ព្រះទ្រង់រៀបចំជីវិតយើងឡើងវិញ
ដោយAlistair Begg
March 28, 2026
«ទេវតានៃព្រះយេហូវ៉ាក៏មានបន្ទូលទៅនាងថា អញនឹងចំរើនពូជឯង ឲ្យមានសន្ធឹកឥតគណនា» ...អាប់រ៉ាមក៏ក្រាបផ្កាប់មុខ រួចព្រះទ្រង់មានបន្ទូលនឹងគាត់ថា «ឯអញ មើល អញបានតាំងសេចក្ដីសញ្ញានឹងឯងហើយ ឯងនឹងធ្វើជាឪពុកនៃសាសន៍ជាច្រើន» ។ លោកុប្បត្តិ ១៦:១០; ១៧:៣-៤
តើអ្នកធ្លាប់មើលក្មេងៗលេងសង់ផ្ទះពីដុំជ័រLego ដែរឬទេ ? ពួកគេសង់ផ្ទះតូចៗ ឬសង់យន្តហោះពីដុំជ័រនោះ ដោយមិនបានប្រើប្លង់សម្រាប់ការសាងសង់ឡើយ ។ ទីបំផុត ដុំជ័រតូចៗទាំងនោះក៏បានរាយប៉ាយពេញលើកម្រាលឥដ្ឋ ដោយផ្ទះដែលពួកគេកំពុងសង់មិនមានទ្វារត្រឹមត្រូវ ហើយពួកគេក៏បានមករកអ្នក ដោយត្អូញត្អែរពីរូបផ្ទះដែលពួកគេសង់មិនត្រូវ ។ ហើយអ្នកក៏បាននាំក្មេងនោះអង្គុយចុះ នៅកន្លែងដែលមានដុំជ័ររាយប៉ាយនោះ ហើយក៏បាននិយាយថា «លើកនេះ យើងនឹងរើសដុំជ័ររាយប៉ាយនេះផ្គុំចូលគ្នា ដើម្បីសង់ផ្ទះឲ្យបានត្រូវ តាមប្លង់ដែលមានស្រាប់» ។
កាលលោក អ័ប្រាហាំ និងនាងសារ៉ា មានអារម្មណ៍ហត់នឿយ ក្នុងការរង់ចាំព្រះអម្ចាស់សម្រេចព្រះបន្ទូលសន្យា អំពីកូនស្នងមរតកម្នាក់ ពួកគេក៏បានព្យាយាមសម្រេចសេចក្តីសន្យានោះដោយខ្លួនឯង ។ ពួកគេបានព្យាយាមរៀបចំជីវិត តាមបំណងចិត្តរបស់ខ្លួន ដោយព្រមព្រៀងឲ្យលោក អ័ប្រាហាំរួមដំណេកជាមួយនាងហាការ ជាស្រីបម្រើរបស់នាងសារ៉ា ដើម្បីបង្កើតបានកូនប្រុសម្នាក់ (លោកុប្បត្តិ ១៦:១-៤) ។ ការសម្រេចចិត្តរបស់ពួកគេបាននាំឲ្យមានការមិនចុះសម្រុង ភាពវឹកវរ ការប្រមាថមើលងាយ និងសេចក្តីទុក្ខ ព្រោះបន្ទាប់ពីនាងហាការ «ដឹងខ្លួនថាមានទំងន់ដូច្នោះ នោះក៏តាំងមើលងាយដល់ចៅហ្វាយខ្លួនវិញ» (ខ.៤) ។ ពេលនោះ នាងសារ៉ាក៏បានស្តីបន្ទោសលោក អ័ប្រាហាំ ដោយសាររឿងនេះ ហើយគាត់ក៏បានឆ្លើយតប ដោយយករួចខ្លួនថា «មើល បាវស្រីឯងវានៅក្នុងអំណាចរបស់ឯងស្រាប់ហើយ ចូរប្រព្រឹត្តនឹងវាតាមតែឯងគិតឃើញថាយ៉ាងណាស្រួលចុះ» (ខ.៦) ។ ជីវិតរបស់ពួកគេបានប្រែជាមានពេញទៅដោយភាពរញ៉េរញ៉ៃ ។
ប៉ុន្តែ ព្រះទ្រង់បានកែតម្រង់ការសម្រេចចិត្តខុសរបស់ពួកគេ ហើយក៏បានធ្វើអន្តរាគមន៍ ដោយសេចក្តីមេត្តា និងព្រះគុណ ។ ជាបឋម ទេវតានៃព្រះអម្ចាស់បានជួបនាងហាការ នៅពេលដែលនាងអស់ទីពឹង ដោយធានាដល់នាងថា ព្រះវត្តមានរបស់ព្រះស្ថិតនៅក្បែរនាង ហើយប្រកាសប្រាប់ព្រះបន្ទូលសន្យារបស់ព្រះ យ៉ាងដូចនេះថា «អញនឹងចំរើនពូជឯង ឲ្យមានសន្ធឹកឥតគណនា» ។ ទន្ទឹមនឹងនោះ កំហុសដ៏ល្ងង់ខ្លៅរបស់លោក អ័ប្រាហាំ និងនាងសារ៉ា មិនបានរារាំងគោលបំណងនៃសេចក្តីសញ្ញា និងសេចក្តីស្រឡាញ់ដ៏ស្ថិតស្ថេររបស់ព្រះអម្ចាស់ឡើយ ។ ព្រះទ្រង់បានសន្យាថា នាងសារ៉ានឹងបង្កើតបានកូនប្រុសម្នាក់ ដែលត្រូវដាក់ឈ្មោះឲ្យថា អ៊ីសាក់ ហើយបានសន្យាលោក អ័ប្រាហាំថា «អញនឹងតាំងសញ្ញានឹងវា ទុកជាសេចក្ដីសញ្ញាដ៏នៅអស់កល្បជានិច្ច សំរាប់ពូជវាតរៀងទៅ» (លោកុប្បត្តិ ១៧:១៩) ។
ព្រះទ្រង់ក៏ប្រព្រឹត្តិចំពោះយើង តាមរបៀបស្រដៀងនេះផងដែរ ។ ព្រះអង្គយាងមក ហើយរើសបំណែកដ៏រាយប៉ាយនៃជីវិតយើងផ្គុំចូលគ្នា ប្រៀបដូចជាឪពុកម្តាយជួយកូនដែលអស់សង្ឃឹម ។ ព្រះអង្គយាងមករកយើង ដែលកំពុងរស់នៅក្នុងភាពប្រេះបែក ដោយបំណែកនៃការប្រឹងប្រែងជួយខ្លួនឯងនៅរាយប៉ាយជុំវិញយើង បន្ទាប់ពីយើងបានយកផែនការព្រះអង្គទៅទុកនៅកៀនជ្រុង ហើយព្រះអង្គជំនួសបំណែកទាំងនោះ និងចង្អុលបង្ហាញយើងឲ្យងាកទៅរកផែនការទ្រង់ ហើយស្អាងយើងឡើងវិញ ឲ្យដើរតាមផ្លូវត្រូវ ។
តើព្រះទ្រង់បានកែតម្រង់កំហុសរបស់អ្នកប៉ុន្មានដងហើយ ? តើព្រះទ្រង់បានយាងមករកអ្នកប៉ុន្មានដងហើយ នៅពេលដែលអ្នកកំពុងមានកំហុស ការបះបោរ ភាពខ្វះចន្លោះ និងភាពប្រេះបែក ហើយនាំមកនូវព្រឹត្តិការណ៍លើសពីក្តីស្រមៃរបស់យើង ដើម្បីថ្វាយសិរីល្អដល់ព្រះនាមទ្រង់ ។ គឺដូចដែលលោក ម៉ូសេមានប្រសាសន៍ផ្តាំផ្ញើលោក យ៉ូស្វេ ក៏ដូចជាយើងរាល់គ្នាក្នុងពេលសព្វថ្ងៃថា «គឺព្រះយេហូវ៉ាដែលនឹងយាងនាំមុខឯងទៅ ព្រមទាំងគង់ជាមួយនឹងឯង ទ្រង់មិនដែលខាននឹងប្រោសឯងឡើយ ក៏មិនដែលលះចោលឯងដែរ ដូច្នេះកុំឲ្យខ្លាច ឬស្រយុតចិត្តឲ្យសោះ» (ចោទិយកថា ៣១:៨) ។
ខគម្ពីរជញ្ជឹងគិត៖ ទំនុកដំកើង ៤០
គម្រោងអានព្រះគម្ពីររយៈពេល១ឆ្នាំ៖ សុភាសិត ១៣-១៥ និង ទីតុស ២