បើកភ្នែកយើងឲ្យមើលឃើញការពិត
ដោយAmy Boucher Pye
May 8, 2024
២ពង្សាវតាក្សត្រ ៦:១៥-២៣
នោះអេលីសេក៏អធិស្ឋានថា “ឱព្រះយេហូវ៉ាអើយ សូមទ្រង់ប្រោសឲ្យភ្នែកវាបានមើលឃើញ”។ ២ពង្សាវតាក្សត្រ ៦:១៧
អ្នកស្រីជយ(Joy) មានការខ្វល់ខ្វាយអំពីអ្នកស្រីស៊ែនឌី(Sandy) ជាសាច់ញាតិរបស់គាត់ ដែលកំពុងតយុទ្ធនឹងការញៀនស្រា និងជំងឺផ្លូវចិត្តអស់ជាច្រើនឆ្នាំហើយ។ នៅពេលគាត់ទៅផ្ទះរបស់អ្នកស្រីស៊ែនឌី គាត់ឃើញទ្វារចាក់សោរជាប់ ហើយហាក់ដូចជាមិនមានមនុស្សរស់នៅ។ នៅពេលដែលគាត់ និងអ្នកដទៃទៀតមានគម្រោងស្វែងរកអ្នកស្រីស៊ែនឌី គាត់ក៏បានអធិស្ឋានថា “ឱព្រះអង្គអើយ សូមព្រះអង្គជួយទូលបង្គំឲ្យមើលឃើញអ្វីដែលទូលបង្គំមើលមិនឃើញ”។ ខណៈពេលដែលពួកគេកំពុងចាក់ចេញ អ្នកស្រីជយ ក៏បានក្រឡេកមកក្រោយ មើលទៅផ្ទះរបស់អ្នកស្រីស៊ែនឌី ហើយក៏បានឃើញវាំងននមានចលនាកំរើកតិចៗ។ នៅពេលនោះ គាត់ដឹងថា អ្នកស្រីស៊ែនឌីនៅមានជីវិតទេ។ ក្រុមសង្គ្រោះបន្ទាន់ក៏បានមកជួយគាត់ទាន់ពេលវេលា ហើយអ្នកស្រីជយ មានអំណរណាស់ ដែលព្រះអង្គបានឆ្លើយតបការអធិស្ឋានរបស់គាត់។
ហោរាអេលីសេបានដឹងអំពីអំណាចនៃការទូលសូមព្រះអម្ចាស់ បង្ហាញការពិតដល់គាត់។ នៅពេលដែលកងទ័ពនគរស៊ីរីបានឡោមព័ទ្ធទីក្រុងរបស់ពួកគេ អ្នកបម្រើរបស់ហោរាអេលីសេ ក៏បានញ័រខ្លួន ដោយការភ័យខ្លាច។ ទោះជាយ៉ាងណាក៏ដោយ អ្នកបម្រើព្រះរូបនេះមិនមានការភ័យខ្លាចឡើង ព្រោះព្រះអង្គក៏បានជួយឲ្យគាត់មើលឃើញអ្វីដែលគេមើលមិនឃើញ។ លោកអេលីសេក៏បានអធិស្ឋានឲ្យព្រះអង្គបើកភ្នែកអ្នកបម្រើគាត់ ឲ្យមើលឃើញទិដ្ឋភាពពិតដែលកំពុងកើតឡើង ហើយព្រះអង្គក៏បើកភ្នែកអ្នកបំរើនោះ ឲ្យគាត់ក៏មើលទៅឃើញភ្នំនោះ មានពេញដោយពលសេះ និងរទេះចំបាំង ដែលសុទ្ធតែជាភ្លើង នៅព័ទ្ធជុំវិញអេលីសេ”(២ពង្សាវតាក្សត្រ ៦:១៧)។
ព្រះអម្ចាស់ក៏បានដករបាំងនៅចន្លោះពិភពខាងវិញ្ញាណ និងពិភពខាងសាច់ឈាម ឲ្យលោកអេលីសេ និងអ្នកបម្រើគាត់មើលឃើញរឿងពិតដែលកំពុងកើតមាន។ អ្នកស្រីជយ ជឿថា ព្រះអម្ចាស់បានជួយគាត់ឲ្យមើលឃើញវាំងននមានចលនាតិចៗ ធ្វើឲ្យគាត់មានសង្ឃឹមឡើង។ យើងក៏អាចទូលសូមព្រះអង្គ ឲ្យប្រទានយើងនូវការមើលឃើញខាងវិញ្ញាណ ដើម្បីឲ្យយើងអាចដឹងថា មានអ្វីខ្លះកំពុងកើតឡើងចំពោះយើង ទោះក្នុងជីវិតមនុស្សជាទីស្រឡាញ់ ឬក្នុងសហគមន៍របស់យើងក្តី។ ហើយយើងក៏អាចធ្វើជាឧបករណ៍នៃសេចក្តីស្រឡាញ់ សេចក្តីពិត និងសេចក្តីអាណិតរបស់ព្រះអង្គផងដែរ។—Amy Boucher Pye
តើអ្នកអាចអធិស្ឋានដូចម្តេចខ្លះ ដើម្បីសូមព្រះអង្គបើកភ្នែកអ្នក ឲ្យមើលឃើញសេចក្តីពិតរបស់ព្រះអង្គ ក្នុងស្ថានភាពដែលធ្វើឲ្យអ្នកបាក់ទឹកចិត្ត? តើព្រះអង្គបានបើកបង្ហាញការពិតដូចម្តេចខ្លះ ឲ្យអ្នកបានដឹង កាលពីពេលកន្លងទៅ?
ឱព្រះវរបិតានៃសេចក្តីមេត្តា សូមព្រះអង្គបើកភ្នែកទូលបង្គំ ឲ្យមើលឃើញសេចក្តីស្រឡាញ់ និងព្រះគុណរបស់ព្រះអង្គ ដែលទូលបង្គំអាចចែករំលែកជាមួយអ្នកដទៃ។
គម្រោងអានព្រះគម្ពីររយៈពេល១ឆ្នាំ : ២ពង្សាវតាក្សត្រ ៤-៦ និង លូកា ២៤:៣៦-៥៣