តើឃើញមានតែសាសន៍ដទៃ១នេះ វិលមកសរសើរដល់ព្រះទេឬ? លូកា ១៧:១៨
មានពេលមួយ លោកហ៊ែនស៊ល ផាចមឹន(Hansle Parchment) ស្ថិតក្នុងស្ថានភាពទាល់ច្រក។ គាត់បានឡើងជិះឡានក្រុង ទៅចូលរួមប្រកួតវគ្គពាក់កណ្តាលផ្តាច់ព្រាត់ ក្នុងការប្រកួតកីឡាអូឡាំពិច នៅទីក្រុងតូក្យូ តែបានទៅដល់ទីកន្លែងខុស។ តែអរព្រះគុណព្រះអង្គគាត់បានជួបកញ្ញាទ្រីចាណា ស្តូកូវិច(Trijana Stojkovic) ជាអ្នកស្ម័គ្រចិត្តជួយអ្នកចូលរួមការប្រកួត នៅថ្ងៃនោះ។ នាងក៏បានឲ្យលុយគាត់ខ្លះ ដើម្បីជិះឡានតាក់ស៊ី។ លោកផាចមឹន ក៏បានទៅដល់កន្លែងប្រកួតទាន់ពេល ហើយទីបំផុត គាត់ទទួលបានមេដាយមាស ក្នុងការប្រកួតរត់ផ្លោះឧបសគ្គចម្ងាយ១១០ម៉ែត្រ។ ក្រោយមក គាត់ក៏បានត្រឡប់ទៅរកកញ្ញាស្តូកូវិចវិញ ហើយក៏បានអរគុណនាង ដែលបានបង្ហាញចិត្តសប្បុរសចំពោះគាត់។
ក្នុងបទគម្ពីរលូកាជំពូក១៧ យើងឃើញថា សាសន៍សាម៉ារីដែលកើតឃ្លង់ បានវិលត្រឡប់មកអរព្រះគុណព្រះយេស៊ូវ បន្ទាប់ពីព្រះអង្គបានប្រោសគាត់ឲ្យជា(ខ.១៥-១៦)។ ព្រះយេស៊ូវបានយាងចូលភូមិមួយ ហើយក៏បានជួបមនុស្សកើតឃ្លង់១០នាក់។ ពួកគេសុទ្ធតែបានសូមឲ្យព្រះអង្គប្រោសពួកគេឲ្យជា ហើយក៏បានទទួលការប្រោសឲ្យជាពីព្រះអង្គ ដោយព្រះគុណ និងព្រះចេស្តា។ ពួកគេទាំង១០នាក់មានការសប្បាយចិត្ត ដែលបានទទួលការប្រោសឲ្យជា។ មានតែម្នាក់ទេដែលបានត្រឡប់មកព្រះយេស៊ូវវិញ ដើម្បីបង្ហាញចេញនូវការដឹងគុណ។ គាត់ក៏បាន “វិលមកវិញ ទាំងសរសើរដំកើងព្រះ ដោយសំឡេងជាខ្លាំង គាត់ទំលាក់ខ្លួនផ្កាប់មុខ នៅទៀបព្រះបាទព្រះយេស៊ូវ ទាំងអរព្រះគុណដល់ទ្រង់ផង”(ខ.១៥-១៦)។
ជារៀងរាល់ថ្ងៃ យើងបានដកពិសោធន៍នឹងព្រះពរព្រះ តាមរបៀបជាច្រើន។ បទពិសោធន៍នោះអាចជាពេលដ៏រំភើបរីករាយ ដែលមានដូចជាពេលដែលព្រះទ្រង់ឆ្លើយតបការអធិស្ឋាន បន្ទាប់ពីបានរងទុក្ខអស់រយៈពេលយូរ ឬពេលដែលយើងទទួលជំនួយទាន់ពេលវេលា ពីមនុស្សដែលយើងមិនស្គាល់ជាដើម។ ជួនកាល ព្រះពរព្រះអង្គអាចមកដល់ តាមរបៀបដ៏សាមញ្ញ ដែលមានដូចជា អាកាសធាតុអំណោយផលដល់ការសម្រេចកិច្ចការ នៅក្រៅផ្ទះជាដើម។ ចូរយើងកុំភ្លេចអរព្រះគុណព្រះអង្គ សម្រាប់សេចក្តីសប្បុរសដែលព្រះអង្គមានចំពោះយើង ដូចបុរសកើតឃ្លង់ជាសាសន៍សាម៉ារីផងដែរ។—POH FANG CHIA
តើអ្នកអាចអរព្រះគុណព្រះអង្គ សម្រាប់អ្វីខ្លះ នៅថ្ងៃនេះ? តើធ្វើដូចម្តេចឲ្យអ្នក អាចមានចិត្តដែលដឹងគុណព្រះអង្គ?
ឱព្រះអម្ចាស់ ព្រះអង្គល្អចំពោះទូលបង្គំណាស់។ ទូលបង្គំសូមអរព្រះគុណព្រះអង្គ នៅថ្ងៃនេះ សម្រាប់……………………………..
គម្រោងអានព្រះគម្ពីររយៈ១ឆ្នាំ : ១ពង្សាវតាក្សត្រ ២១-២២ និង លូកា ២៣:២៦-៥៦
