ដីរឹងមាំសម្រាប់ឈរពីលើ
ដោយAlistair Begg
May 30, 2026
«ហេតុនោះបានជាត្រូវឲ្យយកគ្រប់គ្រឿងសឹករបស់ព្រះ ដើម្បីឲ្យអ្នករាល់គ្នាអាចនឹងទប់ទល់ក្នុងថ្ងៃអាក្រក់បាន រួចកាលណាបានតតាំងសព្វគ្រប់ហើយ នោះឲ្យបាននៅតែឈរមាំមួនដដែល ។ ដូច្នេះ ចូរឲ្យឈរមាំមួនចុះ ដោយក្រវាត់សេចក្ដីពិតនៅចង្កេះ» ។ អេភេសូរ ៦:១៣-១៤
វប្បធម៌លោកខាងលិច មានការភាន់ច្រឡំ អំពីរឿងជាច្រើន ជាពិសេសគឺភាន់ច្រឡំអំពីសេចក្តីពិត ។ យើងច្រើនតែជ្រើសរើសយកពាក្យស្លោកដែលស្តាប់ទៅពីរោះ និងមានន័យល្អណាស់ ប៉ុន្តែ ពេលដែលគេពិនិត្យមើលឲ្យជិត គេក៏បានដឹងថា ពាក្យស្លោកទាំងនោះខុស ។ ឧទាហរណ៍ គេចូលចិត្តនិយាយថា «ចូរយើងគ្រាន់តែរស់នៅជាមនុស្សល្អទៅ គឺគ្រប់គ្រាន់ហើយ» ។ «ដែលអ្នកជឿលើអ្វីមួយឬអត់ គឺមិនសំខាន់ទេ ដរាបណាអ្នករស់នៅបានល្អ ហើយប្រឹងប្រែងឲ្យអស់ពីលទ្ធភាព» ។ ពាក្យសម្តីទាំងអស់នេះស្តាប់ទៅពីរោះ តែយើងគួរតែអរព្រះគុណព្រះ ដែលបានការពារពិភពលោកមិនឲ្យរលាយភ្លាមៗដោយសារសេចក្តីអាក្រក់ ។ ប៉ុន្តែ ដែលគ្រាន់តែរស់នៅជាមនុស្សល្អ គឺមិនគ្រប់គ្រាន់ទេ ព្រោះសំណួរដែលយើងត្រូវសួរនោះគឺ តើនរណាអាចឲ្យនិយមន័យពាក្យល្អ ? តើការរស់នៅបានល្អ ឬរស់នៅជាមនុស្សល្អ មានលក្ខណៈដូចម្តេច ? ពេលណាមនុស្សមានការខ្វែងគំនិតគ្នា អំពីអត្ថន័យពិតប្រាកដនៃពាក្យ «ល្អ» ហើយមិនអាចយល់ស្របគ្នា អំពីសេចក្តីពិតជាមូលដ្ឋាន នោះសង្គមនឹងធ្លាក់ចូលទៅក្នុងការភាន់ច្រឡំ គឺដូចដែលយើងឃើញមានក្នុងប្រទេសលោកខាងលិចក្នុងពេលសព្វថ្ងៃ ។
យើងរាល់គ្នាសុទ្ធតែទទួលរងសម្ពាធ ឲ្យយល់ស្របនឹងសង្គមដែលកំណត់យកសេចក្តីពិត ដែលផ្តេកផ្តួលទៅតាមបុគ្គលម្នាក់ៗ ។ ឧទាហរណ៍ «អ្នកជ្រើសរើសយកសេចក្តីពិតរបស់អ្នក ហើយខ្ញុំសម្រេចចិត្តជ្រើសរើសយកសេចក្តីពិតរបស់ខ្ញុំ» ។ ទោះជាយ៉ាងណាក៏ដោយ ព្រះគម្ពីរប៊ីបបានត្រាស់ហៅយើង ឲ្យស្វែងរកឈរយ៉ាងរឹងមាំ នៅលើសេចក្តីពិតរបស់ព្រះ ជាសេចក្តីពិតដែលមិនផ្តេកផ្តួលតាមបុគ្គលម្នាក់ៗ ហើយក៏មិនអាចប្រកែកបាន ។ សាវ័កប៉ុលបានបង្រៀនយើង ឲ្យ «ឈរមាំមួនចុះ ដោយក្រវាត់សេចក្ដីពិតនៅចង្កេះ» (អេភេសូរ ៦:១៤) ។ ពេលណាយើងឱបក្រសោបយកវប្បធម៌នៃការភាន់ច្រឡំអំពីសេចក្តីពិត យើងនឹងត្រូវ «គ្រប់អស់ទាំងខ្យល់នៃសេចក្ដីបង្រៀនបោកហើយផាត់យើងចុះឡើង ដោយសេចក្ដីឆបោករបស់ផងមនុស្ស ហើយដោយឧបាយកល ដែលគេប្រើនឹងនាំឲ្យវង្វេងទៀត» (៤:១៤) ។ យើងមិនមានដីរឹងមាំសម្រាប់ឈរទេ ។ ប៉ុន្តែ ពេលណាយើងឈរនៅលើសេចក្តីពិតរបស់ព្រះ យើងអាចឈរយ៉ាងមាំមួន ហើយត្រៀមជាស្រេច ដើម្បីប្រឈមមុខដាក់អ្វីក៏ដោយ ដែលរារាំងយើង (លូកា ១២:៣៥ ១ពេត្រុស ១:១៣) ។
ការការពារសេចក្តីពិតមិនមែនជាការងាយទេ ។ មនុស្សអាចចាត់ទុកយើងជាមនុស្សចាក់គម្រិល ដែលគ្មានសង្ឃឹម ឬក្រឹត្យវិន័យនិយម ឬមួយអាក្រក់ជាងនេះទៀត ។ ប៉ុន្តែ តាមពិត ការឈរនៅលើសេចក្តីពិត និងនាំគេឲ្យដើរតាមសេចក្តីពិត ស្ថិតក្នុងចំណោមទង្វើដែលមានក្តីស្រឡាញ់បំផុត ដែលយើងអាចធ្វើបាន ព្រោះវាជាការនាំគេឲ្យរស់នៅស្របតាមសេចក្តីពិត និងងាកចេញពីការក្លែងបន្លំ ដែលមិនយូរមិនឆាប់ វានឹងបាក់ស្រុតនៅពីក្រោមជើងពួកគេ ។ គឺដូចដែលសាវ័កប៉ុលបានបង្រៀនក្នុងបទគម្ពីរផ្សេងទៀតថា សេចក្តីស្រឡាញ់ «មិនដែលអរសប្បាយចំពោះសេចក្ដីទុច្ចរិតឡើយ គឺអរសប្បាយតែនឹងសេចក្ដីស្មោះត្រង់វិញ» (១កូរិនថូស ១៣:៦) ។ ទោះអ្នកត្រូវជួបការលំបាកអ្វីខ្លះ ដើម្បីអរសប្បាយនឹងសេចក្តីពិតនៅថ្ងៃនេះ ក្នុងការគិត និងការសន្ទនាជាមួយអ្នកដទៃ ? ទោះអ្នកត្រូវជួបការលំបាកប៉ុណ្ណាក៏ដោយ អ្នកអាចឈរនិយាយដោយទំនុកចិត្ត ដោយដឹងថា ព្រះគ្រីស្ទបានចាត់ព្រះវិញ្ញាណទ្រង់ ឲ្យ «ដឹកនាំអ្នកចូលទៅក្នុងសេចក្តីពិត» (យ៉ូហាន ១៦:១៣) ។
ខគម្ពីរជញ្ជឹងគិត៖ យ៉ូហាន ៨:៣១-៣៦
គម្រោងអានព្រះគម្ពីររយៈពេល១ឆ្នាំ៖ ២ពង្សាវតាក្សត្រ ២២-២៣ និង ម៉ាថាយ ១៦