គួរគប្បីឲ្យខ្ញុំសរសេរផ្ញើមកជូនលោកដោយលំដាប់ដែរ ឱព្រះតេជព្រះគុណថេវភីលអើយ ដ្បិតខ្ញុំបានពិនិត្យពីរឿងទាំងនោះ តាំងតែពីដើមរៀងមក ដោយហ្មត់ចត់ហើយ។ លូកា ១:៣
ស្រ្តីម្នាក់បានប្រាប់ខ្ញុំ អំពីការមិនចុះសម្រុង ដែលកំពុងតែធ្វើឲ្យមានការបែកបាក់ ក្នុងពួកជំនុំរបស់គាត់។ ខ្ញុំក៏បានសួរគាត់ថា “តើពួកគាត់មិនចុះសម្រុងរឿងអ្វី?” គាត់ថា “ ពួកគេប្រកែកគ្នា ដោយសារក្នុងចំណោមពួកគេ មានអ្នកខ្លះប្រកែកថា ផែនដីមានរាងសំប៉ែត មិនមែនមូលទេ”។ ពីរបីខែក្រោយមក ព័ត៌មានបានផ្សាយថា មានបុរសគ្រីស្ទានម្នាក់ បានសម្រុកចូលក្នុងភោជនីដ្ឋានមួយ ប្រដាប់ដោយកាំភ្លើង ដើម្បីសង្គ្រោះក្មេងៗ ដែលគាត់បានសន្និដ្ឋានថា គេកំពុងធ្វើបាបក្មេងៗទាំងនោះ នៅក្នុងបន្ទប់ខាងក្រោយ។ ភោជនីយដ្ឋាននោះមិនមានបន្ទប់ខាងក្រោយទេ ហើយប៉ូលិសក៏បានចាប់ខ្លួនបុរសនោះ។ ក្នុងករណីទាំងពីរនេះ ពួកគេសុទ្ធតែជឿ និងធ្វើនូវរឿងចម្លែកៗ ដោយសារពួកគេបានទទួលការបង្រៀនប្លែក អំពីរឿងអាថ៌កំបាំង នៅតាមបណ្ដាញអ៊ីនធឺណិត។
ព្រះទ្រង់បានត្រាស់ហៅអ្នកជឿព្រះអង្គ ឲ្យធ្វើជាពលរដ្ឋល្អ(រ៉ូម ១៣:១-៧) ហើយពលរដ្ឋល្អមិនផ្សព្វផ្សាយព័ត៌មានក្លែងក្លាយឡើយ។ នៅសម័យលោកលូកា មានពាក្យចចាមអារ៉ាមជាច្រើន ដែលបាននិយាយអំពីព្រះយេស៊ូវ(លូកា ១:១) ដែលក្នុងចំណោមនោះ មានខ្លះមិនមែនជាព័ត៌មានពិតទេ។ លោកលូកាមិនមែនចេះតែផ្សព្វផ្សាយបន្ត អំពីរឿងដែលគាត់បានឮនោះទេ គឺគាត់បានទៅធ្វើការស៊ើបអង្កេត ដោយទៅជជែកជាមួយស្មរបន្ទាល់(ខ.២) និង “ពិនិត្យពីរឿងទាំងនោះ តាំងតែពីដើមរៀងមក ដោយហ្មត់ចត់”(ខ.៣) ហើយក៏បាននិពន្ធកណ្ឌគម្ពីរដំណឹងល្អលូកា ផ្អែកទៅលើអ្វីដែលគាត់បានរកឃើញ ដោយកត់ចុះនូវឈ្មោះ សម្រង់សម្តី ការពិតជាប្រវត្តិសាស្ត្រ ផ្អែកទៅលើមនុស្សដែលបានឃើញផ្ទាល់ គឺមិនមែនផ្អែកទៅលើការអះអាងដែលមិនបានពិនិត្យនោះទេ។
យើងក៏អាចអនុវត្តដូចនេះផងដែរ។ ព័ត៌មានមិនពិត ឬការបង្រៀនខុសឆ្គងអាចធ្វើឲ្យពួកជំនុំបាក់បែក ហើយអាចបណ្តាលឲ្យមានគ្រោះថ្នាក់ដល់ជីវិត ដូចនេះ ការពិនិត្យមើលឲ្យបានច្បាស់ គឺជាសកម្មភាពនៃសេចក្តីស្រឡាញ់ដល់អ្នកជិតខាង(១០:២៧)។ ពេលណាមានរឿង ឬការបង្រៀនប្លែកៗ យើងអាចត្រួតពិនិត្យមើល ឲ្យបានត្រឹមត្រូវ ដោយធ្វើខ្លួនជាអ្នកស្វែងរកសេចក្តីពិត មិនមែនជាអ្នកចែកចាយភាពខុសឆ្គងនោះឡើយ។ ការប្រតិបត្តិដូចនេះ នាំឲ្យគេគិតថា ដំណឹងល្អរបស់ព្រះគ្រីស្ទមានភាពត្រឹមត្រូវ។ សរុបមក យើងថ្វាយបង្គំព្រះមួយអង្គ ដែលមានពេញដោយសេចក្តីពិត(យ៉ូហាន ១:១៤)។—SHERIDAN VOYSEY
ហេតុអ្វីអ្នកគិតថា ដំណឹងក្លែងក្លាយ ឬការបង្រៀនខុសឆ្គង មានការរីករាលដាលឆាប់រហ័ស? តើអ្នកអាចក្លាយជាងអ្នកស្វែងរកសេចក្តីពិត ដោយរបៀបណា?
ឱព្រះវរបិតា សូមព្រះអង្គជួយទូលបង្គំ ឲ្យចេះបែងចែករវាងសេចក្តីពិត និងសេចក្តីខុសឆ្គង តាមការដឹកនាំរបស់ព្រះវិញ្ញាណព្រះអង្គ។
គម្រោងអានព្រះគម្ពីររយៈ១ឆ្នាំ : ២ពង្សាវតាក្សត្រ ៤-៦ និង លូកា ២៤:៣៦-៥៣
