តើគេស្វាគមន៍ខ្ញុំទេ?

កិច្ចការ ៨:២៩-៣៩

តើមាន​អ្វី​ឃាត់​មិន​ឲ្យ​ខ្ញុំ​ទទួល​បុណ្យ​ជ្រមុជ​ទឹក​បាន? កិច្ចការ ៨:៣៦

អ្នក​ស្រី សាលី ហ្វៀល(Sally Field) ជា​តួ​សម្ដែង ដែល​នៅ​ទីបំផុត គាត់​ក៏​បាន​ស្គាល់​អារម្មណ៍​ដែល​យើង​ម្នាក់ៗ​ចង់​មាន​។ កាល​គាត់​ទទួល​បាន​ពាន់​រង្វាន់​អូ​ស្កា​ជា​លើក​ទីពីរ ក្នុង​ឆ្នាំ១៩៨៥ គាត់​បាន​និយាយ នៅ​ក្នុង​សន្ទរកថា​ទទួល​ពាន់​រង្វាន់​អូ​ស្កា​យ៉ាង​ដូច​នេះ​ថា “ខ្ញុំ​ចង់​បាន​ការ​គោរព​របស់​អ្នក​ទាំង​អស់​គ្នា លើស​អ្វីៗ​ទាំង​អស់​។ កាល​ទទួល​ពាន​រង្វាន់​អូស្កា​លើក​ទីមួយ ខ្ញុំ​មិន​មាន​អារម្មណ៍​ដូច​នេះ​ទេ​។ តែ​លើក​នេះ ខ្ញុំ​មាន​អារម្មណ៍​ថា បាន​ទទួល​ការ​គោរព​។ ហើយ​ខ្ញុំ​ក៏​មិន​អាច​បដិសេធន៍​ការ​ពិត​ដែល​ថា ក្នុង​ពេល​នេះ អ្នក​ទាំង​អស់​គ្នា​មិន​ខុសពី​ខ្ញុំ​ទេ”។

​ជនជាតិ​អេធីយ៉ូពី ដែល​ជា​មនុស្ស​កម្រៀវ ក៏​មាន​ការ​ស្ញប់​ស្ញែង ចំពោះ​ការ​ទទួល​ស្វាគមន៍​ដែល​គាត់​បាន​ទទួល​ផង​ដែរ​។ ក្នុង​នាម​គាត់​ជា​សាសន៍​ដទៃ គេ​បាន​បដិសេធន៍​មិន​ឲ្យ​គាត់​ចូល​ទៅ​ក្នុង​បរិវេណ​ខាង​ក្នុង​នៃ​ព្រះវិហារ នៅ​ទីក្រុង​យេរូសាឡិម​ទេ(មើល អេភេសូរ ២:‌១១-១២ និង ចោទិយកថា ២៣:‌១)។ ប៉ុន្តែ គាត់​ចង់​ឲ្យ​គេ​ទទួល​ស្វាគមន៍​គាត់​។ សាវ័ក​ភីលីព​ក៏បាន​ប្រទះ​ឃើញ​គាត់ កំពុង​ត្រឡប់​ពី​ការ​ធ្វើ​ដំណើរ​ទៅ​ចូល​រួម​ពិធី​បុណ្យ​នៅ​ទីក្រុង​យេរូសាឡិម(កិច្ចការ ៨:២៧)។

បុរស​អេធីយ៉ូពី​នោះ​កំពុង​អាន​បទ​គម្ពីរ​អេសាយ ដែល​ក្នុង​នោះ ព្រះអម្ចាស់​បាន​សន្យា​ថា “ពួក​កម្រៀវ ដែល​រក្សា​ថ្ងៃឈប់​សំរាក​ទាំង​ប៉ុន្មាន ក៏​រើស​យក​អ្វីៗ​ដែល​គាប់​ចិត្ត​អញ ព្រម​ទាំង​កាន់​ខ្ជាប់​តាម​សេចក្តី​សញ្ញា​របស់​អញ​ថា អញ​នឹង​ឲ្យ​គេ​មាន​ទី​កន្លែង១នៅ​ក្នុង​វិហារ​អញ ហើយ​ឲ្យ​មាន​ឈ្មោះ​ឆ្លាក់​នៅ​ជញ្ជាំង​ខាង​ក្នុង ដែល​វិសេស​ជាង​កូន​ប្រុស​កូន​ស្រី​ទៅទៀត អញ​នឹង​ឲ្យ​គេ​មាន​ឈ្មោះ​ដ៏​នៅ​អស់​កល្ប​ជានិច្ច ជា​ឈ្មោះ​ដែល​មិន​ត្រូវ​កាត់​ចេញ​ឡើយ”(អេសាយ ៥៦:៤-៥)។ បន្ទាប់មក សាវ័ក​ភីលីព​ក៏​បាន​ចែក​ចាយ​ដំណឹង​ល្អ​អំពី​ព្រះយេស៊ូវ ឲ្យ​គាត់​ស្តាប់ ហើយ​គាត់​ក៏​បាន​ឆ្លើយ​តប​ថា “មើល នុ៎ះន៏​ទឹក តើមាន​អ្វី​ឃាត់​មិន​ឲ្យ​ខ្ញុំ​ទទួល​បុណ្យ​ជ្រមុជ​ទឹក​បាន?”(កិច្ចការ ៨:៣៥-៣៦)។

ត្រង់​ចំណុច​នេះ គាត់​កំពុងតែ​ចង់​សួរ​ថា តើ​គេ​ពិតជា​ទទួល​ស្វាគមន៍​គាត់​ទេ? តើ​គាត់​ពិតជា​អាច​ចូល​រួម​ជា​មួយ​គេ​ឬ​ទេ? សាវ័ក​ភីលីព​បាន​ធ្វើ​បុណ្យ​ជ្រមុជ​ទឹក​ឲ្យ​គាត់ ជា​សញ្ញា​បង្ហាញថា ព្រះយេស៊ូវ​បាន​ដក​រនាំង​ទាំង​អស់​ចេញ​ហើយ(អេភេសូរ ២:‌១៤)។ ព្រះ​យេស៊ូវ​បាន​ឱប​ក្រសោប​យក និង​បង្រួប​បង្រួម មនុស្ស​ទាំង​អស់​ដែល​ងាក​ចេញ​ពី​បាប ហើយ​ទទួល​ជឿ​ព្រះអង្គ​។ បុរស​កម្រៀវ​នោះ​ក៏​ទៅតាម​ផ្លូវ​ដោយ​អរ​សប្បាយ(កិច្ចការ ៨:៣៩)។ ទី​បំផុត គាត់​ក៏​មាន​ចំណែក​ក្នុង​មហា​គ្រួសារ​នៃ​ព្រះ យ៉ាង​ពេញលេញ​។—Mike Wittmer

ហេតុ​អ្វី​អ្នកជឿ​ព្រះយេស៊ូវ​ទាំង​អស់ សុទ្ធតែ​មាន​ចំណែក​ក្នុង​មហា​គ្រួសារ​របស់​ព្រះអង្គ? តើ​ការ​ធ្វើ​បុណ្យ​ជ្រមុជ​ទឹក បាន​ជួយ​ឲ្យ​អ្នក​យល់​អំពី​ការ​ពិត​នេះ​កាន់តែ​ច្បាស់​ប៉ុណ្ណា?

ឱ​ព្រះយេស៊ូវ ទូល​បង្គំ​ជា​កម្មសិទ្ធិ​របស់​ព្រះ និង​ជា​សមាជិក​មហា​គ្រួសារ​របស់​ព្រះអង្គ ព្រោះ​ទូល​បង្គំ​ជា​កូន​ព្រះអង្គ​។

គម្រោងអានព្រះគម្ពីររយៈពេល១ឆ្នាំ: យ៉ាកុប ៣៨-៤០ និង កិច្ចការ ១៦:១-២១

Share this post:
Facebook
Twitter
LinkedIn
WhatsApp

More articles