។ តែអ្នកមិនបានដូចចិត្ត។ ឥឡូវនេះ អ្នកមានចិត្តល្វីងជូរចត់។
នាងណាអូមីបានវិលត្រឡប់មកភូមិបេថ្លេហិមវិញ ដោយចិត្តជូរល្វីង តែព្រះទ្រង់ក៏បានប្រោសចិត្តនាងឲ្យបានជាវិញ។ អ្នកក៏អាចវិលត្រឡប់មកផ្ទះវិញផងដែរ គឺវិលមកព្រះយេស៊ូវ ជាកូនចៅជំនាន់ក្រោយរបស់នាងរស់ ដែលបានប្រសូតនៅភូមិបេថ្លេហិម។ សូមចូលមកសម្រាកក្នុងសេចក្តីស្រឡាញ់របស់ព្រះអង្គចុះ។
ព្រះទ្រង់បានជំនួសភាពល្វីងជូរចត់របស់នាងណាអូមី ដោយការសម្រេចផែនការដ៏ឥតខ្ចោះ របស់ព្រះអង្គ(៤:១៣-២២)។ ព្រះអង្គក៏អាចដកភាពល្វីងជូរចត់របស់អ្នកចេញផងដែរ។ សូមត្រឡប់មករកព្រះអង្គវិញ។—MIKE WITTMER
តើឈ្មោះអ្នកមានន័យដូចម្តេច? តើអ្នកត្រូវរស់នៅដូចម្តេចខ្លះ ឲ្យសក្តិសមនឹងអត្តសញ្ញាណដែលអ្នកមាន ក្នុងព្រះយេស៊ូវ?
ឱព្រះវរបិតា ទូលបង្គំសូមវិលត្រឡប់មករកព្រះអង្គវិញ ដើម្បីស្វែងរកការសម្រាក ក្នុងព្រះរាជបុត្រារបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : និក្ខមនំ ៣៤-៣៥ និង ម៉ាថាយ ២២:២៣-៤៦
