ភីលីព ១:២១-៣០
ខ្ញុំមានសេចក្តីបណ្តាលទាំងសងខាង ក៏មានចិត្តចង់ចេញទៅនៅជាមួយនឹងព្រះគ្រីស្ទ ដែលល្អជាជាងនោះផង តែបើខ្ញុំនៅក្នុងសាច់ឈាមតទៅទៀត នោះមានប្រយោជន៍ដល់អ្នករាល់គ្នាជាជាង។ ភីលីព ១:២៣-២៤
ក្នុងអំឡុងពេលនៃការរីករាលដាលរបស់វីរុសកូរ៉ូណា មនុស្សជាច្រើនបានបាត់បង់មនុស្សជាទីស្រឡាញ់។ នៅថ្ងៃទី២៧ ខែវិច្ឆិកា ឆ្នាំ២០២០ ក្រុមគ្រួសាររបស់ខ្ញុំក៏មានទុក្ខជាទំងន់ផងដែរ នៅពេលដែលអ្នកស្រី ប៊ី ក្រោឌ័រ ជាម្តាយខ្ញុំ បានលាចាកលោក នៅអាយុ៩៥ឆ្នាំ ទោះមិនមែនដោយសារជំងឺកូវីដ១៩ក៏ដោយ។ ពេលនោះ យើងមិនអាចជួបជុំគ្នា ដើម្បីកាន់ទុក្ខ ចំពោះការស្លាប់របស់គាត់ ឬលើកទឹកចិត្តគ្នាទៅវិញទៅមក គឺមិនខុសពីក្រុមគ្រួសារជាច្រើនទៀតឡើយ។ ផ្ទុយទៅវិញ យើងបានប្រើមធ្យោបាយផ្សេងទៀត ដើម្បីរួមគ្នាអបអរឥទ្ធិពលនៃសេចក្តីស្រឡាញ់របស់គាត់ ហើយយើងក៏បានរកឃើញការកម្សាន្តចិត្តដ៏មានន័យ ពីពាក្យផ្តាំផ្ញើរបស់គាត់ ដែលបានបន្តរំឭកយើងថា បើព្រះទ្រង់បានហៅគាត់ទៅនៅជាមួយព្រះអង្គ នោះគាត់បានត្រៀមខ្លួនជាស្រេច ហើយក៏មានចិត្តអន្ទះសារចង់ទៅនៅជាមួយព្រះអង្គផងដែរ។ ក្តីសង្ឃឹមដែលមានទំនុកចិត្តនេះ គឺបានបង្ហាញចេញមកជាញឹកញាប់ នៅក្នុងរបៀបនៃការរស់នៅរបស់ម្តាយខ្ញុំ ក៏ដូចជាក្នុងរបៀបដែលគាត់ប្រឈមមុខដាក់សេចក្តីស្លាប់។
កាលសាវ័កប៉ុលកំពុងប្រឈមមុខដាក់សេចក្តីស្លាប់ គាត់ក៏បានសរសេរក្នុងសំបុត្ររបស់គាត់ថា “ដ្បិតឯខ្ញុំ ដែលខ្ញុំរស់នៅ នោះគឺសំរាប់ព្រះគ្រីស្ទទេ ហើយដែលស្លាប់ទៅ នោះជាកំរៃវិញ … ខ្ញុំមានសេចក្តីបណ្តាលទាំងសងខាង ក៏មានចិត្តចង់ចេញទៅនៅជាមួយនឹងព្រះគ្រីស្ទ ដែលល្អជាជាងនោះផង តែបើខ្ញុំនៅក្នុងសាច់ឈាមតទៅទៀត នោះមានប្រយោជន៍ដល់អ្នករាល់គ្នាជាជាង” (ភីលីព ១:២១,២៣-២៤)។ ទោះគាត់មានបំណងចិត្តដ៏ត្រឹមត្រូវ ចង់បន្តរស់នៅ ដើម្បីជួយអ្នកដទៃក៏ដោយ ក៏ព្រះគ្រីស្ទនៅតែនាំគាត់ទៅនៅជាមួយព្រះអង្គ។
ការមានទំនុកចិត្តយ៉ាងដូចនេះ គឺបានផ្លាស់ប្តូរការយល់ដឹងរបស់យើង អំពីពេលដែលយើងបោះជំហានចេញពីជីវិតនេះ ចូលទៅក្នុងជីវិតក្នុងនគរស្ថានសួគ៌។ ក្តីសង្ឃឹមរបស់យើងអាចផ្តល់ឲ្យនូវការកម្សាន្តចិត្តដ៏អស្ចារ្យ ដល់អ្នកដទៃ ក្នុងរដូវកាលដែលពួកគេកំពុងជួបការបាត់បង់។ ទោះយើងកាន់ទុក្ខចំពោះការបាត់បង់មនុស្សដែលយើងស្រឡាញ់ក៏ដោយ អ្នកជឿព្រះយេស៊ូវមិនសោកសង្រេង ដូចមនុស្សដែលគ្មានសង្ឃឹមនោះឡើយ(១ថែស្សាឡូនិច ៤:១៣)។ អ្នកដែលស្គាល់ព្រះអង្គ ជាមនុស្សដែលមានក្តីសង្ឃឹមពិត។—Bill Crowder
តើអ្នកបានឆ្លើយតបដូចម្តេចខ្លះ ចំពោះបញ្ហាដែលកំពុងគំរាមកំហែង ក្នុងពិភពលោកនេះ? តើការមានសង្ឃឹមនៅក្នុងចិត្តអាចផ្លាស់ប្តូរទស្សនៈរបស់អ្នក អំពីទុក្ខលំបាកក្នុងជីវិតដូចម្តេចខ្លះ?
ឱព្រះនៃសេចក្តីសង្ឃឹមគ្រប់យ៉ាង សូមព្រះអង្គរំឭកទូលបង្គំ អំពីជ័យជម្នះរបស់ព្រះយេស៊ូវ ដែលបានឈ្នះសេចក្តីស្លាប់។
គម្រោងអានព្រះគម្ពីររយៈពេល១ឆ្នាំ : អេសាយ ២៣-២៥ និង ភីលីព ១
