ការយល់ដឹងឃើញខាងវិញ្ញាណ
ដោយAlistair Begg
March 20, 2026
«ឯសាំយូអែលមិនទាន់ស្គាល់ព្រះយេហូវ៉ានៅឡើយទេ ព្រះបន្ទូលនៃទ្រង់ក៏មិនទាន់បានសំដែងមកឲ្យដឹងដែរ ។
រួចព្រះយេហូវ៉ាទ្រង់ហៅម្ដងទៀតជាគំរប់៣ដងថា នែសាំយូអែលអើយ នោះសាំយូអែលក៏ក្រោកឡើង ទៅឯអេលីសួរថា ខ្ញុំមកហើយ លោកមានការអី ដូច្នេះអេលីក៏យល់ឃើញថា គឺជាព្រះយេហូវ៉ាហើយ ដែលបានហៅក្មេងនេះ ។ លោកក៏ប្រាប់ដល់សាំយូអែលថា ចូរឯងដេកទៅ បើឮសូរហៅម្ដងទៀត នោះត្រូវឆ្លើយថា បពិត្រ ព្រះយេហូវ៉ាអើយ សូមទ្រង់មានបន្ទូលមកចុះ ដ្បិតទូលបង្គំ ជាអ្នកបំរើទ្រង់ ប្រុងស្ដាប់ហើយ ដូច្នេះសាំយូអែលបានទៅដេកនៅដំណេកខ្លួនវិញទៅ ។ លំដាប់នោះ ព្រះយេហូវ៉ាទ្រង់យាងមកឈរ ហៅដូចជាជាន់មុនថា សាំយូអែល នែសាំយូអែលអើយ នោះសាំយូអែលទូលឆ្លើយថា សូមទ្រង់មានបន្ទូលមកចុះ ដ្បិតទូលបង្គំ ជាអ្នកបំរើទ្រង់ប្រុងស្ដាប់ហើយ» ។ ១សាំយ៉ូអែល ៣:៧-១០
ពេលណាយើងពិបាកយល់គំរូថ្មី ឬទ្រឹស្ដីថ្មីណាមួយ បើគ្រូពន្យល់យើងម្តងហើយ តែយើងមិនទាន់យល់ ហើយគាត់ទុកឲ្យយើងស្វែងយល់ដោយខ្លួនឯង នោះគ្រូនោះមិនបានជួយអ្វីដល់យើងទេ ។ ផ្ទុយទៅវិញ យើងត្រូវការគ្រូបង្រៀនម្នាក់ដែលពន្យល់ទ្រឹស្ដីនោះឲ្យយើងស្តាប់ ដោយចិត្តអត់ធ្មត់ និងការលើកទឹកចិត្ត ទាល់តែយើងយល់ ។
កាលព្រះអម្ចាស់ត្រាស់ហៅលោក សាំយូអែលធ្វើជាហោរារបស់ទ្រង់ ព្រះអង្គបានប្រព្រឹត្តដោយព្រះគុណទ្រង់ ចំពោះអ្នកបម្រើរូបនេះ ដែលមិនទាន់យល់ តាមពិត កាលនោះ ព្រះអង្គមានអ្នកបម្រើពីរនាក់ដែលមិនយល់អ្វីដែលព្រះអង្គកំពុងធ្វើ ។
កុមារសាំយូអែលបានចូលរួមការងារនៅព្រះវិហារ ដោយការបម្រើ និងការទំនាក់ទំនង ។ ប៉ុន្តែ មានពិភពខាងវិញ្ញាណផ្ទាល់ខ្លួន ដែលគាត់មិនទាន់បានដកពិសោធ ។ ព្រះបន្ទូលព្រះមិនទាន់បានបើកសម្ដែងដល់គាត់ ហេតុនេះហើយ ព្រះអង្គក៏បានធ្វើជាអ្នកចាប់ផ្តើមមុន ក្នុងទំនាក់ទំនងជាមួយគាត់ ហើយមានព្រះគុណល្មមនឹងអាចបន្តត្រាស់ហៅគាត់ម្តងហើយម្តងទៀត ។ ការត្រាស់ហៅគាត់បួនដងនេះ បានក្រើនរំឭកយើងផងដែរថា ព្រះអង្គមានព្រះទ័យស្រទន់ និងសប្បុរស ។
ហោរាសាំយូអែលជាតួអង្គដែលបទគម្ពីរខាងលើនេះបានផ្ដោតទៅលើ ប៉ុន្តែ លោក អេលីក៏ត្រូវការព្រះអម្ចាស់ទំនាក់ទំនងជាមួយគាត់ ដោយព្រះទ័យអត់ធ្មត់ផងដែរ ។ ទោះគាត់ជាពួកសង្ឃក៏ដោយ ក៏គាត់មិនបានគិតឃើញភ្លាមៗថា ព្រះអម្ចាស់កំពុងមានបន្ទូលមកសាំយូអែលនោះឡើយ ។ បន្ទាប់មក នៅពេលដែលគាត់បានដឹងហើយ ការនេះគឺបានបង្ហាញថា ព្រះទ្រង់កំពុងធ្វើការក្នុងចិត្តគាត់ ។
ពួកសាវ័ករបស់ព្រះយេស៊ូវក៏ធ្លាប់មានការយល់ដឹងបន្តិចម្តងៗផងដែរ ។ ព្រះអង្គបានប្រាប់ពួកគេថា ព្រះអង្គមានរឿងជាច្រើនដែលត្រូវប្រាប់ពួកគេ ប៉ុន្តែ ពួកគេមិនទាន់អាចយល់បានទេ (យ៉ូហាន ១៦:១២) ។ ទោះជាយ៉ាងណាក៏ដោយ ព្រះអង្គមិនទុកឲ្យពួកគេឆ្ងល់រហូតនោះទេ ។ ផ្ទុយទៅវិញ ព្រះអង្គបានពន្យល់ពួកគេម្តងហើយម្តងទៀត ដោយព្រះទ័យអត់ធ្មត់ ។
យើងប្រហែលជាធ្លាប់មានបទពិសោធន៍ដូចហោរាសាំយូអែលផងដែរ ។ អ្នកប្រហែលជាបានអានសៀវភៅ និងស្តាប់ការអធិប្បាយព្រះបន្ទូលច្រើនដង ដោយមិនបានដកពិសោធន៍នឹងការផ្លាស់ប្រែពិតប្រាកដ ។ ឬអ្នកប្រហែលជាដូចពួកសាវ័ក ដោយអ្នកចាប់ផ្តើមយល់ ប៉ុន្តែ អ្នកនៅមានការភាន់ច្រឡំ អំពីរឿងខាងវិញ្ញាណជាច្រើន ។
ទោះយើងបានដើរតាមព្រះគ្រីស្ទ និងអានព្រះបន្ទូលព្រះជាច្រើនឆ្នាំយ៉ាងណា ក៏យើងនៅតែមានសេចក្តីជាច្រើនដែលមិនទាន់យល់ និងអរសប្បាយ ។ ជួនកាល យើងថែមទាំងមានអារម្មណ៍ថា យើងបានដើរថយក្រោយទៀតផង! ប៉ុន្តែ យើងអាចទុកចិត្តថា នៅក្នុងព្រះអម្ចាស់ យើងមានគ្រូបង្រៀនមួយអង្គដឹកនាំយើង ប្រកបដោយព្រះគុណ ។ ដូចនេះ ចូរយើងចូលរួមជាមួយអ្នកនិពន្ធបទគម្ពីរទំនុកដំកើង ក្នុងការអធិស្ឋានថា «សូមបំភ្លឺភ្នែកទូលបង្គំ ឲ្យបានឃើញសេចក្ដីអស្ចារ្យ នៅក្នុងក្រិត្យវិន័យរបស់ទ្រង់» (ទំនុកដំកើង ១១៩:១៨) ។ បន្ទាប់មក ចូរយើងខិតខំសិក្សាព្រះបន្ទូលព្រះ ហើយយល់អត្ថន័យដែលព្រះបន្ទូលទ្រង់មានសម្រាប់ជីវិតអ្នក ដោយការអធិស្ឋាន ដោយទំនុកចិត្តថា ព្រះអង្គកំពុងធ្វើការក្នុងជីវិតអ្នក ខណៈពេលដែលអ្នកបានយល់ព្រះបន្ទូលកាន់តែច្រើន ។
ខគម្ពីរជញ្ជឹងគិត៖ រ៉ូម ១២:១-៣
គម្រោងអានព្រះគម្ពីររយៈពេល១ឆ្នាំ៖ យ៉ូប ៣៨-៤០ និង ១កូរិនថូស ១៣