យ៉ូហាន ៦:៦០-៦៩
គឺទ្រង់ហើយ ដែលមានព្រះបន្ទូលនៃជីវិតដ៏នៅអស់កល្បជានិច្ច។ យ៉ូហាន ៦:៦៨
ឪពុករបស់ខ្ញុំបានប្រើព្រះគម្ពីរប៊ីបជាទីស្រឡាញ់របស់គាត់ ជាង៣០ឆ្នាំ រហូតដល់ពេលដែលថ្នេរនៅក្នុងទ្រនង់របស់ព្រះគម្ពីរប៊ីបនោះបានដាច់រហែកជាពីរ។ នៅពេលដែលយើងយកព្រះគម្ពីរប៊ីបនោះទៅកន្លែងដេរទ្រនង់សៀវភៅ ដើម្បីជួសជុលឲ្យស្អាតឡើងវិញ ដោយវិជ្ជាជីវៈ ជាងក៏បានឆ្ងល់អំពីមូលហេតុដែលសៀវភៅមួយក្បាលនេះ មានលក្ខណៈពិសេសយ៉ាងនោះ ចំពោះយើង។ ព្រះគម្ពីរប៊ីបមួយក្បាលនេះមិនមែនជាវត្ថុបុរាណដែលមានតម្លៃថ្លៃនោះទេ ហើយទំព័រនីមួយៗក៏មានអក្សរសរសេរកំណត់ចំណាំពីលើដោយដៃ។ ការដែលគាត់បានសួរយើងអំពីព្រះគម្ពីរប៊ីបមួយក្បាលនោះ បានបង្កើតឲ្យមានឱកាស សម្រាប់ឲ្យគ្រួសារខ្ញុំចែកចាយដំណឹងល្អដល់គាត់ ព្រមទាំងអធិស្ឋានឲ្យគាត់ផងដែរ។
ជាការពិតណាស់ ព្រះគម្ពីរប៊ីបមានតម្លៃជាងកេរដំណែលប្រចាំគ្រួសារ ឬការលម្អដ៏ស្រស់ស្អាត។ ក្នុងទំព័រនីមួយៗ ផ្ទុកទៅដោយ “ព្រះបន្ទូលនៃជីវិតដ៏នៅអស់កល្ប”(យ៉ូហាន ៦:៦៨) ខណៈពេលដែលព្រះទ្រង់បើកបង្ហាញអង្គទ្រង់ ដល់យើង តាមរយៈព្រះរាជបុត្រាព្រះអង្គ។ ជំពូកដំបូងនៃកណ្ឌគម្ពីរដំណឹងល្អយ៉ូហានបានចែងថា ព្រះយេស៊ូវគឺជាព្រះបន្ទូលដែលគង់នៅជាមួយព្រះ ហើយព្រះអង្គគឺជាព្រះ(១:១)។ ព្រះអង្គបានត្រឡប់ជាសាច់ឈាម ហើយបានស្នាក់នៅជាមួយនឹងយើងរាល់គ្នា(ខ.១៤)។ ព្រះគម្ពីរប៊ីបមិនគ្រាន់តែបានចែងអំពីព្រះជន្មរបស់ព្រះគ្រីស្ទប៉ុណ្ណោះទេ តែក៏បានចែងអំពីកិច្ចការទាំងអស់ដែលព្រះអង្គបានធ្វើ ចាប់តាំងពីដើមដំបូងនៃការបង្កើតរបស់សព្វសារពើ និងការប្រោសលោះ រហូតដល់គ្រាចុងក្រោយ។
ក្នុងអំឡុងពេលដែលព្រះអង្គគង់នៅលើផែនដី ព្រះអង្គមានបន្ទូល ដែល “ត្រូវខាងវិញ្ញាណនឹងជីវិតវិញ”(៦:៦៣)។ នៅពេលដែលទ្រង់ប្រទានការបង្រៀនដ៏ពិបាកមួយ ហ្វូងមនុស្សក៏បានរអ៊ូរទាំ។ មនុស្សជាច្រើនក៏បានត្រឡប់ទៅវិញ ហើយឈប់ដើរតាមព្រះអង្គ(ខ.៦៦) តែពួកសាវ័កនៅតែសម្រេចចិត្តបន្តដើរតាមព្រះអង្គ។ ពួកគេដឹងថា ក្រៅពីព្រះបន្ទូលព្រះអង្គ គ្មានអ្វីអាចធ្វើឲ្យពួកគេស្កប់ចិត្តឡើយ។ ឪពុករបស់ខ្ញុំក៏យល់ឃើញដូចនេះផងដែរ។ ព្រះអង្គបានប្រទានក្តីសង្ឃឹម ទិសដៅ ការកម្សាន្តចិត្ត និងសេចក្តីពិត តាមរយៈព្រះបន្ទូលក្នុងព្រះគម្ពីរប៊ីប ខណៈពេលដែលគាត់ឆ្លងកាតពេលដ៏លំបាក ក៏ដូចជាពេលសុខស្រួលក្នុងជីវិតគាត់។—Karen Pimpo
តើអ្នកបានអនុញ្ញាតឲ្យពាក្យសម្តីរបស់នរណាកែប្រែជីវិតអ្នក? តើមានព្រះបន្ទូលណាខ្លះ នៅក្នុងព្រះគម្ពីរប៊ីប ដែលកំពុងបណ្តាលចិត្តអ្នក នៅថ្ងៃនេះ?
ឱព្រះអម្ចាស់ ខណៈពេលដែលទូលបង្គំអានព្រះគម្ពីរប៊ីបនៅថ្ងៃនេះ សូមព្រះអង្គបើកភ្នែកទូលបង្គំ ឲ្យបានឮសម្លេងព្រះអង្គ។
គម្រោងអានព្រះគម្ពីររយៈពេល១ឆ្នាំ : យ៉ូស្វេ ១០-១២ និង លូកា ១:៣៩-៥៦
