បាននៅផ្ទះជាមួយព្រះយេស៊ូវ
ដោយBill Crowder
April 15, 2024
យ៉ូហាន ១៤:១-៧
បើខ្ញុំទៅរៀបកន្លែងឲ្យអ្នករាល់គ្នា នោះខ្ញុំនឹងត្រឡប់មកវិញ នឹងទទួលអ្នករាល់គ្នាទៅឯខ្ញុំ ប្រយោជន៍ឲ្យអ្នករាល់គ្នាបាននៅកន្លែងដែលខ្ញុំនៅនោះដែរ។ យ៉ូហាន ១៤:៣
មានពេលមួយដូរ៉ូធី(Dorothy) បានគោះកែងស្បែកជើងពណ៌ក្រហមដូចត្បូងទទឹម ហើយនិយាយថា “គ្មានកន្លែងណាល្អជាងផ្ទះទេ”។ ក្នុងខ្សែភាពយន្តរឿងអ្នកប្រាជ្ញនៃនគរអូហ្ស ស្បែកជើងនោះ មានសមត្ថភាពពិសេស អាចដឹកជញ្ជូនដូរ៉ូធី និងតូតូ ពីនគរអូហ្ស ត្រឡប់មកផ្ទះរបស់ពួកគេក្នុងរដ្ឋនេសាស់វិញ។
គួរឲ្យស្តាយណាស់ ពួកគេមិនមានស្បែកជើងពណ៌ក្រហមសម្រាប់គ្រប់គ្នាទេ។ មនុស្សជាច្រើនក៏មានចិត្តចង់ទៅផ្ទះដូចដូរ៉ូធីផងដែរ តែការរកឃើញផ្ទះដ៏កក់ក្តៅ ជួនកាល មិនងាយស្រួលដូចការនិយាយទេ។
ការរស់នៅក្នុងពិភពលោក ដែលមនុស្សមានការផ្លាស់ប្តូរទីលំនៅញឹកញាប់ ដោយគ្មានភាពស្ថិតស្ថេរ អាចនាំឲ្យយើងមានអារម្មណ៍ថា ខ្វះភាពកក់ក្តៅ ដោយមិនដឹងថា យើងនឹងអាចរកបានកន្លែង ដែលយើងពិតជាមានអារម្មណ៍កក់ក្តៅឬអត់ទេ។ អារម្មណ៍ដូចនេះ ក៏អាចឆ្លុះបញ្ចាំងអំពីការពិតដែលស៊ីជម្រៅជាងនេះទៀត គឺដូចដែលលោកស៊ី អេស លូអ៊ីស(C. S. Lewis) បានបកស្រាយថា “បើខ្ញុំពិនិត្យមើលក្នុងជម្រៅចិត្តខ្ញុំឃើញថា ខ្ញុំមានសេចក្តីប៉ងប្រាថ្នាមួយ ដែលគ្មានបទពិសោធន៍ណាមួយក្នុងលោកិយនេះ អាចធ្វើឲ្យស្កប់ស្កល់បាន នោះមូលហេតុទំនងបំផុតដែលខ្ញុំមានបញ្ហានេះ គឺដោយសារព្រះទ្រង់បានបង្កើតខ្ញុំមក សម្រាប់ឲ្យរស់នៅក្នុងពិភពលោកមួយទៀត”។
នៅពេលយប់មុនពេលព្រះយេស៊ូវសុគតនៅលើឈើឆ្កាង ព្រះអង្គបានមានបន្ទូលធានាដល់មិត្តសំឡាញ់ទ្រង់អំពីផ្ទះនោះថា “នៅក្នុងដំណាក់នៃព្រះវរបិតាខ្ញុំ មានទីលំនៅជាច្រើន ពុំនោះ ខ្ញុំបានប្រាប់អ្នករាល់គ្នាហើយ ខ្ញុំទៅរៀបកន្លែងឲ្យអ្នករាល់គ្នា”(យ៉ូហាន ១៤:២)។ គឺផ្ទះដែលយើងនឹងទទួលបានការស្វាគមន៍ និងសេចក្តីស្រឡាញ់។
តែយើងក៏អាចមានអារម្មណ៍កក់ក្តៅដូចនេះ ក្នុងពេលបច្ចុប្បន្នផងដែរ។ យើងជាផ្នែកមួយនៃមហាគ្រួសាររបស់ព្រះ ដែលជាពួកជំនុំរបស់ព្រះអង្គ ជាសហគមន៍សម្រាប់ឲ្យយើងរស់នៅជាមួយបងប្អូនប្រុសស្រីក្នុងព្រះគ្រីស្ទ។ ទំរាំដល់ថ្ងៃដែលព្រះយេស៊ូវយកយើងទៅនៅផ្ទះ ដែលចិត្តរបស់យើងស្រេកឃ្លានចង់បាននោះ យើងអាចរស់នៅក្នុងពេលបច្ចុប្បន្ន ក្នុងសន្តិភាព និងក្តីអំណររបស់ព្រះអង្គ។ យើងតែងតែនៅជាប់ជាមួយព្រះអង្គ ដូចនៅក្នុងផ្ទះដ៏កក់ក្តៅជានិច្ច។—Bill Crowder
តើមានអ្វីធ្វើឲ្យអ្នកមានអារម្មណ៍ថា អ្នកនៅផ្ទះដ៏កក់ក្តៅ ហើយហេតុអ្វី? តើការដឹងថា ព្រះយេស៊ូវនឹងនាំអ្នកទៅនៅជាមួយព្រះអង្គជារៀងរហូត មានប្រយោជន៍យ៉ាងណាខ្លះដល់អ្នក ក្នុងការរស់នៅក្នុងលោកិយនេះ?
ឱព្រះនៃសេចក្តីស្រឡាញ់ និងព្រះគុណ សូមព្រះអង្គជួយទូលបង្គំឲ្យទន្ទឹងរង់ចាំការរស់នៅ ក្នុងផ្ទះនៅស្ថានសួគ៌ជាមួយព្រះអង្គ ក្នុងព្រះវត្តមានព្រះអង្គជារៀងរហូត។
គម្រោងអានព្រះគម្ពីររយៈពេល១ឆ្នាំ : ១សាំយ៉ូអែល ២៧-២៩ និង លូកា ១៣:១-២២