ព្រឹក
ព្រះនៃសណ្ដាប់ធ្នាប់
ដោយTom Felten
April 13, 2024
លោកុប្បត្តិ ១:១-១០
ឯផែនដីបានខូច ហើយនៅទទេ មានសុទ្ធតែងងឹតនៅគ្របលើជំរៅទឹក ហើយព្រះវិញ្ញាណនៃព្រះក៏រេរានៅពីលើទឹក។ លោកុប្បត្តិ ១:២
លោកសេត(Seth) បានចម្រើនវ័យធំឡើង ក្នុងគ្រួសារដែលមានពេញដោយភាពប្រេះបែក និងភាពវឹកវរ ដូចនេះ ជីវិតគាត់មានពេញដោយភាពរញ៉េរញ៉ៃ។ ម្តាយរបស់គាត់បានទទួលរងអំពើហិង្សាពីឪពុកគាត់ជាប្រចាំ រហូតដល់ពេលដែលឪពុកគាត់បានបញ្ចប់ជីវិតខ្លួនឯង។ មានពេលមួយ លោកសេតចង់បញ្ចប់ជីវិតខ្លួនឯង។ គាត់បានប្រមូលថ្នាំទាំងអស់នៅក្នុងទូដាក់ថ្នាំក្នុងផ្ទះគាត់ ប៉ុន្តែ គាត់ស្រាប់តែនឹកគិតថា តើខ្ញុំនឹងទៅទីណា បន្ទាប់ពីខ្ញុំស្លាប់ទៅ? ដោយសារព្រះគុណព្រះ លោកសេតមិនបានស្លាប់នៅថ្ងៃនោះទេ។ ហើយក្រោយមក បន្ទាប់ពីគាត់បានរៀនព្រះគម្ពីរប៊ីបជាមួយមិត្តភក្តិម្នាក់ គាត់ក៏បានទទួលជឿព្រះយេស៊ូវជាព្រះអង្គសង្គ្រោះ។ ការមើលឃើញសម្រស់ និងសណ្ដាប់ធ្នាប់នៅក្នុងស្នាព្រះហស្តរបស់ព្រះ បានបណ្តាលចិត្តគាត់ឲ្យចូលទៅរកព្រះអង្គ។ គាត់និយាយថា “ខ្ញុំមើលឃើញអ្វីៗមានសម្រស់ស្រស់ស្អាតណាស់។ មាននរណាម្នាក់បានបង្កើតពួកវាមក”។
ក្នុងបទគម្ពីរលោកុប្បត្តិជំពូក១ យើងឃើញថា ព្រះទ្រង់ពិតជាបានបង្កើតរបស់សព្វសារពើ។ ហើយទោះ “ផែនដីបានខូច”(ខ.២) ព្រះអង្គបានធ្វើឲ្យភាពគ្មានសណ្ដាប់ធ្នាប់ក្លាយជាមានសណ្ដាប់ធ្នាប់។ ព្រះអង្គបានញែកពន្លឺ ចេញពីភាពងងឹត(ខ.៤) ដាក់ឲ្យមានដីដុះឡើងនៅចន្លោះទឹកសមុទ្រ(ខ.១០) ហើយព្រះអង្គបង្កើតរុក្ខជាតិ និងសត្វ តាមប្រភេទរបស់ពួកវា(ខ.១១-១២,២១,២៤-២៥)។ ព្រះដែលបានបង្កើតផ្ទៃមេឃ និងផែនដី ហើយដាក់អ្វីៗទាំងអស់ ក្នុងកន្លែងរបស់វា(អេសាយ ៤៥:១៨) ហើយបន្តនាំមកនូវសន្តិភាព និងសណ្ដាប់ធ្នាប់ដល់ជីវិត ដែលចុះចូលនឹងព្រះគ្រីស្ទ។
ជីវិតមនុស្សអាចមានភាពវឹកវរ និងបញ្ហាប្រឈម។ ចូរសរសើរដំកើងព្រះអង្គថា ព្រះអង្គ “មិនមែនជាព្រះនៃសេចក្តីវឹកវរទេ គឺទ្រង់ជាព្រះនៃសេចក្តីសុខសាន្តវិញ ដូចក្នុងអស់ទាំងពួកជំនុំរបស់ពួកបរិសុទ្ធដែរ”(១កូរិនថូស ១៤:៣៣)។ ចូរយើងស្រែករកព្រះអង្គនៅថ្ងៃនេះ ហើយសូមព្រះអង្គជួយយើងរកឃើញភាពស្រស់ស្អាត និងសណ្ដាប់ធ្នាប់ដែលមានតែព្រះអង្គអាចប្រទានឲ្យបាន។—Tom Felten
តើមានភាពវឹកវរអ្វីដែលអ្នកកំពុងជួបប្រទះក្នុងជីវិតអ្នក? តើព្រះទ្រង់អាចជួយអ្នកនាំមកនូវសណ្ដាប់ធ្នាប់ និងសន្តិភាពក្នុងជីវិតអ្នកដូចម្តេចខ្លះ?
ឱព្រះអាទិករ ទូលបង្គំសូមអរព្រះគុណព្រះអង្គ សម្រាប់ការប្រទានសន្តិភាព និងសណ្ដាប់ធ្នាប់ក្នុងជីវិតទូលបង្គំ។ ក្នុងព្រះអង្គ អ្វីៗដែលប្រេះបែកប្រែក្លាយជាមានភាពស្រស់ស្អាត។
Visit ODBU.org/topic/ot216-01-lecture to learn more about the book of Genesis.
គម្រោងអានព្រះគម្ពីររយៈពេល១ឆ្នាំ : ១សាំយ៉ូអែល ២២-២៤ និង លូកា ១២:១-៣១
ប្រភេទ
ល្ងាច
បណ្តាលចិត្តយើងឲ្យវិលមកវិញ
ដោយJohn Piper
April 13, 2024
ឱព្រះយេហូវ៉ាអើយ សូមបំបែរយើងខ្ញុំឲ្យវិលមកឯទ្រង់វិញ នោះយើងខ្ញុំនឹងបានបែរមកហើយ សូមកែជីវិតរបស់យើងខ្ញុំឡើងវិញ ដូចជាកាលពីដើម។ បរិទេវ ៥:២១
រាស្ត្ររបស់ព្រះគ្មានសង្ឃឹមឡើយ ទាល់តែព្រះទ្រង់បណ្តាលចិត្តពួកគេឲ្យវិលត្រឡប់ ពីការថយទៅរក និងលោតចូលក្នុងអំពើបាប និងការមិនជឿ។
កណ្ឌបរិទេវជាកណ្ឌដែលក្រៀមក្រំបំផុត ក្នុងព្រះគម្ពីរ។ ព្រះទ្រង់បានបំផ្លាញទីក្រុងយេរូសាឡិម ដែលប្រៀបដូចជាប្រស្រីភ្នែកព្រះអង្គ។
ព្រះយេហូវ៉ាទ្រង់បានសំរេចសេចក្តីក្រោធរបស់ទ្រង់ ក៏បានចាក់សេចក្តីខ្ញាល់ដ៏សហ័សរបស់ទ្រង់ចេញហើយ ទ្រង់បានបង្កាត់ភ្លើង នៅក្នុងក្រុងស៊ីយ៉ូន ជាភ្លើងដែលឆេះដល់ទាំងឫសជញ្ជាំងផង (បរិទេវ ៤:១១)។
ទ្រង់បានលើកព្រះហស្ត ដូចជាអ្នកតតាំង ក៏បានប្រហារជីវិតនៃគ្រប់ទាំងអស់ដែលគាប់ភ្នែក (បរិទេវ ២:៤)។
ទ្រង់បានធ្វើទុក្ខនាង ដោយព្រោះអំពើរំលងដ៏បរិបូរ (បរិទេវ ១:៥)។
តើកណ្ឌគម្ពីរនេះ បានបញ្ចប់យ៉ាងដូចម្តេចខ្លះ?
កណ្ឌគម្ពីរនេះបានបញ្ចប់ ដោយចែងអំពីក្តីសង្ឃឹមតែមួយ ៖
ឱព្រះយេហូវ៉ាអើយ សូមបំបែរយើងខ្ញុំឲ្យវិលមកឯទ្រង់វិញ នោះយើងខ្ញុំនឹងបានបែរមកហើយ (បរិទេវ ៥:២១)។
មានតែក្តីសង្ឃឹមនេះទេ ដែលខ្ញុំ និងអ្នកមាន?
“ព្រះអម្ចាស់ក៏មានព្រះបន្ទូលថា ស៊ីម៉ូនៗអើយ មើល សាតាំងបានសូមចង់បានអ្នករាល់គ្នា ប្រយោជន៍នឹងរែងអ្នករាល់គ្នា ដូចជារែងអង្ករ ប៉ុន្តែ ខ្ញុំបានអធិស្ឋានឲ្យអ្នក ដើម្បីមិនឲ្យសេចក្តីជំនឿរបស់អ្នកវិនាសបាត់ឡើយ កាលណាអ្នកបានប្រែចិត្តវិលមកវិញ នោះចូរចំរើនឲ្យបងប្អូនអ្នកបានខ្ជាប់ខ្ជួនឡើង”(លូកា ២២:៣១-៣២)។
ព្រះអង្គបានមានបន្ទូលថា ពេលអ្នកបានប្រែចិត្តមកវិញ តែមិនបានមានបន្ទូលថា បើសិនជាអ្នកប្រែចិត្តមកវិញនោះទេ។ ព្រះអង្គបានអធិស្ឋានឲ្យអ្នក! អ្នកនឹងប្រែចិត្តវិលមកវិញ។ ហើយពេលដែលអ្នកប្រែចិត្តមកវិញ គឺដោយសារព្រះគុណនៃអធិបតេយ្យភាពរបស់ព្រះអង្គ ដែលនាំអ្នកឲ្យវិលត្រឡប់ពីជម្រៅដ៏សែនជ្រៅ នៃការបែកចេញពីព្រះ។
ឱបងប្អូនគ្រីស្ទានទាំងឡាយ នេះក៏ជារឿងពិតសម្រាប់អ្នកផងដែរ។ នេះជាក្តីសង្ឃឹមតែមួយ ដែលអ្នកអាចមាន ក្នុងការស៊ូទ្រាំ ដោយជំនឿ។ សិរីល្អមាននៅក្នុងក្តីសង្ឃឹមនេះ។
ព្រះគ្រីស្ទ … ក៏គង់នៅខាងស្តាំនៃព្រះ ហើយជាអ្នកអង្វរជំនួសយើងរាល់គ្នាដែរ (រ៉ូម ៨:៣៤)។
ព្រះអង្គនឹងបណ្តាលចិត្តយើងឲ្យវិលត្រឡប់មករកព្រះអង្គវិញ។ ដូចនេះ “រីឯព្រះ ដែលអាចនឹងថែរក្សា មិនឲ្យអ្នករាល់គ្នាជំពប់ដួល … នោះសូមឲ្យទ្រង់បានសិរីល្អ ឫទ្ធានុភាព ព្រះចេស្ដា និងអំណាច តាំងពីមុនអស់កល្ប នៅជាន់ឥឡូវនេះ ហើយទៅដល់អស់កល្បជានិច្ចតទៅ។ អាម៉ែន”(យូដាស ១:២៤-២៥)។