ព្រះបន្ទូលសន្យាអំពីស្ថានសួគ៌
ដោយAlistair Begg
April 3, 2026
«រួចអ្នកនោះទូលព្រះយេស៊ូវថា ព្រះអម្ចាស់អើយ កាលណាចូលទៅក្នុងនគរទ្រង់ សូមនឹកចាំពីទូលបង្គំផង
ព្រះយេស៊ូវមានបន្ទូលទៅថា ខ្ញុំប្រាប់អ្នកជាប្រាកដថា ថ្ងៃនេះ អ្នកនឹងនៅក្នុងស្ថានបរមសុខជាមួយនឹងខ្ញុំដែរ» ។ លូកា ២៣:៤២-៤៣
ព្រះយេស៊ូវបានជាប់ឆ្កាង នៅចន្លោះឧក្រិដ្ឋជនពីរនាក់ ហើយពួកគេបានឮព្រះបន្ទូលព្រះយេស៊ូវ តែពួកគេបានឆ្លើយតប តាមរបៀបខុសគ្នា ។ បុរសទីមួយដែលជិតស្លាប់បានចាត់ទុកការសុគតរបស់ព្រះអង្គនៅលើឈើឆ្កាងថា មានអត្ថន័យផ្ទុយពីអ្វីដែលគេបានរំពឹងគិត ។ គាត់បានសន្និដ្ឋានថា ដោយសារព្រះយេស៊ូវបានជាប់ឆ្កាង នោះព្រះអង្គមិនមែនជាព្រះអង្គសង្គ្រោះទេ ។ ដូចនេះ គាត់ក៏បានចំអកឲ្យព្រះអង្គថា «បើឯងជាព្រះគ្រីស្ទពិត នោះចូរជួយសង្គ្រោះខ្លួនឯង ហើយនឹងយើងផង» (លូកា ២៣:៣៩) ។ ប៉ុន្តែ បុរសទីពីរបានយល់ឃើញថា ការសុគតនៅលើឈើឆ្កាងគឺជាការបញ្ជាក់ថា ព្រះអង្គគឺជាព្រះមែស៊ី ។ គាត់ទទួលស្គាល់ថា ដោយសារព្រះយេស៊ូវបានជាប់ឆ្កាង នោះព្រះអង្គគឺជាព្រះអង្គសង្គ្រោះពិតប្រាកដមែន ។
ឧក្រិដ្ឋជនម្នាក់នេះ ដែលមានភាពជូរល្វីងក្នុងចិត្ត បានឃើញ និងបានឮព្រះយេស៊ូវមានបន្ទូល ក្នុងម៉ោងចុងក្រោយរបស់ព្រះអង្គ បានជាគាត់សន្និដ្ឋានថា ព្រះអង្គមិនមានទោសអ្វីទេ ។ ហើយព្រះវិញ្ញាណបរិសុទ្ធក៏បានបើកភ្នែកគាត់ ឲ្យបានដឹងថា ទោសរបស់គាត់មានភាពធ្ងន់ធ្ងរ លើសពីអ្វីដែលគាត់ធ្លាប់បានគិត ។ គាត់មិនគ្រាន់តែត្រូវគេកាត់ទោសដោយយុត្តិធម៌ប៉ុណ្ណោះទេ តែក៏បានទទួលការកាត់ទោស ដែលសក្ដិសមនឹងបាបរបស់គាត់ ប៉ុន្តែ គាត់នឹងទទួលទោសអស់កល្បជានិច្ច បើគាត់មិនមានការអត់ទោសបាប ដូចដែលព្រះយេស៊ូវបានមានបន្ទូលទេនោះ ។
បន្ទាប់ពីបានដឹងដូចនេះហើយ បុរសដែលគេបានកាត់ទោសនោះ ក៏បានបន្ទាបខ្លួនទូលសូមដល់ព្រះយេស៊ូវ នូវអ្វីដែលគាត់ដឹងថា គាត់មិនសមនឹងទទួល ។ គឺដូចដែលគាត់បានទូលសូមព្រះអង្គថា «ព្រះអម្ចាស់អើយ កាលណាចូលទៅក្នុងនគរទ្រង់ សូមនឹកចាំពីទូលបង្គំផង» ។ ត្រង់ចំណុចនេះ ផ្អែកទៅលើភស្តុតាង គាត់បានទទួលស្គាល់ការពិតថា បុរសម្នាក់នេះគឺជាព្រះមែស៊ី ដែលត្រូវយាងមក តាមព្រះបន្ទូលសន្យាដែលមានតាំងពីយូរមកហើយ ។ បើទ្រង់គឺជាក្សត្រ នោះព្រះអង្គនឹងមាននគរមួយ គឺនគរព្រះអស់កល្បជានិច្ច ។ ហើយពេលដែលទ្រង់យាងទៅដល់នគរទ្រង់ ព្រះអង្គប្រហែលជានឹកចាំខ្ញុំ ។
ព្រះយេស៊ូវក៏បានឆ្លើយតប យ៉ាងអស្ចារ្យថា «ខ្ញុំប្រាប់អ្នកជាប្រាកដថា ថ្ងៃនេះ អ្នកនឹងនៅក្នុងស្ថានបរមសុខជាមួយនឹងខ្ញុំដែរ» ។ ព្រះយេស៊ូវមិនគ្រាន់តែបានសន្យាបុរសនេះថា គាត់នឹងបានទៅស្ថានសួគ៌ប៉ុណ្ណោះទេ តែក៏បានបញ្ជាក់ថា គាត់នឹងបានទៅស្ថានសួគ៌ជាមួយព្រះអង្គ ក្នុងពេលដ៏ខ្លី «នៅថ្ងៃនេះ»! យើងប្រហែលមិនស្រមៃថា បន្ទាប់ពីពួកគេបានបញ្ចប់ការសន្ទនា ពួកគេមិនជាប់នៅលើឈើឆ្កាងនៅកាល់វ៉ារីទៀតទេ តែបានអង្គុយក្នុងនគរព្រះវិញ ។
ឧក្រិដ្ឋជនម្នាក់នេះមិនបានផ្តល់ឲ្យអ្វីសោះដល់ក្សត្រមួយអង្គនេះ តែបានទូលសូមអ្វីមួយ ដែលមានតម្លៃលើអ្វីៗគ្រប់យ៉ាង ។ ហើយព្រះអង្គឆ្លើយតប ដោយយល់ព្រមចំពោះការទូលសូមនេះ ។ ការនេះគួរតែបានធ្វើឲ្យយើងភ្ញាក់ខ្លួន ហើយធានាដល់យើងជាថ្មី ព្រោះយើងក៏ស្ថិតក្នុងលក្ខខណ្ឌដូចឧក្រិដ្ឋជននោះដែរ ។ យើងគ្មានអ្វីសម្រាប់ថ្វាយព្រះយេស៊ូវទេ ព្រោះការប្រព្រឹត្តរបស់យើងមិនអាចធ្វើជាកូនសោ ដែលបើកផ្លូវចូលទៅនគរព្រះឡើយ ។ ហើយអ្វីដែលយើងមានសម្រាប់ព្រះអង្គ ក៏ជាអ្វីដែលឧក្រិដ្ឋជននោះបានថ្វាយព្រះយេស៊ូវផងដែរ គឺបាបរបស់យើងម្នាក់ៗ ។ ប៉ុន្តែ នេះជាមូលហេតុដែលព្រះយេស៊ូវបានសុគតនៅលើឈើឆ្កាង គឺដើម្បីឲ្យយើងបាននាំបាបយើងទៅថ្វាយដល់ព្រះអង្គ ហើយព្រះអង្គអាចទទួល និងអត់ទោសឲ្យយើង ។ ហេតុនេះហើយ ព្រះបន្ទូលសន្យារបស់ព្រះយេស៊ូវចំពោះឧក្រិដ្ឋជននោះ ក៏ជាព្រះបន្ទូលសន្យាសម្រាប់អ្នកជឿទាំងអស់ដែលបានស្លាប់ផងដែរគឺ «ថ្ងៃនេះ អ្នកនឹងនៅក្នុងស្ថានបរមសុខជាមួយនឹងខ្ញុំដែរ» ។ សូមឲ្យការដឹងដូចនេះ បាននាំឲ្យអ្នកមានក្តីអំណរ និងកម្លាំង ដើម្បីសរសើរតម្កើងព្រះអង្គនៅថ្ងៃនេះ ។ ថ្ងៃមួយ អ្នកនឹងបានទៅនៅជាមួយក្សត្ររបស់អ្នក នៅនគរស្ថានសួគ៌ ។
ខគម្ពីរជញ្ជឹងគិត៖ វិវរណៈ ២១:១-៧
គម្រោងអានព្រះគម្ពីររយៈពេល១ឆ្នាំ៖ សុភាសិត ៣០-៣១ និង ហេព្រើរ ៥