ស្វែងរកការសម្រាកក្នុងព្រះយេស៊ូវ
ដោយMarvin Williams
February 28, 2023
អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សំរាក។ ម៉ាថាយ ១១:២៨ វិញ្ញាណដែលនឿយព្រួយ មិនដែលមានភាពស្កប់ស្កល់ ដោយសារទ្រព្យសម្បត្តិ ឬភាពជោគជ័យឡើយ។ នេះជាបញ្ហា ដែលបានកើតឡើងក្នុងជីវិតរបស់តារាចម្រៀងអាមេរិកដ៏ល្បីល្បាញម្នាក់។ បទចម្រៀងរបស់គាត់ ជិត៤០អាល់ប៊ុម ត្រូវបានគេរាប់បញ្ចូល នៅក្នុងចំណោមបទចម្រៀងជនបទ ដែលមានការពេញនិយមបំផុត ក្នុងប្រទេស ហើយក៏បានជាប់ចំណាត់ថ្នាក់លេខមួយជាញឹកញាប់ផងដែរ។ គាត់មានជោគជ័យយ៉ាងខ្លាំង ក្នុងអាជីពជាអ្នកចម្រៀង តែគាត់បានផ្លាស់ប្តូរប្រពន្ធជាញឹកញាប់ ដូចផ្លាស់ប្តូរសំលៀកបំពាក់ ហើយក៏ធ្លាប់ជាប់គុកផងដែរ។ ទោះគាត់មានជោគជ័យច្រើនយ៉ាងណាក៏ដោយ ក៏គាត់ធ្លាប់ពោលទំនួញថា “វិញ្ញាណរបស់ខ្ញុំមានពេញដោយភាពនឿយព្រួយ ដែលខ្ញុំមិនអាចជម្នះបាន ដោយប្រើភាពជោគជ័យ ការរៀបការ ឬការស្វែងរកអត្ថន័យជីវិត ... ភាពនឿយព្រួយនៅតែមាន ហើយចេះតែបន្តមានរហូតដល់ថ្ងៃខ្ញុំស្លាប់”។ គួរឲ្យស្តាយណាស់ ដែលគាត់មិនបានរកឃើញការសម្រាកដ៏ពិត សម្រាប់វិញ្ញាណគាត់ មុនពេលជីវិតគាត់បានបញ្ចប់។ ព្រះយេស៊ូវបានត្រាស់ហៅមនុស្សទាំងអស់ រួមទាំងសិល្បៈករ ដែលកំពុងមានការនឿយព្រួយ ក្នុងអំពើបាប និងផលវិបាកនៃអំពើបាប ឲ្យចូលមករកព្រះអង្គដោយផ្ទាល់ៗខ្លួន។ គឺដូចដែលព្រះអង្គមានបន្ទូលថា “អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សំរាក”(ម៉ាថាយ ១១:២៨)។ បានសេចក្តីថា ពេលណាយើងទទួលសេចក្តីសង្គ្រោះរបស់ព្រះយេស៊ូវ ព្រះអង្គនឹងដកបន្ទុកចេញពីយើង ហើយប្រទានការសម្រាកដល់យើង។ យើងចាំបាច់ត្រូវជឿព្រះអង្គ ហើយបន្ទាប់មក រៀនពីព្រះអង្គនូវរបៀបរស់នៅ ក្នុងជីវិតពេញបរិបូរ ដែលព្រះអង្គបានប្រទាន(យ៉ូហាន ១០:១០)។ ការទទួលនឹមនៃភាពជាសិស្សរបស់ព្រះយេស៊ូវ នាំឲ្យយើងរកឃើញ “ការសម្រាកសម្រាប់វិញ្ញាណយើង”(ម៉ាថាយ ១១:២៩)។ ពេលណាយើងចូលមករកព្រះយេស៊ូវ គឺមិនមានន័យថា ព្រះអង្គឲ្យយើងមានការទទួលខុសត្រូវតិចជាងមុន ឬលែងមានការទទួលខុសត្រូវ ចំពោះព្រះអង្គនោះឡើយ។ ព្រះអង្គប្រទានការសម្រាក សម្រាប់វិញ្ញាណដ៏នឿយព្រួយរបស់យើង ដោយប្រទានយើងនូវសន្តិភាព សម្រាប់វិញ្ញាណនឿយព្រួយ ដោយប្រទានយើងនូវរបៀបរស់នៅថ្មីមួយ ថ្វាយព្រះអង្គ ដែលមានបន្ទុកស្រាលជាងមុន។ ព្រះអង្គប្រទានយើងនូវការសម្រាកពិតប្រាកដ។—MARVIN WILLIAMS
តើពេលនេះ អ្នកកំពុងតែមានអារម្មណ៍នឿយព្រួយ និងមានបន្ទុកធ្ងន់ យ៉ាងណាខ្លះ? តើការសម្រាក ដែលព្រះយេស៊ូវប្រទាន បាននាំឲ្យអ្នកមានអារម្មណ៍ដូចម្តេចខ្លះ?
ឱព្រះយេស៊ូវ សូមព្រះអង្គជួយវិញ្ញាណនឿយព្រួយរបស់ទូលបង្គំ ឲ្យរកឃើញសន្តិភាព និងការសម្រាកក្នុងព្រះអង្គ។
For further study, read The Compassion of Jesus at DiscoverySeries.org/Q0226.
គម្រោងអានព្រះគម្ពីររយៈពេល១ឆ្នាំ : ជនគណនា ២៣-២៥ និង ម៉ាកុស ៧:១៤-៣៧