កាឡាទី ១:១-៥
ដែលទ្រង់បានប្រគល់ព្រះអង្គទ្រង់ទៅ ដោយព្រោះបាបយើងរាល់គ្នា ដើម្បីនឹងប្រោស ឲ្យយើងបានរួចពីលោកីយ៍ ដ៏អាក្រក់សព្វថ្ងៃនេះ។ កាឡាទី ១:៤
មិត្តភក្តិមួយក្រុម បានទៅជិះទូកកម្សាន្ត ក្នុងដៃសមុទ្ររបស់ប្រទេសអង់គ្លេស ដោយសង្ឃឹមថា ការព្យាករណ៍អំពីអាកាសធាតុដែលមានខ្យល់ព្យុះនឹងមានការផ្លាស់ប្តូរ។ ប៉ុន្តែ ខ្យល់ចាប់ផ្តើមបក់ និងទឹករលកកាន់តែខ្លាំង ដោយគំរាមកំហែងមកលើសុវត្ថិភាពរបស់ទូកពួកគេ ដូចនេះ ពួកគេក៏បានទំនាក់ទំនងទៅកាន់ទូលសង្គ្រោះ RNLI របស់ប្រទេសអង់គ្លេស តាមវិទ្យុទាក់ទង។ បន្ទាប់ពីពួកគេស្ថិតក្នុងពេលដ៏តានតឹងមួយរយៈមក ពួកគេក៏បានមើលឃើញនាវាសង្រ្គោះ មកពីចម្ងាយ ហើយក៏មានអារម្មណ៍ធូរស្បើយ ដោយដឹងថា មិនយូរទេ ពួកគេនឹងមានសុវត្ថិភាពមិនខាន។ ក្រោយមក មិត្តភក្តិខ្ញុំម្នាក់ ដែលបានចូលរួមដំណើរកម្សាន្តដ៏គ្រោះថ្នាក់នេះ ក៏បានរំឭកអំពីរឿងនេះដោយការដឹងគុណថា “ទោះគេបានអនុវត្តន៍តាមបទបញ្ជា សម្រាប់ការធ្វើដំណើរតាមសមុទ្រឬអត់ នាវាសង្គ្រោះនៅតែមកជួយគេ ឲ្យរួចផុតពីគ្រោះថ្នាក់”។
ខណៈពេលដែលគាត់ចែកចាយរឿងនេះឲ្យខ្ញុំស្តាប់ ខ្ញុំក៏បានគិតអំពីរបៀបដែលព្រះយេស៊ូវ បានដឹកនាំបេសកកម្មស្វែងរក និងជួយសង្រ្គោះ កាល២ពាន់ឆ្នាំមុន។ ព្រះអង្គបានយាងចុះមកផែនដី ដោយយកកំណើតជាមនុស្ស ហើយបានរស់នៅក្នុងចំណោមយើង។ តាមរយៈការសុគត និងការមានព្រះជន្មឡើងវិញរបស់ព្រះអង្គ ព្រះអង្គបានប្រទានយើងនូវផែនការជួយសង្រ្គោះ ខណៈពេលដែលយើងបានដាច់ចេញពីព្រះអង្គ ដោយសារបាប និងការមិនស្តាប់បង្គាប់របស់យើង។ សាវ័កប៉ុលបាននិយាយសង្កត់ធ្ងន់អំពីសេចក្តីពិតនេះ ក្នុងសំបុត្រដែលគាត់បានសរសេរផ្ញើទៅពួកជំនុំ ទៅក្រុងកាឡាទីយ៉ាងដូចនេះថា “ព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នា …បានប្រគល់ព្រះអង្គទ្រង់ទៅ ដោយព្រោះបាបយើងរាល់គ្នា ដើម្បីនឹងប្រោស ឲ្យយើងបានរួចពីលោកីយ៍ ដ៏អាក្រក់សព្វថ្ងៃនេះ”(កាឡាទី ១:៣-៤)។ សាវ័កប៉ុលបានរំឭកពួកជំនុំនៅទីក្រុងកាឡាទី អំពីអំណោយនៃជីវិតថ្មី ដែលពួកគេបានទទួលតាមរយៈការសុគតរបស់ព្រះយេស៊ូវ ដើម្បីឲ្យពួកគេបានថ្វាយព្រះកិត្តិនាមដល់ព្រះ ជារៀងរាល់ថ្ងៃ។
ព្រះយេស៊ូវ ជាព្រះអង្គសង្រ្គោះរបស់យើង បានស្ម័គ្រព្រះទ័យសុគត ដើម្បីសង្រ្គោះយើងឲ្យរួចផុតពីភាពបាតបង់។ ដោយសារព្រះអង្គបានសុគត នោះយើងមានជីវិតរស់ក្នុងនគរព្រះ ហើយយើងអាចចែកចាយដោយការដឹងគុណ អំពីដំណឹងល្អដែលសង្រ្គោះជីវិតនេះ ដល់មនុស្សក្នុងសហគមន៍របស់យើង។—Amy Boucher Pye
តើអ្នកបានបង្ហាញចេញនូវការដឹងគុណដល់ព្រះអង្គសង្រ្គោះរបស់អ្នក ដូចម្តេចខ្លះ? តើអ្នកអាចចែកចាយដំណឹងល្អ ដល់នរណាខ្លះ?
ឱព្រះយេស៊ូវ ព្រះអង្គបានប្រទានអំណោយនៃជីវិត និងសេចក្តីសង្រ្គោះ។ សូមព្រះអង្គជួយទូលបង្គំ ឲ្យទទួលសេចក្តីស្រឡាញ់របស់ព្រះអង្គ ហើយចែកចាយសេចក្តីស្រឡាញ់របស់ព្រះអង្គដល់អ្នកដទៃផងដែរ។
គម្រោងអានព្រះគម្ពីររយៈពេល១ឆ្នាំ: អេសាយ ៥-៦ និង អេភេសូរ ១
