ដង្វាយលោះបាបដែលមាននាមប្រសើរជាង
ដោយAlistair Begg
May 15, 2026
«ពីព្រោះអញនឹងអាណិតមេត្តាចំពោះសេចក្ដីទុច្ចរិតរបស់គេ ហើយអញនឹងលែងនឹកចាំពីអំពើបាប នឹងសេចក្ដីទទឹងច្បាប់របស់គេទៀត» ហេព្រើរ ៨:១២ ។
ពេលណាយើងមានអារម្មណ៍ឃ្លាតចេញឆ្ងាយពីព្រះ ពីអ្នកដទៃ ហើយថែមទាំងឃ្លាតចេញឆ្ងាយពីចិត្តខ្លួនឯង នោះយើងគួរដឹងផងដែរថា ការឈឺចាប់នេះ ច្រើនតែកើតចេញពីការមានសម្បជញ្ញៈដែលប្រកាន់ទោសខ្លួនឯង ។ ពេលវេលាកន្លងផុតទៅ យើងនៅតែមានការជាប់រវល់ យើងបានសាកល្បងប្រើដំណោះស្រាយផ្សេងៗ តែយើងមានបន្ទុកកាន់តែធ្ងន់ ដោយការមិនឲ្យតម្លៃខ្លួនឯង ។ ព្រះគម្ពីរប៊ីបបានបង្រៀនយើងថា ព្រះទ្រង់បានបង្កើតយើងមក ឲ្យរស់នៅជាមនុស្សដែលមានក្រមសីលធម៌ ដែលដឹងខុសត្រូវនៅក្នុងចិត្ត ។ យើងដឹងថា យើងបានប្រព្រឹត្តខុស នៅពេលដែលយើងធ្វើខុសស្តង់ដារដែលព្រះអង្គបានកំណត់ ។ យើងអាចព្យាយាមគ្របសង្កត់សម្លេងសម្បជញ្ញៈដែលកំពុងតែជេរស្តីឲ្យយើង តែយើងមិនអាចធ្វើឲ្យវាឈប់ដាស់តឿនយើងបានឡើយ ។ បន្ទាប់មក ព្រះបន្ទូលព្រះក៏បាននិយាយមកកាន់ចិត្តរបស់យើងដែលកំពុងមានបញ្ហា មិនមែនដើម្បីបំផ្លាញយើងទេ តែដើម្បីដឹកនាំយើងទៅរកព្រះអង្គសង្គ្រោះ ដែលមានតែទ្រង់ទេ ដែលអាចលាងសម្អាតបាប និងកំហុសរបស់យើងបាន ។
ព្រះទ្រង់បានបង្កើតប្រព័ន្ធថ្វាយដង្វាយលោះបាប នៅគ្រាសញ្ញាចាស់ គ្រាន់តែដើម្បីធ្វើជាស្រមោល និងតំណាងឲ្យការលោះបាបពិតប្រាកដ ដែលត្រូវមកដល់ ។ ទោះមនុស្សមានពិធីបុណ្យផ្សេងៗ ការលាងសម្អាត និងក្រឹត្យវិន័យខាងក្រៅក៏ដោយ ក៏សម័យនោះ ផ្លូវចូលទៅរកព្រះស្ថិតនៅក្នុងការរឹតបន្តឹង ដោយការលាងសម្អាត គ្រាន់តែអាចជួយបានមួយផ្នែក និងបណ្ដោះអាសន្ន ហើយការលើកលែងទោសក៏មានកំណត់ ។ ដង្វាយលោះបាបទាំងនោះ មិនអាចជួយអ្វីបានច្រើនទេ ។
នៅចន្លោះព្រះ និងមនុស្សជាតិ មានឧបសគ្គមួយដែលប្រព័ន្ធនោះមិនអាចដកចេញបាន គឺជាចិត្តដែលមានបាប ដែលត្រូវលាងសម្អាត មុនពេលយើងអាចចូលទៅក្នុងព្រះវត្តមានរបស់ព្រះដ៏បរិសុទ្ធ ។
ទោះជាយ៉ាងណាក៏ដោយ យើងមានដំណឹងល្អមួយ! គ្មានការប្រព្រឹត្តខាងក្រៅខ្លួនច្រើនយ៉ាងណា ដែលអាចសង្គ្រោះ អត់ទោស ឬលាងសម្អាតសម្បជញ្ញៈដែលប្រកាន់ទោសខ្លួនឯងបានទេ ហេតុនេះហើយព្រះទ្រង់សន្យាថា ព្រះអង្គនឹងមានសេចក្តីមេត្តា ចំពោះអំពើរំលងរបស់យើង ហើយមិននឹកចាំបាបរបស់យើងទៀតទេ គឺដោយសារការសុគតរបស់ព្រះយេស៊ូវដែលបានលោះបាប ។ ការសន្យានេះ គឺជាសេចក្តីពិតដែលគួរឲ្យស្ញប់ស្ញែង ហើយក៏នាំមកនូវការផ្លាស់ប្រែជីវិតផងដែរ ។ យើងបានរួចពីបាប ដោយសារព្រះយេស៊ូវ ជាព្រះដែលបានយកកំណើតជាមនុស្ស ។ ដូចនេះ យើងមានក្តីសង្ឃឹមសម្រាប់អ្នកដែលកំពុងវិប្បដិសារី អ្នកដែលបានប្រព្រឹត្តខុសនឹងព្រះ អ្នកដែលស្រេកឃ្លានការលាងសម្អាតបាប ដែលពេញលេញ ។ គឺដូចដែលអ្នកនិពន្ធទំនុកសកលបានសរសេរថា:
ឈាមរបស់សត្វទាំងអស់
ដែលគេថ្វាយនៅលើអាសនានៃសាសន៍យូដា
មិនអាចជួយចិត្តមនុស្សដែលមានទោស ឲ្យមានសន្តិភាព
ឬលាងសម្អាតស្នាមប្រឡាក់នៃបាបបានទេ
តែព្រះគ្រីស្ទ ជាកូនចៀមមកពីស្ថានសួគ៌
ដកបាបរបស់យើងទាំងអស់ចេញ
គឺជាដង្វាយដែលមាននាមប្រសើរជាង
និងមានព្រះលោហិតដែលលាងជ្រះជាង ។38
សន្តិភាពពិតប្រាកដអាចកើតមានក្នុងចិត្តអ្នក ពេលណាអ្នកព្រមទទួលស្គាល់ថា កំហុសរបស់អ្នក មិនអាចលប់លាង ឬបន្ធូរបន្ថយ ដោយសារការខំប្រព្រឹត្តល្អ ។ ព្រះទ្រង់មានការអត់ទោសបាបសម្រាប់អ្នក ពីអតីតកាល ក្នុងពេលបច្ចុប្បន្ន និងពេលអនាគត ។ តើអ្នកមានបាបអ្វី ដែលត្រូវនាំមកសារភាពនៅចំពោះព្រះគ្រីស្ទទេ ? ចូរនាំបាបនោះមកក្នុងពេលឥឡូវនេះ ហើយអរសប្បាយឡើង ដោយដឹងថា ព្រះទ្រង់មិនប្រកាន់ទោសអ្នកទៀតទេ ។
ខគម្ពីរជញ្ជឹងគិត៖ ទំនុកដំកើង ៥១
គម្រោងអានព្រះគម្ពីររយៈពេល១ឆ្នាំ៖ ១ពង្សាវតាក្សត្រ ៨-៩ និង ម៉ាថាយ ៨:១-១៧