ចាកចេញពីការលាក់បាំង
ដោយAlistair Begg
April 8, 2026
«ហើយមើល មានមនុស្សម្នាក់ឈ្មោះយ៉ូសែប ជាពួកក្រុមជំនុំ ជាមនុស្សល្អ ត្រឹមត្រូវ សុចរិត (លោកនេះមិនបានចូលដៃ ចូលគំនិត ជាមួយនឹងគេទេ) ។ លោកនៅឯអើរីម៉ាថេ ជាភូមិសាសន៍យូដា ហើយក៏រង់ចាំនគរព្រះដែរ ។
លោកទៅឯលោក ពីឡាត់ ដើម្បីនឹងសូមព្រះសពព្រះយេស៊ូវ» ។ លូកា ២៣:៥០-៥២
ការបញ្ចុះព្រះសពរបស់ព្រះយេស៊ូវ មិនមានមនុស្សណាម្នាក់មានផែនការរៀបចំទុកជាមុនទេ ។ ពីព្រោះ ទីមួយ ជាញឹកញាប់ ឧក្រិដ្ឋជនបានទទួលរងការបន្ទាបបន្ថោក មិនគ្រាន់តែតាមរយៈការជាប់ឆ្កាងប៉ុណ្ណោះទេ តែថែមទាំងតាមរយៈការរារាំងមិនឲ្យមានការបញ្ចុះសពឲ្យបានសមរម្យ ។ ទីពីរ ការដោះចេញសពពីឈើឆ្កាង ត្រូវពឹងផ្អែកទាំងស្រុងមកលើសាច់ញាតិ និងមិត្តភក្តិទៅសុំការអនុញ្ញាតយកសពទៅបញ្ចុះ ហើយតើមាននរណាអាចបញ្ចុះព្រះសពព្រះយេស៊ូវបាន? ពួកសិស្សបានរត់គេច ហ្វូងមនុស្សក៏បានត្រឡប់ទៅវិញអស់ ហើយពួកស្រ្តីដែលមានវត្តមាននៅទីនោះ ក៏មិនបានត្រៀមខ្លួន ដើម្បីធ្វើការស្នើសុំនោះឡើយ ។
គឺស្ថិតក្នុងពេលនោះហើយ ដែលមានបុគ្គលម្នាក់បានលេចមុខភ្លាមៗ ស្ងាត់ៗ គាត់«ជាសិស្សរបស់ព្រះយេស៊ូវដោយសំងាត់ ព្រោះខ្លាចពួកយូដា» (យ៉ូហាន ១៩:៣៨) ។ ការភ័យខ្លាចធ្វើឲ្យលោក យ៉ូសែប ជាអ្នកស្រុកអើរីម៉ាថេ មិនហ៊ានចេញមុខជាសាធារណៈ ទាល់តែព្រះយេស៊ូវបានសុគតហើយ ។ ការបង្រៀន និងព្រះជន្មរបស់ព្រះយេស៊ូវ បានទាក់ទាញចំណាប់អារម្មណ៍របស់គាត់ ហើយក៏បាននាំគាត់ឲ្យមានជំនឿដែលបានសង្គ្រោះ ប៉ុន្តែ ជំនឿរបស់គាត់មានការលាក់កំបាំងមិនឲ្យគេដឹង ។ គាត់បានធ្វើការខាងវិញ្ញាណរបស់គាត់ ដោយអាថ៌កំបាំង ទាល់តែឈើឆ្កាងបាននាំគាត់ចេញមុខជាសាធារណៈ ។ ហេតុនេះហើយ បន្ទាប់ពីគាត់មានការលាក់កំបាំងមួយរយៈមក គាត់ក៏បាន «សូមដល់លោក ពីឡាត់ ឲ្យមានច្បាប់នឹងយកព្រះសពព្រះយេស៊ូវចុះមក» ។
កណ្ឌគម្ពីរដំណឹងល្អក៏បានពិពណ៌នា អំពីរបៀបដែលលោក យ៉ូសែបបានរៀបចំព្រះសពព្រះយេស៊ូវយ៉ាងប្រុងប្រយ័ត្ន ដោយគាត់ «យកព្រះសពចុះមកហើយ នោះក៏រុំនឹងសំពត់ទេសឯក នាំទៅបញ្ចុះក្នុងផ្នូរដាប់ក្នុងថ្ម ដែលមិនទាន់មានបញ្ចុះខ្មោចណានៅឡើយ» (លូកា ២៣:៥៣) ។ យើងឃើញថា លោក នីកូដេម «ដែលពីមុនបានទៅឯព្រះយេស៊ូវទាំងយប់ក៏មកដែរ លោកយកជ័រល្វីងទេស លាយនឹងក្រឹស្នា» ដើម្បីជួយលោក យ៉ូសែប ក្នុងការបញ្ចុះព្រះសពព្រះអង្គ (យ៉ូហាន ១៩:៣៩) ។
ការលេចមុខរបស់លោក យ៉ូសែប រយៈពេលខ្លី តែមួយលើកនេះ គឺជាការក្រើនរំឭកដ៏ច្បាស់លាស់ ដល់យើង អំពីការឃុំគ្រងរបស់ព្រះគ្រប់ពេលវេលា និងគ្រប់ទីកន្លែង ។ ព្រះទ្រង់បានត្រៀមលោក យ៉ូសែបទុកសម្រាប់ពេលបែបនេះឯង ។ លោក យ៉ូសែបមានការភ័យខ្លាច និងលាក់កំបាំង ប៉ុន្តែ ព្រះទ្រង់បានប្រើគាត់ ឲ្យមានប្រយោជន៍ ដូចដែលព្រះអង្គប្រើយើងផងដែរ ។ លោក យ៉ូសែបបានខកខានមិនបានចាប់ឱកាសធ្វើបន្ទាល់ពីក្សត្ររបស់គាត់ ដោយគេបានសន្និដ្ឋានថា គាត់បាននៅស្ងៀមជាច្រើនដង នៅពេលដែលគាត់គួរតែនិយាយ ។ ប៉ុន្តែ គាត់គឺជាអ្នកដែលព្រះទ្រង់បានកំណត់ថា នឹងមានវត្តមាននៅថ្ងៃនោះ ដើម្បីធ្វើកិច្ចការដ៏សំខាន់នេះ ។ ហើយលោក យ៉ូសែបក៏បានធ្វើកិច្ចការនេះ ដោយការប្រឈមនឹងការបាត់បង់ ឋានៈ កេរ្តិ៍ឈ្មោះ និងសុវត្ថិភាពរបស់គាត់ ដើម្បីថ្វាយព្រះកិត្តិនាមដល់ព្រះយេស៊ូវ ដោយធានាថា ទ្រង់នឹងមានការបញ្ចុះព្រះសពដ៏សមរម្យ ។
អ្នកប្រហែលជាមានលក្ខណៈមិនខុសពីលោក យ៉ូសែបទេ ដោយអ្នកបានរស់នៅជាសិស្សលាក់មុខ អ្នកជឿព្រះអង្គដែរ តែខ្លាចអ្នកជិតខាង និងមិត្តរួមការងារដឹងថា អ្នកជឿព្រះអង្គ ។ បើដូច្នោះមែន នៅថ្ងៃនេះ ចូរទូលសូមព្រះអម្ចាស់យេស៊ូវគ្រីស្ទ អត់ទោសឲ្យការភ័យខ្លាចរបស់អ្នក និងជួយឲ្យអ្នកក្រោកឈរឡើង ដោយយល់ដល់ឈើឆ្កាង ដើម្បីធ្វើបន្ទាល់ដោយចិត្តក្លាហាន ដោយក្តីស្រឡាញ់ចំពោះព្រះគ្រីស្ទ ។ អ្នកប្រហែលជាបានខកខានកាលពីមុន នៅពេលដែលអ្នកមានឱកាសធ្វើបន្ទាល់ តែព្រះទ្រង់តែងតែត្រៀមជាស្រេច ដើម្បីប្រទានដល់អ្នកនូវកិច្ចការដែលថ្វាយព្រះកិត្តិនាមដល់ព្រះរាជបុត្រា ហើយអ្នកមិនត្រូវឲ្យឱកាសនៅពេលក្រោយ កន្លងផុតទៅឡើយ ។
ខគម្ពីរជញ្ជឹងគិត៖ កិច្ចការ ៤:១-២២
គម្រោងអានព្រះគម្ពីររយៈពេល១ឆ្នាំ៖ លេវីវិន័យ ១១-១២ និង ហេព្រើរ ១០:១-១៨