បានរួចផុតពីចំណងនៃសេចក្តីស្លាប់
ដោយAlistair Begg
May 26, 2026
«កាលទ្រង់បានយាងឡើងពីទូក ស្រាប់តែមានមនុស្សម្នាក់ដែលមានអារក្សអសោចិ៍ចូល វាចេញពីក្នុងផ្នូរខ្មោចមកជួបនឹងទ្រង់ ... វានៅក្នុងផ្នូរនៅលើភ្នំ ទាំងស្រែក ហើយយកថ្មមកអារសាច់ខ្លួន ទាំងយប់ទាំងថ្ងៃជានិច្ច ។ កាលវាឃើញព្រះយេស៊ូវពីចំងាយក៏រត់ទៅក្រាបសំពះទ្រង់» ។ ម៉ាកុស ៥:២,៥-៦
ក្នុងបទគម្ពីរម៉ាកុស ជំពូក៥ បុរសដែលអារក្សចូល កំពុងតែរស់នៅម្នាក់ឯង យ៉ាងកណ្ដោចកណ្ដែងបំផុត ។ គាត់បានដាច់ចេញពីសហគមន៍របស់គាត់ ហើយតាមន័យត្រង់ គាត់ក៏ដាច់ចេញពីខ្លួនឯងផងដែរ ។ និយាយរួម គាត់មានភាពឯកោទាំងស្រុង ។ គាត់កំពុងត្រូវការជំនួយយ៉ាងខ្លាំង ។
យើងប្រហែលជាគិតថា យើងមិនមានលក្ខណៈដូចបុរសនេះទេ ។ ព្រោះយើងមានខោអាវស្លៀកពាក់ ។ យើងអាចនិយាយមានហេតុផល ។ គ្មាននរណាចាប់យើងចងទេ ។ ហើយយើងក៏មិនត្រូវអារក្សចូលដែរ ។ ប៉ុន្តែ បុរសម្នាក់នេះបានឆ្លុះបញ្ចាំងអំពីសណ្ឋាននៃវិញ្ញាណរបស់យើង ដែលគួរឲ្យយកមកពិចារណា ។ ព្រះគម្ពីរប៊ីបបានចែងថា តាមនិស្ស័យសាច់ឈាម យើងរាល់គ្នាសុទ្ធតែស្ថិតក្រោមការគ្រប់គ្រងរបស់អំណាចនៃសេចក្តីងងឹត និងសេចក្តីអាក្រក់ ហើយក៏បានស្លាប់នៅក្នុងអំពើបាប (អេភេសូរ ២:១-៣) ។ បើយើងមិននៅក្នុងព្រះគ្រីស្ទទេ គឺយើងកំពុងរស់នៅក្នុងផ្នូរខ្មោច ហើយក៏យើងក៏រស់នៅខាងរូបកាយ តែស្លាប់ខាងវិញ្ញាណ ។
ហេតុនេះហើយ ពេលដែលយើងទទួលជឿព្រះគ្រីស្ទ គឺជាពេលដែលរំភើបយ៉ាងខ្លាំង ។ សម្រាប់យើងម្នាក់ៗ សេចក្តីសង្គ្រោះ គឺជាការប្រឈមមុខដាក់គ្នារវាងជីវិត និងសេចក្តីស្លាប់ ពន្លឺ និងសេចក្តីងងឹត អំណាចនៃព្រះគ្រីស្ទ និងអំណាចនៃសេចក្តីអាក្រក់ ។ ដំណឹងល្អមិនគ្រាន់តែផ្តល់ឲ្យនូវគោលបំណងសម្រាប់ជីវិតប៉ុណ្ណោះទេ ។ ដំណឹងល្អនាំមកនូវជីវិត ។ នេះក៏ជាមូលហេតុដែលការផ្លាស់ប្រែក្នុងព្រះគ្រីស្ទ មានការឈឺចាប់យ៉ាងខ្លាំង ។ យើងមិនគួរធ្វើពុតជាជឿថា ការចុះចូលព្រះគ្រីស្ទមានភាពងាយស្រួលនោះទេ ។ នៅពេលដែលបុរសអារក្សចូលនោះបានជួបព្រះយេស៊ូវ គាត់ហាក់ដូចជាដឹងថា ព្រះគ្រីស្ទគឺជាអ្នកដែលអាចរំដោះគាត់ឲ្យមានសេរីភាព ប៉ុន្តែ ទន្ទឹមនឹងនោះ គាត់ក៏មានការភ័យខ្លាច ដោយមិនដឹងថា ការផ្លាស់ប្តូរនឹងមានលក្ខណៈដូចម្តេច ។ លោកគ្រូ ស៊ីនគ្លែ ហ្វឺគូសិន (Sinclair Ferguson) បានមានប្រសាសន៍ថា «តាមនិស្ស័យសាច់ឈាម គ្មានមនុស្សណាដែលចុះចូលព្រះយេស៊ូវយ៉ាងងាយស្រួលនោះទេ ។ អ្វីដែលគួរឲ្យសោកស្តាយនោះ មនុស្សមានលក្ខណៈមិនខុសពីបុរសអារក្សចូលឡើយ ដោយពួកគេច្រើនតែបន្តរស់នៅក្នុងចំណងនៃសេចក្តីអាក្រក់ ជាជាងចុះចូលនឹងការឈឺចាប់ នៃការផ្លាស់ប្រែ ដោយព្រះចេស្តា និងព្រះគុណរបស់ព្រះគ្រីស្ទ» ។43យើងមានការឈឺចាប់ នៅក្នុងការបោះបង់ចោលព្រះក្លែងក្លាយរបស់យើង ឈឺចាប់ក្នុងការចាកចេញពីគុកនៃសេចក្តីងងឹត ហើយចេញទៅក្នុងពន្លឺ ។ ប៉ុន្តែ ព្រះយេស៊ូវមិនអនុញ្ញាតឲ្យយើងមានព្រះណាផ្សេងទៀត នៅចំពោះព្រះអង្គទេ ដ្បិតព្រះអង្គមិនអនុញ្ញាតឲ្យរាស្រ្តព្រះអង្គបន្តរស់នៅជាទាសករឡើយ ។
មានតែព្រះយេស៊ូវទេ ដែលអាចបណ្តេញសេចក្តីអាក្រក់ចេញជារៀងរហូត ។ នេះគឺជាការអ្វីដែលបុរសនោះបានឆ្លងកាត់ (ម៉ាកុស ៥:១៥,១៨-២០) ហើយនេះក៏ជាអ្វីដែលមិត្តភក្តិ និងអ្នកជិតខាងរបស់យើង ដែលជាមនុស្សបាត់បង់ ត្រូវការខ្លាំងបំផុត ។ ពួកគេមិនត្រូវការសាសនា ឬប្រព័ន្ធអ្វីមួយដែលធ្វើឲ្យពួកគេ ក្លាយជាមនុស្សល្អជាងមុនឡើយ ។ នៅពេលដែលពួកគេទទួលស្គាល់ការពិត ពួកគេដឹងថា បញ្ហាមិនស្ថិតនៅជុំវិញខ្លួនពួកគេនោះទេ តែនៅក្នុងពួកគេវិញ ។ ដូចនេះ ពួកគេក៏បានឆ្ងល់ថា «តើមានអំណាចដែលខ្លាំងល្មមនឹងឈ្នះការអាក្រក់នៅក្នុងខ្ញុំទេ ?» ពួកគេអាចរកឃើញអំណាចនោះ នៅក្នុងព្រះយេស៊ូវ ដែលបានឆ្លងកាត់សេចក្តីស្លាប់ ដើម្បីសង្គ្រោះយើងឲ្យរួចពីខ្លួនយើង! នៅថ្ងៃនេះ ចូរអនុញ្ញាតឲ្យព្រះទ្រង់ក្រើនរំឭកអ្នកថា អ្នកគឺជាមនុស្ស ឯកោ វង្វេង និងបាត់បង់ បើសិនជាអ្នកដាច់ចេញពីព្រះគ្រីស្ទ ។ បន្ទាប់មក ចូរទូលសូមព្រះអង្គធានាដល់អ្នកថា នៅក្នុងព្រះគ្រីស្ទ អ្នកគឺជាមនុស្សដែលបានទទួលសេចក្តីមេត្តាដ៏អស់កល្ប ។ តាមនិស្ស័យសាច់ឈាម អ្នកគឺជាមនុស្សមានបាប ហើយក្នុងព្រះគ្រីស្ទ អ្នកបានសង្គ្រោះ ។ កាលណាអ្នកយល់អំពីរឿងនេះកាន់តែច្បាស់ នោះអ្នកក៏កាន់តែបន្ទាបខ្លួន និងកាន់តែមានអំណរផងដែរ ។
ខគម្ពីរជញ្ជឹងគិត៖ ម៉ាកុស ៥:១-២០
គម្រោងអានព្រះគម្ពីររយៈពេល១ឆ្នាំ៖ ២ពង្សាវតាក្សត្រ ១២-១៤ និង ម៉ាថាយ ១៤:១-២១