ខែលការពារនៃសេចក្តីជំនឿ
ដោយAlistair Begg
June 1, 2026
«ថែមទាំងយកសេចក្ដីជំនឿទុកជាខែលផង ដែលអ្នករាល់គ្នានឹងអាចរំលត់ អស់ទាំងព្រួញឆេះរបស់មេកំណាច ដោយសារខែលនោះបាន»។ អេភេសូរ ៦:១៦
អ្នកតែងតែស្ថិតនៅក្រោមការវាយប្រហារជានិច្ច។
អ្នកអាចមានអារម្មណ៍ថា រឿងនេះជាការពិតមែន ប៉ុន្តែ តាមពិត យើងប្រឈមមុខដាក់ការវាយប្រហារខាងវិញ្ញាណ ដែលក្នុងនោះ អារក្សប្រើកលឧបាយគ្រប់បែបយ៉ាង រៀងរាល់ថ្ងៃ ដើម្បីបំផ្លាញអត្តសញ្ញាណ និងការរួបរួមដែលយើងមានក្នុងព្រះយេស៊ូវគ្រីស្ទ។ វាបាញ់គ្រាប់ព្រួញភ្លើងមកលើរាស្រ្តរបស់ព្រះឥតឈប់ឈរ។ តើគ្រីស្ទបរិស័ទត្រូវធ្វើដូចម្តេច នៅចំពោះមុខនៃការវាយប្រហារដូចនេះ?
ពេលណាយើងជួបសង្គ្រាមខាងវិញ្ញាណដែលជៀសមិនរួចនេះ យើងត្រូវឈោងទៅរកខែលរបស់យើង។ យើងត្រូវតែ «យកសេចក្ដីជំនឿទុកជាខែល»។ នៅពេលដែលសាវ័ក ប៉ុលបង្រៀនដូចនេះ អ្នកអានសំបុត្រដំបូងរបស់គាត់អាចនឹកស្រមៃដល់ខែល ដែលមានទំហំមិនតូចទេ ព្រោះទាហានរ៉ូម៉ាំងនៅសម័យនោះ ប្រើខែលបួនជ្រុងទ្រវែង មានប្រវែង១.២ម៉ែត្រ និងទទឹង ០.៧៦ម៉ែត្រ។ ដូចនេះ ការកាន់ខែលប្រភេទនេះដើរ គឺប្រៀបដូចជាការដើរកាន់ក្របទ្វារស្តើងមួយសន្លឹក។ វាមិនមែនដូចខែលជ័រតូចៗជារបស់ក្មេងលេងទេ តែជាគ្រឿងសឹកដ៏ខ្លាំងពូកែ។
គន្លឹះដើម្បីឲ្យយើងយល់ អំពីរបៀបប្រើប្រាស់ខែលរបស់យើងឲ្យបានត្រឹមត្រូវ គឺត្រូវដឹងថា ពេលណាយើងជឿព្រះគ្រីស្ទ ព្រះអង្គប្រទានគ្រឿងសឹកនៃដំណឹងល្អ។ តាមរយៈការសុគតជំនួសយើង ព្រះអង្គបានបំពាក់គ្រឿងសឹកនៃសេចក្តីសុចរិតដល់យើង។ ដូចនេះ ពេលណាយើងចាប់កាន់ខែលនៃសេចក្តីជំនឿ យើងក៏កំពុងតែទុកចិត្តយ៉ាងសកម្មថា ដំណឹងល្អបានធ្វើជាខែលការពារយើងឲ្យរួចពីការកុហករបស់សាតាំង។ វិធីតែមួយ ដើម្បីឲ្យយើងអាចឈ្នះសង្គ្រាមខាងវិញ្ញាណ គឺយើងត្រូវស្វែងរកចំណុចខ្លាំង ដែលជាគ្រឿងសឹកខាងវិញ្ញាណ ក្នុងព្រះអម្ចាស់យេស៊ូវ។
បទចម្រៀងទំនុកសកល ដែលលោកគ្រូ ចន ញូតុន(John Newton) បាននិពន្ធ បានឆ្លុះបញ្ចាំងអំពីការតយុទ្ធនឹងអារក្ស យ៉ាងដូចនេះថា :
ពេលណាសាតាំងរាងផ្លូវយើង
ហើយបំពេញយើងដោយការភ័យខ្លាច យើងនឹងឈ្នះដោយជំនឿ
ទោះវាព្យាយាមយ៉ាងណា ក៏វាមិនអាចដកចេញព្រះបន្ទូល ដែលបានសន្យាថា «ព្រះអង្គនឹងផ្គត់ផ្គង់យើង»។45
ព្រះគ្រីស្ទមានជ័យជម្នះ ហើយដោយសេចក្តីជំនឿ ព្រះអង្គអញ្ជើញយើងឲ្យទទួលជ័យភ័ន្តជាមួយព្រះអង្គ។ ជ័យជម្នះនេះបានបណ្តាលចិត្តលោកគ្រូ វីលៀម ហ្គោច(William Gouge) ឲ្យចែកចាយក្នុងសៀវភៅកំណត់ហេតុគាត់ថា «ពេលខ្ញុំមើលខ្លួនឯង ខ្ញុំមើលមិនឃើញអ្វី ក្រៅពីចន្លោះប្រហោង និងភាពកម្សោយ ប៉ុន្តែ ពេលខ្ញុំមើលទៅព្រះគ្រីស្ទ ខ្ញុំមើលឃើញតែភាពពេញលេញ និងភាពគ្រប់គ្រាន់»។46 អារក្សគឺជាខ្មាំងសត្រូវដែលបានបរាជ័យហើយ ទោះវានៅតែមានអំណាចក៏ដោយ។ ពេលណាយើងព្យាយាមតតាំងនឹងវាដោយកម្លាំងខ្លួនឯង យើងនឹងបរាជ័យមិនខាន។ ប៉ុន្តែ ព្រះទ្រង់ប្រទានគ្រឿងសឹកគ្រប់យ៉ាងដែលយើងត្រូវការ។ សេចក្តីជំនឿរបស់យើងគឺជាខែលការពារ ដ្បិតជំនឿរបស់យើងប្រាប់យើងថា យើងគឺជាកូននៃព្រះដ៏រស់ ដែលព្រះអង្គបានអត់ទោសឲ្យយើង និងទទួលកម្លាំងពីព្រះវិញ្ញាណបរិសុទ្ធ ឲ្យស្តាប់បង្គាប់ និងអរសប្បាយចំពោះក្តីសង្ឃឹមពិតប្រាកដថា នឹងបានរស់នៅអស់កល្បជានិច្ចជាមួយព្រះអង្គ។ អ្នកនឹងទទួលរងការវាយប្រហារ នៅថ្ងៃនេះ។ តើជីវិតអ្នកអាចជួបសង្គ្រាម ត្រង់ផ្នែកណាខ្លះ? ចូរប្រាកដថា អ្នកបានមើលទៅជំនឿរបស់អ្នក ក្នុងពេលនោះ ដ្បិតសេចក្តីជំនឿនឹងធ្វើជាខែលការពារអ្នកឲ្យឈ្នះការល្បួង ហើយអ្នកនឹងបានឈរ ដោយឈ្នះគ្រាប់ព្រួញភ្លើងរបស់អារក្ស។
ខគម្ពីរជញ្ជឹងគិត៖ ១ពេត្រុស ៥:៦-១១
គម្រោងអានព្រះគម្ពីររយៈពេល១ឆ្នាំ៖ ហូសេ ១-៤ និង ម៉ាថាយ ១៨:១-២០