វិលត្រឡប់មកឯព្រះអង្គវិញ
ដោយAlistair Begg
April 1, 2026
«ចូរវិលមកឯអញវិញ នេះជាព្រះបន្ទូលរបស់ព្រះយេហូវ៉ានៃពួកពលបរិវារ នោះអញនឹងវិលមកឯឯងរាល់គ្នាដែរ នេះក៏ជាព្រះបន្ទូលរបស់ព្រះយេហូវ៉ានៃពួកពលបរិវារ» ។ សាការី ១:៣
មង្គលការអាចមានការពិបាក ។ បើយើងគ្រាន់តែមើលស្ថិតិនៃការលែងលះគ្នា នោះយើងក៏អាចដឹងអំពីបញ្ហានេះដែរ ។ ប្តីនិងប្រពន្ធបានជួបការលំបាកជាច្រើនក្នុងទំនាក់ទំនងរបស់ពួកគេ ចាប់តាំងពីមុនពេលគេបង្កើតច្បាប់ឲ្យលែងលះគ្នា ដោយមិនចាំបាច់បង្ហាញភស្តុតាងនៃកំហុសរបស់ប្តីឬប្រពន្ធ ។ នៅពេលដែលមនុស្សមានបាបពីរនាក់ មានចំណងទាក់ទងនៅក្នុងការតាំងសញ្ញាជាមួយគ្នា ការប៉ះទង្គិចមិនមែនជាករណីលើកលែងឡើយ តែជាផ្នែកមួយនៃទិដ្ឋភាពរួម ។
យើងចូលចិត្តជជែកអំពីពាក្យបីម៉ាត់ដ៏ពិសេសគឺ «បងស្រឡាញ់អូន ឬអូនស្រឡាញ់បង» ដែលអាចទ្រទ្រង់ទំនាក់ទំនងប្តីប្រពន្ធបាន ។ ប៉ុន្តែ ក្នុងអំឡុងពេលដ៏សោកសៅ ពាក្យសុំទោស អាចមានសារសំខាន់ជាងពាក្យបីម៉ាត់នេះទៀត ។ ជាការពិតណាស់ ពាក្យសុំទោស មិនមានន័យអ្វីទេ បើសិនជាយើងនិយាយចេញមកទាំងកំហឹង ដោយចិត្តធុញទ្រាន់ ឬមិនអស់ពីចិត្ត ប៉ុន្តែ ការសុំទោសដោយស្មោះត្រង់ និងការអត់ទោសអស់ពីចិត្ត និងដោយចិត្តស្រទន់ (អេភេសូរ ៤:៣២) ពិតជាអាចទ្រទ្រង់ទំនាក់ទំនងប្តីប្រពន្ធ ។ ឧទាហរណ៍ប្តីនិយាយសុំទោសប្រពន្ធថា ឲ្យបងសុំទោស បងធ្វើខុសហើយ សូមអូនអត់ទោសឲ្យបងផង? សូមយើងចាប់ផ្តើមជាថ្មី ។ បងស្រឡាញ់អូន ។ ចូរយើងបន្តដំណើរទៅមុខទៀតជាមួយគ្នា ។ ទំនាក់ទំនងប្តីប្រពន្ធចាំបាច់ត្រូវមានការចាប់ផ្តើមជាថ្មី ការប៉ះប៉ូវ ឬការស្តាឡើងវិញម្តងហើយម្តងទៀត ។ ហើយពេលណាទំនាក់ទំនងប្តីប្រពន្ធបរាជ័យ គឺច្រើនតែបណ្តាលមកពីស្វាមី ឬប្រពន្ធបដិសេធមិនព្រមងាកបែរមករកគ្នាវិញ ។ (ជូនកាល ព្រះអម្ចាស់អនុញ្ញាតឲ្យបញ្ចប់ទំនាក់ទំនងប្តីប្រពន្ធ ក្នុងករណីមានការផិតក្បត់ ហើយបទគម្ពីរ ១កូរិនថូស៧ ក៏បាននិយាយអំពីការចាកចេញ របស់ប្តីឬប្រពន្ធដែលមិនជឿព្រះ) ។
ការងាកបែរមកវិញនេះ មានភាពចាំបាច់ក្នុងទំនាក់ទំនងប្តីប្រពន្ធរបស់យើង តែក៏ចាំបាច់ ចំពោះទំនាក់ទំនងរវាងយើងនឹងព្រះផងដែរ ។ យើងច្រើនតែធ្វើខុសចំពោះព្រះអង្គ ហើយប្រព្រឹត្តនូវកំហុស ដែលបង្អាប់ព្រះនាមព្រះអង្គ ។ យើងងាកបែរចេញពីព្រះអង្គ ដោយការបះបោរ មិនស្តាប់បង្គាប់ព្រះបន្ទូល ហើយព្យាយាមសម្រេចជោគវាសនាដោយខ្លួនឯង ។ ហេតុនេះហើយ យើងត្រូវប្ដេជ្ញាចិត្តថានឹងវិលត្រឡប់មករកព្រះអង្គ ដូចក្នុងទំនាក់ទំនងប្តីប្រពន្ធដែរ ដោយសារយើងចេះតែវង្វេងចេញពីព្រះអង្គ ។
សាវ័កយ៉ាកុបបានបង្រៀនដោយនិយាយត្រង់ៗ ដើម្បីឲ្យយើង «ចូលទៅជិតព្រះ» (យ៉ាកុប ៤:៨) ។ ព្រះអម្ចាស់ក៏បានត្រាស់ហៅយ៉ាងដូចនេះ តាមហោរាសេផានាផងដែរថា «ចូរវិលមកឯអញវិញ នេះជាព្រះបន្ទូលរបស់ព្រះយេហូវ៉ានៃពួកពលបរិវារ» ។ ក្នុងបទគម្ពីរទាំងពីរនេះ ការវិលទៅរកព្រះអង្គ នាំមកនូវលទ្ធផលដូចគ្នា ដោយព្រះអង្គមានបន្ទូលថា ព្រះអង្គនឹងចូលមកជិតយើងផងដែរ ។ បើយើងសង្ឃឹមថា នឹងបានអរសប្បាយនឹងព្រះវត្តមាននៃព្រះដ៏ធំប្រសើរនៃយើង ហើយស្គាល់ព្រះពររបស់ព្រះអង្គ យើងត្រូវតែប្រាកដថា យើងកំពុងប្រែចិត្តចេញពីបាប ហើយកំពុងងាកទៅរកព្រះអម្ចាស់វិញ ដោយទូលព្រះអង្គថា យើងមានការសោកស្តាយ ហើយយើងត្រូវការការអត់ទោសរបស់ព្រះអង្គ ហើយប្ដេជ្ញាចិត្តបន្តដំណើរទៅមុខជាមួយព្រះអង្គ ។
ពេលយើងប្រព្រឹត្តខុសយើង យើងប្រហែលគិតថា ព្រះអង្គមិនសព្វព្រះទ័យនឹងធ្វើអ្វីជាមួយយើងក្រៅពី ស្អប់ខ្ពើម និងមានសេចក្តីក្រោធចំពោះយើង ។ ប៉ុន្តែ តាមពិត ព្រះអង្គកំពុងរង់ចាំយើងវិលត្រឡប់មកព្រះអង្គវិញ ដើម្បីឲ្យព្រះអង្គបានចូលមកជិតយើងម្តងទៀត ។ ព្រះអង្គមិនដែលបដិសេធមិនឲ្យយើងវិលត្រឡប់មកវិញឡើយ ។ ដូចនេះ នៅថ្ងៃនេះ តើមានផ្នែកណាខ្លះនៃជីវិតអ្នក ដែលអ្នកចាំបាច់ត្រូវវិលទៅរកព្រះអង្គវិញ ហើយទូលសូមព្រះអង្គអត់ទោសឲ្យអ្នក ។ អ្នកត្រូវដឹងថា ពេលណាអ្នកធ្វើដូចនេះ ព្រះអង្គសព្វព្រះទ័យនឹងទទួលអ្នក ហើយធានាដល់អ្នកជាថ្មីថា ព្រះអង្គស្រឡាញ់អ្នក ។
ខគម្ពីរជញ្ជឹងគិត៖ ហូសេ ១៤:១-៩
គម្រោងអានព្រះគម្ពីររយៈពេល១ឆ្នាំ៖ សុភាសិត ២៤-២៦ និង ហេព្រើរ ៣