ចូរបន្ថែមសេចក្តីស្រឡាញ់
ដោយAlistair Begg
May 22, 2026
«ចូរបន្ថែមទាំងសេចក្ដីស្រឡាញ់ថែមទៀត ជាចំណងនៃសេចក្ដីគ្រប់លក្ខណ៍» ។ កូល៉ុស ៣:១៤
អស់រយៈពេលជាច្រើនឆ្នាំហើយ ដែលវប្បធម៌លោកខាងលិចមានការជាប់ចិត្តយ៉ាងខ្លាំង នឹងទស្សនៈដែលយល់ឃើញថា សេចក្តីស្រឡាញ់នឹងដោះស្រាយបញ្ហាគ្រប់យ៉ាង ។ គេច្រៀងថា «អ្វីដែលយើងត្រូវការគឺសេចក្តីស្រឡាញ់» ។41 គេក៏និយាយផងដែរថា «សេចក្តីស្រឡាញ់អាចឈ្នះអ្វីៗទាំងអស់» ។42 ពាក្យពេចន៍ទាំងនេះ មានសេចក្តីពិតខ្លះៗដែរ ។ សេចក្តីស្រឡាញ់របស់ព្រះអាចដោះស្រាយបញ្ហាគ្រប់យ៉ាងដែលយើងមាន បើសិនជាយើងចុះចូលព្រះអង្គ តាមបំណងព្រះទ័យរបស់ព្រះអង្គ ។ ប៉ុន្តែ បញ្ហាស្ថិតនៅត្រង់ថា តាមនិស្ស័យសាច់ឈាមរបស់យើង យើងមិនចុះចូលព្រះអង្គ តាមរបៀបនេះទេ ហើយជាងនេះទៅទៀត សង្គមជាទូទៅច្រើនតែមានការយល់ឃើញអំពីសេចក្តីស្រឡាញ់ ដែលសមស្របនឹងសេចក្តីស្រឡាញ់ដ៏ពិតរបស់ព្រះ តែបន្តិចបន្តួចប៉ុណ្ណោះ ។
ជាញឹកញាប់ មនុស្សមានចំណងទាក់ទងដោយ «ក្តីស្រឡាញ់» ដោយសារពួកគេចំណងចំណូលចិត្ត ឬសភាវគតិដូចគ្នា ។ មនុស្សដែលដូចយើង ឬមានការការទាក់ទាញចំពោះយើង គឺជាមនុស្សដែលយើងចង់ទៅក្បែរ និងយកចិត្តទុកដាក់ចំពោះពួកគេ តាមសភាវគតិរបស់យើង ។ ទោះជាយ៉ាងណាក៏ដោយ ក្នុងពួកជំនុំ ក្តីស្រឡាញ់ដែលយើងមានចំពោះគ្នាទៅវិញទៅមក គឺបានចាក់គ្រឹះនៅក្នុងព្រះយេស៊ូវគ្រីស្ទ ។ និយាយរួម យើងមានចំណងទាក់ទងជាមួយគ្នា មិនមែនដោយសារមានចារិកលក្ខណៈ ឬចំណង់ចំណូលចិត្តដូចគ្នា ឬដោយសារការទាក់ទាញទៅវិញទៅមកនោះទេ តែដោយសារព្រះអម្ចាស់ ដែលបានធ្វើការតាមរយៈព្រះយេស៊ូវគ្រីស្ទ ដើម្បី «រុះជញ្ជាំងដែលខាន់កណ្ដាលចេញ» (អេភេសូរ ២:១៤) ដែលរាប់បញ្ចូលរនាំងទាំងឡាយ នៅចន្លោះមនុស្ស ដែលមានដូចជាជាតិសាសន៍ វណ្ណៈ ភេទ ភាសា ឬសញ្ជាតិ ។
សង្គមរបស់យើងនៅតែមិនអាចមានសេចក្តីស្រឡាញ់ពិតប្រាកដ ទោះវប្បធម៌យើងចង់បានអ្វីក៏ដោយ ដរាបណាយើងមានទស្សនៈអំពីសេចក្តីស្រឡាញ់ ផ្អែកទៅលើការអ្វីក៏ដោយដែលយើងជ្រើសរើស និងអារម្មណ៍របស់យើង ។ មានតែសេចក្តីស្រឡាញ់មិនចេះប្រែប្រួល មិនផ្តេកផ្តួលតាមគំនិតរបស់មនុស្ស ជាសេចក្តីស្រឡាញ់ដែលព្រះមានចំពោះយើង ក្នុងព្រះគ្រីស្ទទេ ដែលចងភ្ជាប់អ្វីៗគ្រប់យ៉ាង ដោយភាពសុខដុមដ៏ឥតខ្ចោះ (កូល៉ុស ៣:១៤) ។ មានតែតាមរយៈសេចក្តីស្រឡាញ់ដ៏ស្ថិតស្ថេរដែលព្រះទ្រង់មានចំពោះយើង តាមរយៈព្រះរាជបុត្រា និងព្រះវិញ្ញាណរបស់ទ្រង់ទេ ដែលអាចបំពេញយើងយ៉ាងគ្រប់គ្រាន់ ដើម្បីឲ្យយើងអាចស្រឡាញ់គ្នាទៅវិញទៅមក តាមបំណងព្រះទ័យព្រះអង្គ ពីដើមមក ។
បើគ្មានសេចក្តីស្រឡាញ់របស់ព្រះ ធ្វើជាដីទេ នោះគ្រាប់ពូជនៃសេចក្តីស្រឡាញ់ដែលយើងបានបណ្ដុះក្នុងជីវិតនេះ មិនអាចលូតលាស់ និងចម្រើនឡើងឈានទៅដល់សក្ដានុពលដ៏អស់កល្បបានទេ ។ ដូចនេះ ខណៈពេលដែលអ្នកស្វែងរកព្រះ និងសេចក្តីពិតរបស់ព្រះអង្គនៅថ្ងៃនេះ ចូរទូលសូមព្រះអង្គឲ្យបំពេញអ្នក ដោយសេចក្តីមេត្តា សេចក្តីសប្បុរស សេចក្តីអាណិត ព្រះគុណ និងជាពិសេសសេចក្តីស្រឡាញ់! ហើយត្រូវប្រាកដថា អ្វីដែលសំខាន់បំផុតចំពោះចិត្តរបស់អ្នក មិនមែនជាអារម្មណ៍ដែលអ្នកដទៃមានចំពោះអ្នក ឬអារម្មណ៍ដែលអ្នកមានចំពោះគេឡើយ តែជាអារម្មណ៍ដែលព្រះវរបិតាមានចំពោះអ្នក ព្រោះអ្នកបានរួបរួមជាមួយព្រះអម្ចាស់យេស៊ូវ ជាព្រះរាជបុត្រាទ្រង់ ដោយសារសេចក្តីជំនឿ ។ ចូរដឹងថា «នេះហើយជាសេចក្ដីស្រឡាញ់ ...គឺទ្រង់បានស្រឡាញ់យើងវិញទេតើ ហើយបានចាត់ព្រះរាជបុត្រាទ្រង់ឲ្យមក ទុកជាដង្វាយឲ្យធួននឹងបាបយើងរាល់គ្នាផង» (១យ៉ូហាន ៤:១០) ហើយដឹងថា អ្នកមិនអាចទទួលសេចក្តីស្រឡាញ់ពីព្រះលើសពីពេលបច្ចុប្បន្ននោះទេ ។ ការដឹងដូចនេះ ជួយឲ្យអ្នកដឹងអំពីរបៀបស្រឡាញ់អ្នកដទៃ និងរំដោះអ្នកឲ្យរួចផុតពីការត្រូវការអ្វីមួយពីពួកគេ ហើយអ្នកអាចផ្តល់ឲ្យពួកគេវិញ ។ ដូចនេះ «ចូរបន្ថែមសេចក្តីស្រឡាញ់ថែមទៀត» ដ្បិតព្រះវរបិតារបស់អ្នកដែលគង់នៅស្ថានសួគ៌ ទ្រង់សព្វព្រះទ័យទ្រទ្រង់អ្នក ខណៈពេលដែលអ្នកព្យាយាមស្រឡាញ់ព្រះអង្គ និងអ្នកដទៃថែមទៀត ។
ខគម្ពីរជញ្ជឹងគិត៖ កូល៉ុស ៣:៥-១៤
គម្រោងអានព្រះគម្ពីររយៈពេល១ឆ្នាំ៖ ២ពង្សាវតាក្សត្រ ១-៣ និង ម៉ាថាយ ១២:១-២១