វិធីដើម្បីឲ្យមានសេចក្តីសង្ឃឹម
ដោយAlistair Begg
April 25, 2026
«តែខ្ញុំនឹកឡើងវិញពីសេចក្ដីនេះ បានជាខ្ញុំមានសេចក្ដីសង្ឃឹមឡើង ។ គឺនឹកពីសេចក្ដីនេះថា កុំតែមានសេចក្ដីសប្បុរសរបស់ព្រះយេហូវ៉ា នោះយើងបានសូន្យបាត់អស់រលីងទៅហើយ ឯសេចក្ដីមេត្តាករុណារបស់ទ្រង់ នោះមិនចេះផុតឡើយ» ។ បរិទេវ ៣:២១-២២
នៅទីបំផុត តើអ្នករកឃើញសង្ឃឹមរបស់អ្នក នៅកន្លែងណា?
នៅពេលដែលគេនិរទេសប្រជាជនអ៊ីស្រាអែល ចូលទៅក្នុងចក្រភពបាប៊ីឡូន ពួកគេក៏បានធ្លាក់ចូលក្នុងភាពអស់សង្ឃឹម ។ អ្វីៗដែលពួកគេធ្លាប់មាន និងធ្លាប់នាំឲ្យពួកគេមានក្តីអំណរ បានបាត់បង់អស់ ដោយត្រូវបន្សល់ទុកចោលនៅនគរយូដា ។ ហោរាយេរេមាក៏បានបង្ហាញអារម្មណ៍របស់គាត់យ៉ាងដូចនេះថា «កំឡាំងខ្ញុំសូន្យបាត់អស់ទៅ សេចក្ដីសង្ឃឹមរបស់ខ្ញុំក៏ផុតចាកពីព្រះយេហូវ៉ាហើយ» (បរិទេវ ៣:១៨) ។ ប៉ុន្តែ នៅក្នុងពីរបីខបន្ទាប់ គាត់បានផ្លាស់ប្តូររបៀបនិយាយទាំងស្រុង ដោយថា «ខ្ញុំនឹកឡើងវិញពីសេចក្ដីនេះ បានជាខ្ញុំមានសេចក្ដីសង្ឃឹមឡើង» (ខ.២១) ។ កាលៈទេសៈមិនបានល្អប្រសើរឡើងទេ ។ គ្មានអ្វីផ្លាស់ប្តូរឡើយ ។ ដូចនេះ តើហេតុអ្វីពាក្យសម្តីរបស់គាត់ស្រាប់តែប្រែជាមានភាពវិជ្ជមាន? យើងអាចឆ្លើយយ៉ាងសាមញ្ញថា នោះគឺដោយសារតែសេចក្តីជំនឿ ។
ជំនឿគ្រីស្ទានមានលក្ខណៈប្រវត្តិសាស្រ្ត និយាយអំពីការពិត និងអំពីមនុស្ស ក្នុងជីវិតពិត ដែលបានជួបយ៉ាងពិតប្រាកដ ជាមួយព្រះពិត ។ ជំនឿគ្រីស្ទានមិនមែនជារឿងប្រឌិតនោះទេ ។ ហេតុនេះហើយ ជំនឿគ្រីស្ទានបាននាំមកនូវការផ្លាស់ប្តូរពិតប្រាកដ ។ គ្មានបទពិសោធន៍ណាមួយក្នុងជីវិតនេះ ដែលមានតែរដូវកាលដែលអរសប្បាយ និងជោគជ័យនោះទេ ។ ទុក្ខលំបាកធ្វើឲ្យយើងដឹងថា សមត្ថភាពរបស់យើងមានដែនកំណត់ ។ មនុស្សជាទីស្រឡាញ់របស់យើងស្លាប់ ទំនាក់ទំនងប្តីប្រពន្ធប្រេះឆា ទោះយើងបានប្រឹងប្រែងអស់ពីលទ្ធភាពដើម្បីទ្រទ្រង់វា សុខភាពរបស់យើងក៏ធ្លាក់ចុះ ហើយកំហុសពីអតីតកាលក៏បានតាមលងបន្លាចយើង ប្រៀបដូចជាវិញ្ញាណអាក្រក់នៅពេលយប់ ។
ដូចនេះ តើយើងចាំបាច់ត្រូវធ្វើអ្វី នៅពេលដែលជីវិតជួបទុក្ខលំបាក? យើងចាំបាច់ត្រូវធ្វើដូចលោក យេរេមា! គាត់បានចាប់ផ្តើមការឆ្លើយតបចំពោះទុក្ខលំបាក ដោយប្រើសេចក្តីជំនឿរបស់គាត់ ដែលជឿថា ព្រះទ្រង់ជានរណា និងបានធ្វើអ្វីខ្លះ ហើយគាត់ក៏បានពិចារណា ។ គំនិតរបស់គាត់ត្រូវបានដឹកនាំដោយសេចក្តីពិត មិនមែនដឹកនាំដោយអារម្មណ៍នោះទេ ។ ក្នុងទុក្ខលំបាករបស់យើង យើងត្រូវនឹកចាំថា ព្រះទ្រង់ជានរណា ហើយបន្ទាប់មក ត្រូវនាំសេចក្តីសំណូមដ៏ស្មោះត្រង់ចូលមករកព្រះអង្គ ។ អ្នកអាចអធិស្ឋានថា «ឱព្រះប្រកបដោយព្រះគុណ ព្រះអង្គបានបង្កើតទូលបង្គំ ។ ព្រះអង្គស្រឡាញ់ទូលបង្គំ នៅក្នុងព្រះយេស៊ូវ ។ ព្រះអង្គបានសន្យាថា ព្រះអង្គនឹងថែរក្សាទូលបង្គំ ។ ទូលបង្គំមានអារម្មណ៍ថា មិនសូវមានសុវត្ថិភាព ក្នុងពេលឥឡូវនេះ ឱព្រះអម្ចាស់អើយ តែទូលបង្គំក៏ដឹងផងដែរថា ព្រះបន្ទូលព្រះអង្គបានចែងថា សេចក្តីស្រឡាញ់របស់ព្រះអង្គមិនដែលចប់ ហើយសេចក្តីមេត្តារបស់ព្រះអង្គស្ថិតស្ថេរជាដរាប» ។
ក្នុងពេលដែលយើងមានភាពជោគជ័យ ក៏ដូចជាពេលដែលយើងមានទុក្ខលំបាក យើងអាចមានភាពនឹងនរបាន ព្រោះសេចក្តីស្រឡាញ់ និងសេចក្តីមេត្តាដ៏ស្ថិតស្ថេរ ដែលព្រះទ្រង់មានចំពោះយើង មិនដែលហួសពេលកំណត់ឡើយ ។ ចូរទុកចិត្តថា ទោះអ្នកជួបទុក្ខលំបាកយ៉ាងណាក៏ដោយ ព្រះអម្ចាស់មានគ្រប់ព្រះចេស្តា ទ្រង់សោយរាជ្យ យ៉ាងល្អឥតខ្ចោះ ដោយសេចក្តីស្រឡាញ់ និងសេចក្តីមេត្តា ។ ព្រះអង្គនឹងសម្រេចបំណងព្រះទ័យទ្រង់ ។ គ្មានអ្វីអាចរារាំងព្រះអង្គបានទេ ។ នៅថ្ងៃដែលមានបញ្ហា ចូររំឭកខ្លួនឯងអំពីសេចក្តីពិតនេះ ហើយអ្នកអាចរស់នៅ ដោយក្តីសង្ឃឹមដ៏រឹងមាំ ក្នុងចិត្តអ្នក ហើយនៅតែឈរយ៉ាងមាំ ក្នុងសេចក្តីជំនឿដល់ទីបញ្ចប់ ។
ខគម្ពីរជញ្ជឹងគិត៖ បរិទេវ ៣:១៦-៣៣
គម្រោងអានព្រះគម្ពីររយៈពេល១ឆ្នាំ៖ សាស្តា ៧-៩ និង វិវរណៈ ១២