ចូរពាក់ស្បែកជើងនៃដំណឹងល្អ
ដោយAlistair Begg
May 31, 2026
«ដូច្នេះ ចូរឲ្យឈរមាំមួនចុះ ដោយក្រវាត់សេចក្ដីពិតនៅចង្កេះ ហើយពាក់សេចក្ដីសុចរិតទុកជាប្រដាប់បាំងដើមទ្រូង ។ ទាំងពាក់សេចក្ដីប្រុងប្រៀបរបស់ដំណឹងល្អនៃសេចក្ដីសុខសាន្ត ទុកជាស្បែកជើង» ។ អេភេសូរ ៦:១៤-១៥
ពេលណាយើងគិតអំពីទាហាននៅសមរភូមិ យើងច្រើនតែស្រមៃឃើញកាំភ្លើងតូច កាំភ្លើងធំ និងឧបករណ៍យុទ្ធសាស្រ្តដទៃទៀត ។ ប៉ុន្តែ មានសម្ភារៈមួយ ដែលយើងច្រើនតែមើលរំលង ។ បើគ្មានស្បែកជើងពាក់ទេ ទាហានមិនមានប្រសិទ្ធិភាពក្នុងការប្រយុទ្ធឡើយ ។
សាវ័កប៉ុលបានប្រាប់អ្នកជឿទាំងឡាយ ឲ្យឈរមាំមួន ដោយពាក់ស្បែកជើងនៃដំណឹងល្អ ក្នុងន័យថា យើងត្រូវត្រៀមខ្លួនជាស្រេច ដោយមានស្បែកជើងត្រឹមត្រូវ ។ ក្នុងសំបុត្រទីមួយដែលគាត់សរសេរផ្ញើពួកជំនុំនៅទីក្រុងកូរិនថូស គាត់បាននិយាយអំពីការមានព្រះជន្មឡើងវិញរបស់ព្រះយេស៊ូវ យ៉ាងដូចនេះថា «បងប្អូនអើយ ខ្ញុំចង់ប្រាប់ឲ្យអ្នករាល់គ្នាដឹងពីដំណឹងល្អ ដែលខ្ញុំបានផ្សាយរួចមកហើយ ជាដំណឹងដែលអ្នករាល់គ្នាបានទទួល ក៏ឈរជាប់ក្នុងនោះផង» (១កូរិនថូស ១៥:១) ។ ដំណឹងល្អបានផ្តល់ឲ្យយើងជំហរដ៏រឹងមាំ ។ ទោះអ្វីៗនៅជុំវិញយើងមានការរង្គោះរង្គើយ៉ាងណាក៏ដោយ ក៏យើងនៅតែអាចឈរយ៉ាងមាំមួន ។ ទោះការល្បួងសាហាវយ៉ាងណា ក៏យើងមិនចាំបាច់ត្រូវដកថយឡើយ ។
លោក ម៉ាទីន លូស័រ (Martin Luther) មានកម្លាំងឈរតតាំងនឹងជំនោរនៃភាពខុសឆ្គង ដោយដំដែកគោលពីលើនិក្ខេបបទជាប់ទ្វារព្រះវិហារ នៅទីក្រុងវីធិនបឺក ហើយបន្ទាប់មក ក៏បានប្រកាស នៅពីមុខអធិរាជថា «ខ្ញុំបានប្តេជ្ញាចិត្ត ហើយខ្ញុំមិនរាថយឡើយ» ។ តើគាត់អាចធ្វើដូចនេះបាន ដោយរបៀបណា ? គឺដោយសារស្បែកជើងនៃដំណឹងល្អ ។ តើមានអ្វីជួយលោក យូ លាធីមើរ (Hugh Latimer) និងនីកូឡាស រីតលី (Nicholas Ridley) ជាគ្រីស្ទបរិស័ទប្រូតេស្តង់អង់គ្លេស ឲ្យប្រឈមមុខដាក់ដោយចិត្តក្លាហាន នៅចំពោះភាពតក់ស្លុតនៃការកាត់ទោសប្រហារជីវិត ដោយដុតទាំងរស់ នៅលើឆាក ដោយសារសេចក្តីជំនឿរបស់ពួកគេ ? គឺស្បែកជើងនៃដំណឹងល្អ ។ តើមានអ្វីរៀបចំខ្លួនបងប្អូនប្រុសស្រីរបស់យើង ក្នុងកន្លែងជាច្រើនទៀត នៅទូទាំងពិភពលោក ឲ្យប្រកាសដំណឹងល្អ ទោះពួកគេបានទទួលការគំរាមសម្លាប់ក៏ដោយ ? គឺស្បែកជើងនៃដំណឹងល្អ ។
ពេលដែលអ្នកទៅធ្វើការ ទៅសាលារៀន ទៅលេងសាច់ញាតិ ឬមិត្តភក្តិដែលមិនជឿព្រះ ឬចូលទៅក្នុងសហគមន៍អ្នក តើមានអ្វីរៀបចំខ្លួនអ្នក ឲ្យចែកចាយអំពីព្រះយេស៊ូវ ? គឺមានតែស្បែកជើងនៃដំណឹងល្អ ដែលព្រះគ្រីស្ទប្រទានប៉ុណ្ណោះ ។ បើអ្នកព្យាយាមឈរដោយកម្លាំងខ្លួនឯង អ្នកនឹងជំពប់ជើងដួលមិនខាន ។ ប៉ុន្តែ នៅពេលដែលអ្នកចូលទៅក្នុងថ្ងៃថ្មី ដោយជើងឈរនៅក្នុងក្តីសង្ឃឹម សន្តិភាព ការអត់ទោស និងការធានានៃដំណឹងល្អ នោះអ្នកនឹងអាចឈរមាំមួន ទោះអ្នកប្រឈមមុខដាក់ការទាស់ប្រឆាំងដ៏សាហាវបំផុត ពីលោកិយ និងការល្បួងរបស់អារក្សក៏ដោយ ។ ដូចនេះ មុនពេលអ្នកចេញក្រៅផ្ទះ នៅពេលព្រឹកនីមួយៗ ចូរសូតដំណឹងល្អឲ្យខ្លួនឯងស្តាប់ ។ ចូរអរសប្បាយនឹងសេចក្តីពិតនៃដំណឹងល្អ ។ ចូរសរសើរដំកើងព្រះអង្គសង្គ្រោះរបស់អ្នក ។ និយាយឲ្យខ្លី ចូរពាក់ស្បែកជើងនៃដំណឹងល្អរបស់អ្នក ។
ខគម្ពីរជញ្ជឹងគិត៖ ១កូរិនថូស ១៥:១-៨
គម្រោងអានព្រះគម្ពីររយៈពេល១ឆ្នាំ៖ ២ពង្សាវតាក្សត្រ ២៤-២៥ និង ម៉ាថាយ ១៧