ព្រះយេស៊ូវប្រទានទន្លេជីវិត
ដោយKaren Pimpo
January 29, 2024
និក្ខមនំ ២៣-២៤ និង ម៉ាថាយ ២០:១-១៦
អេសាយ ៣២:១-៨
មើល នឹងមានស្តេច១អង្គសោយរាជ្យដោយសុចរិត ... ដូចផ្លូវទឹកហូរនៅទីហួតហែង។ អេសាយ ៣២:១-២
ខណៈពេលដែលគេកំពុងខួងដីរករ៉ែប្រេងឆៅ ក្នុងប្រទេសមួយ ក្នុងចំណោមប្រទេសដែលមានអាកាសធាតុក្តៅហួតហែងបំផុត នៅលើពិភពលោក ក្រុមការងារនោះមានការភ្ញាក់ផ្អើលយ៉ាងខ្លាំង ពេលដែលបានរកឃើញប្រព័ន្ធទឹកក្រោមដីដ៏ធំសម្បើមមួយ។ ដូចនេះ នៅឆ្នាំ១៩៨៣ គេក៏បានចាប់ផ្តើមអនុវត្តគម្រោង “ទន្លេសប្បនិមិត្ត” ខ្នាតធំ ដោយដាក់ប្រព័ន្ធទុយោទឹក ដើម្បីនាំទឹកមានគុណភាពខ្ពស់ ចូលទៅក្នុងទីក្រុងមួយចំនួន ដែលកំពុងត្រូវការទឹក។ នៅក្បែរកន្លែងដែលគេបង្កើតគម្រោងនេះ មានផ្លាកមួយ ដែលមានអក្សរសរសេរពីលើថា “មានសរសៃឈាមជីវិតហូរចេញពីកន្លែងនេះ”។
ហោរាអេសាយបានប្រើពាក្យប្រៀបប្រដូច អំពីទឹកក្នុងវាលរហោស្ថាន ដើម្បីពិពណ៌នាអំពីក្សត្រដ៏សុចរិតមួយអង្គ ដែលនឹងយាងមក(អេសាយ ៣២)។ ស្តេច ឬអ្នកដឹកនាំដែលគ្រប់គ្រង ដោយសេចក្តីយុត្តិធម៌ និងសេចក្តីសុចរិត គឺប្រៀបដូចជា “ផ្លូវទឹកហូរនៅទីហួតហែង ហើយដូចជាម្លប់នៃថ្មដាយ៉ាងធំនៅទីខ្សោះល្វើយ”(ខ.២)។ អ្នកដឹកនាំខ្លះជ្រើសរើសយកការទទួល ជាជាងការឲ្យ។ ទោះជាយ៉ាងណាក៏ដោយ សញ្ញាសំគាល់របស់អ្នកដឹកនាំដែលថ្វាយព្រះកិត្តិនាមដល់ព្រះ គឺជាអ្នកដែលផ្តល់ឲ្យនូវជម្រក ទីជ្រកកោន ភាពស្រស់ថ្លា និងការការពារ។ កណ្ឌគម្ពីរអេសាយបានចែងថា “ឯការនៃសេចក្តីសុចរិត នោះនឹងបានជាសន្តិសុខ ហើយផលនៃសេចក្តីសុចរិត នោះនឹងបានជាសេចក្តីស្រាកស្រាន្ត និងជាសេចក្តីទុកចិត្តជាដរាបទៅ”(ខ.១៧)។
នៅសម័យក្រោយមក ព្រះបន្ទូលនៃសេចក្តីសង្ឃឹម ក្នុងកណ្ឌគម្ពីរអេសាយក៏បានសម្រេចក្នុងអង្គព្រះយេស៊ូវ ដែលព្រះអង្គបានយាងមកចាប់កំណើត ដើម្បីប្រទានសេចក្តីសង្រ្គោះ ហើយនឹងយាងមកវិញម្តងទៀត ដើម្បីយកយើងទៅនៅជាមួយព្រះអង្គជារៀងរហូត(១ថែស្សាឡូនិច ៤:១៦-១៧)។ ទន្លេសប្បនិមិត្ត គឺជាសមិទ្ធផលរបស់មនុស្ស ដែលថ្ងៃណាមួយ វានឹងរីងស្ងួត។ តែក្សត្រដ៏សុចរិតរបស់យើងបានប្រទានភាពស្រស់ថ្លា និងទន្លេជីវិត ដែលមិនចេះរីងស្ងួតឡើយ។—Karen Pimpo
តើអ្នកត្រូវការព្រះយេស៊ូវប្រទានទន្លេជីវិត នៅកន្លែងណាខ្លះ? តើអ្នកអាចនាំភាពស្រស់ថ្លាដល់អ្នកដទៃ តាមគំរូរបស់ព្រះអង្គ ដូចម្តេចខ្លះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការនាំមកនូវសន្តិភាព តាមរយៈការគ្រងរាជដ៏សុចរិត យ៉ាងល្អឥតខ្ចោះ។
គម្រោងអានព្រះគម្ពីររយៈពេល១ឆ្នាំ : និក្ខមនំ ២៣-២៤ និង ម៉ាថាយ ២០:១-១៦