ឃើញព្រះយេស៊ូវម្តងទៀត
ដោយAlistair Begg
April 26, 2026
«ហើយកាលទ្រង់បានរងទុក្ខរួចហើយ នោះក៏បានសំដែងអង្គទ្រង់មកទាំងរស់ ឲ្យពួកសាវកនោះឃើញ ដោយសារភស្តុតាងជាច្រើន ព្រមទាំងលេចមកឯគេ ក៏សំដែងពីអស់ទាំងសេចក្ដីខាងឯនគរព្រះ ក្នុងរវាង៤០ថ្ងៃ» ។ កិច្ចការ ១:៣
បន្ទាប់ពីព្រះយេស៊ូវមានព្រះជន្មរស់ឡើងវិញ ព្រះអង្គអាចយាងឡើងស្ថានសួគ៌ភ្លាមៗតែម្តង ។ និយាយរួម ព្រះរាជកិច្ចនៃការប្រោសលោះបានសម្រេចហើយ ។ ព្រះអង្គបានធ្វើការប្រោសលោះទាំងស្រុង ក្នុងការសុគតរបស់ព្រះអង្គ ហើយព្រះអង្គក៏មានជ័យជម្នះមកលើសេចក្តីស្លាប់ ។ ហេតុអ្វីព្រះអង្គមិនយាងត្រឡប់ទៅរកព្រះវរបិតាវិញ ភ្លាមៗតែម្តងទៅ? មូលហេតុគឺដោយសារព្រះអង្គមិនសព្វព្រះទ័យនឹងទុកឲ្យអ្នកដើរតាមព្រះអង្គ នៅសល់តែការចងចាំចុងក្រោយ អំពីការដែលព្រះអង្គបានហូរព្រះលោហិត និងត្រូវគេវាយដំ ហើយជាប់ឆ្កាងតែប៉ុណ្ណោះទេ ។ ផ្ទុយទៅវិញ រឿងចុងក្រោយដែលពួកគេត្រូវចងចាំនោះគឺ ការមានព្រះជន្មឡើងវិញរបស់ព្រះគ្រីស្ទ ។ ការមានព្រះជន្មឡើងវិញ គឺជាសញ្ញាសម្គាល់នៃព្រះគុណ និងសេចក្តីសប្បុរសរបស់ព្រះអង្គ ដែលបន្ទាប់ពីព្រះអង្គមានព្រះជន្មឡើងវិញ ព្រះអង្គបាន «បង្ហាញអង្គទ្រង់មកទាំងរស់» ដល់ពួកសាវ័កទ្រង់ ។ ព្រះអង្គបានឆ្លើយសំណួររបស់ពួកគេ ។ ពួកគេក៏បានឈប់យំទៀត ។ ព្រះអង្គ «បើកគំនិតរបស់ពួកគេ» ឲ្យយល់ព្រះគម្ពីរសញ្ញាចាស់កាន់តែច្បាស់ (លូកា ២៤:៤៥) ។ ព្រះអង្គក៏បានត្រៀមពួកគេ សម្រាប់ការយាងមកនៃព្រះវិញ្ញាណបរិសុទ្ធ ។ បន្ទាប់មក ព្រះអង្គក៏បានយាងឡើងស្ថានសួគ៌វិញ ។
លោក ថូម៉ាស ដែលមានពេញដោយការសង្ស័យ មានចិត្តរីករាយយ៉ាងណា នៅពេលដែលព្រះយេស៊ូវមិនបានយាងឡើងស្ថានសួគ៌ភ្លាមៗតែម្តង! បើព្រះយេស៊ូវមិនបានធ្វើដូចនេះទេ នោះលោក ថូម៉ាសក៏មិនអាចជួបព្រះអង្គសង្គ្រោះរបស់គាត់ និងទទួលបានចម្លើយសម្រាប់សំណួររបស់គាត់ ហើយឈប់មានការភ័យខ្លាចឡើយ (យ៉ូហាន ២០:២៤-២៩) ។ ជាការពិតណាស់ លោក ពេត្រុសក៏ដូច្នោះដែរ ក្នុងពេលដែលគាត់បាក់ទឹកចិត្ត និងមានភាពអាម៉ាស គាត់មានចិត្តរីករាយ ចំពោះឱកាសចំណាយពេលជាមួយព្រះយេស៊ូវ ដែលមានព្រះជន្មរស់ឡើងវិញ ។ គាត់បានបដិសេធព្រះគ្រីស្ទម្តងហើយម្តងទៀត នៅពេលដ៏សំខាន់ ។ ប៉ុន្តែ បន្ទាប់មក ព្រះយេស៊ូវក៏បានយាងមក ហើយជួបគាត់នៅលើឆ្នេរសមុទ្រ ចម្អិនអាហារពេលព្រឹកឲ្យគាត់ ហើយប្រទានឱកាសឲ្យគាត់បានស្អាងឡើងវិញ ដោយធ្វើការបញ្ជាក់បីដង អំពីសេចក្តីស្រឡាញ់ចំពោះព្រះគ្រីស្ទ (២១:១៥-១៩) ។ តើអ្នកមិនគិតដែរឬទេថា ព្រះមាតារបស់ព្រះយេស៊ូវក៏មានចិត្តត្រេកអរប៉ុណ្ណា ក្នុងរយៈពេល៤០ថ្ងៃនោះ? នាងធ្លាប់ដាក់ទ្រង់ផ្ទំក្នុងស្នូកសត្វ ក៏បានឃើញគេប្រព្រឹត្តយ៉ាងព្រៃផ្សៃមកលើព្រះអង្គ នៅឈើឆ្កាង ។ ប៉ុន្តែ នាងម៉ារា ជាអ្នកស្រុកម៉ាកដាឡា ក៏បានមើលឃើញព្រះយេស៊ូវជាលើកចុងក្រោយ នៅពេលព្រះអង្គយាងឡើងស្ថានសួគ៌វិញ គឺជាការមើលឃើញ ដែលបណ្តាលចិត្តនាង និងអ្នកដែលនៅជាមួយនាងឲ្យថ្វាយបង្គំព្រះអង្គ ហើយវិលត្រឡប់ទៅទីក្រុងយេរូសាឡិមវិញ «ដោយអំណរជាខ្លាំង» (លូកា ២៤:៥២) ។
ការបង្ហាញអង្គទ្រង់ ក្នុងលក្ខណៈជាក្សត្រដែលមានព្រះជន្មរស់ឡើងវិញ និងមានគ្រប់ចេស្តា គឺជាដំណោះស្រាយ សម្រាប់យើងរាល់គ្នា ដែលកំពុងតែទៅកន្លែងផ្សេងទៀត ដើម្បីស្វែងរកថ្នាំបន្សាប សម្រាប់ការសង្ស័យ ក្តីអាម៉ាស់ ការភ័យខ្លាច ឬការសោកសង្រេង ។ ឈើឆ្កាងនៅទទេ គឺដូចដែលផ្នូរនៅទទេដែរ ។ ព្រះយេស៊ូវដែលជាក្សត្រ ទ្រង់កំពុងគង់នៅក្នុងស្ថានសួគ៌របស់ទ្រង់ ហើយព្រះអង្គនឹងយាងត្រឡប់មកវិញ ។ ទំរាំដល់ពេលនោះ ចូរងើបក្បាលឡើង ដោយដឹងថា ព្រះអង្គសង្គ្រោះរបស់អ្នក ទ្រង់មានព្រះជន្មរស់ ហើយនគរទ្រង់បានបើកទ្វារចំហ ហើយចូរមានការលើកទឹកចិត្ត ខណៈពេលដែលអ្នកសរសើរដំកើងក្សត្ររបស់អ្នកថា :
សូមសរសើរដំកើង ព្រះយេស៊ូវ ដែលគ្រងរាជ ដោយសិរីល្អ
ព្រះអង្គនឹងគង់នៅជារៀងរហូត
អស់ពួកទេវតាស្រឡាញ់ព្រះអង្គ
ដែលគង់នៅខាងស្តាំព្រះវរបិតា
ព្រះអង្គកំពុងអង្វរឲ្យមនុស្សមានបាប
ព្រះអង្គក៏កំពុងរៀបចំកន្លែងឲ្យយើងខ្ញុំ
ព្រះអង្គកំពុងទូលអង្វរឲ្យពួកបរិសុទ្ធ
រហូតដល់ពេលដែលពួកគេនឹងលេចឡើង ក្នុងសិរីល្អ ។ 34
ខគម្ពីរជញ្ជឹងគិត៖ លូកា ២៤:៣៦-៤៣
គម្រោងអានព្រះគម្ពីររយៈពេល១ឆ្នាំ៖ សាស្តា ១០-១២ និង វិវរណៈ ១៣