ជម្នះបាបដែលពួនសម្ងំ
ដោយAlistair Begg
June 13, 2026
«កាលណាព្រះគ្រីស្ទដ៏ជាជីវិតនៃយើង បានលេចមក នោះអ្នករាល់គ្នានឹងលេចមកក្នុងសិរីល្អ ជាមួយនឹងទ្រង់ដែរ ។ ដូច្នេះ ចូរសំឡាប់និស្ស័យសាច់ឈាមរបស់អ្នករាល់គ្នា ដែលនៅផែនដីនេះចេញ គឺជាការសហាយស្មន់ ស្មោកគ្រោក សម្រើបសំរាល ប៉ងប្រាថ្នាអាក្រក់ នឹងសេចក្ដីលោភ ដែលរាប់ទុកដូចជាការថ្វាយបង្គំរូបព្រះ» ។ កូល៉ុស ៣:៤-៥
បើការប្រែចិត្តក្លាយជាគ្រីស្ទបរិស័ទ មានន័យថា យើងមិនមានបាបទៀត នោះសាវ័ក ប៉ុលមុខជាខ្ជះខ្ជាយទឹកខ្មៅ នៅពេលដែលគាត់សរសេរថា «ចូរសំឡាប់និស្ស័យសាច់ឈាមរបស់អ្នករាល់គ្នា ដែលនៅផែនដីនេះចេញ» ។ យើងងាយនឹងឱបក្រសោបយកជំនឿខាងក្រៅនិយម ដែលធ្វើឲ្យយើងល្អមើលតែសម្បកក្រៅ ខណៈពេលដែលយើងដឹងថា ព្រះគម្ពីរប៊ីបបានចែងយ៉ាងត្រឹមត្រូវថា យើងគឺជាកូនរបស់ព្រះដែលបានសង្គ្រោះហើយ តែយើងក៏ជាមនុស្សមានបាបដែរ ។
ដូចនេះ តើអំពើបាបនៅតែបន្តរំខានជីវិតយើងឬទេ? ព្រោះយើងនៅក្នុងព្រះគ្រីស្ទមែនពិត ដោយទ្រង់បានរំដោះយើងឲ្យរួចពីចំណងរបស់បាប តែយើងក៏នៅតែរស់នៅក្នុងរូបកាយរបស់យើងផងដែរ ។ បញ្ហាស្ថិតនៅត្រង់ថា «សាច់ឈាមតែងតែប៉ងប្រាថ្នាទាស់នឹងព្រះវិញ្ញាណ ... សេចក្ដីទាំង២នេះប្រឆាំងនឹងគ្នា ដល់ម្ល៉េះបានជាអ្នករាល់គ្នារកធ្វើការ ដែលចង់ធ្វើទៅមិនកើត» (កាឡាទី ៥:១៧) ។ ព្រះគ្រីស្ទបានរាប់យើងជាសុចរិត ព្រះយេស៊ូវបានអត់ទោសឲ្យបាបទាំងអស់ ដែលយើងមានក្នុងជីវិតយើង ។ យើងបានស្លាប់ខាងឯបាប ក្នុងព្រះគ្រីស្ទ បានជាវាមិនមានអំណាចគ្រប់គ្រងជីវិតយើងទៀតទេ ។ ប៉ុន្តែ ទោះអំពើបាបមិនគ្រប់គ្រងជីវិតយើងទៀតក៏ដោយ ក៏យើងនៅតែមានវា ហើយវាក៏ធ្វើទុក្ខយើង ។ វាមិនកំណត់ថា យើងជានរណាទៀតទេ តែវានៅតែតោងយើងជាប់ ។
ដូចនេះ យើងចាំបាច់ត្រូវរៀនជៀសវាងការមើលស្រាលភាពធ្ងន់ធ្ងរនៃអំពើបាប ផ្ទុយទៅវិញ យើងត្រូវប្រយ័ត្នបាបលួចបន្លំចូលទៅក្នុងជីវិតយើងស្ងាត់ៗ និងដោយការបោកបញ្ឆោត ។ ដើម្បីតយុទ្ធនឹងបាប យើងត្រូវស្គាល់អំណាចរបស់វាដែលធ្វើឲ្យយើងញាណ និងចាប់ចងយើងធ្វើជាទាសកររបស់វា ។ គឺដូចដែលមានពាក្យស្លោកមួយបានពោលថា «គំនិតរបស់អ្នក នាំឲ្យមានការប្រព្រឹត្ត ។ ការប្រព្រឹត្តរបស់អ្នក នាំឲ្យកើតជាទំលាប់ ។ ទំលាប់របស់អ្នក នាំឲ្យអ្នកមានចារិកលក្ខណៈ ។ ចារិតលក្ខណៈរបស់អ្នក គឺជាកត្តាកំណត់ជោគវាសនារបស់អ្នក» ។ ដូចនេះ យើងត្រូវជម្នះបាបរបស់យើង នៅត្រង់ចំណុចចាប់ផ្តើមរបស់វា នៅក្នុងគំនិតរបស់យើង មុនពេលវាចាក់ឬសចូលជ្រៅក្នុងចិត្តយើង ។
វិធីតែមួយ ដើម្បីជម្នះបាប គឺត្រូវទទួលស្គាល់ថា យើងចាំបាច់ត្រូវសម្លាប់វា ដោយគ្មានការបន្ថែមបន្ថយគោលការណ៍ ដើម្បីការពារមិនឲ្យមានការខូចខាតនៅពេលអនាគត ដែលមើលឃើញ ឬមើលមិនឃើញ ។ យើងអាចឈ្នះបាបបាន តែនៅពេលដែលយើងមានចិត្តចង់ចាត់វិធានការខ្លាំងទាស់ប្រឆាំងនឹងវាប៉ុណ្ណោះ ។
ប៉ុន្តែ យើងខុសធ្ងន់ បើសិនជាយើងគិតថា យើងជាអ្នកដែលអាចឈ្នះអំណាចរបស់បាប ដែលកំពុងលាក់សម្ងំនៅក្នុងយើង ។ ដោយសារជីវិតអ្នកពឹងផ្អែកលើព្រះគ្រីស្ទទាំងស្រុង នោះអ្នកតយុទ្ធនឹងបាប មិនមែនដោយកម្លាំងខ្លួនឯង តែដោយព្រះចេស្តារបស់ព្រះ ហើយដោយសារជីវិតអ្នកពឹងផ្អែកលើព្រះគ្រីស្ទទាំងស្រុង នោះអ្នកតយុទ្ធនឹងបាប មិនមែនដើម្បីឲ្យបានសេចក្តីសង្គ្រោះនោះទេ ដ្បិតព្រះអង្គបានសង្គ្រោះអ្នកឲ្យរួចពីបាបរួចហើយ ។ ដូចនេះ នៅពេលនេះអ្នកចាំបាច់ត្រូវប្ដេជ្ញាចិត្តថា អ្នកនឹងសម្លាប់បាបរបស់អ្នក ហើយអ្នកចាំបាច់ត្រូវទូលសូមព្រះវិញ្ញាណបរិសុទ្ធ បំពេញអ្នកដោយក្តីស្រឡាញ់ដ៏ហូរហៀរ និងបំពេញអ្នកដោយព្រះវត្តមានទ្រង់ ដើម្បីបង្កើតចិត្តអ្នកឲ្យធ្វើការអ្វីដែលព្រះទ្រង់ត្រាស់ហៅឲ្យអ្នកធ្វើ គឺស្វែងរក រកឃើញ ហើយសំឡាប់និស្ស័យសាច់ឈាមរបស់អ្នក ដែលនៅផែនដីនេះចេញ ។ ក្នុងចំណោមនិស្ស័យសាច់ឈាម ខាងលោកិយជាច្រើនដែលអ្នកត្រូវសម្លាប់ តើអ្នកត្រូវតយុទ្ធនឹងនិស្ស័យសាច់ឈាមមួយណា នៅថ្ងៃនេះ ដោយពឹងអាងកម្លាំងព្រះអង្គ?
ខគម្ពីរជញ្ជឹងគិត៖ រ៉ូម ៧:២១-៨:១១
គម្រោងអានព្រះគម្ពីររយៈពេល១ឆ្នាំ៖ យេរេមា ២២-២៤ និង ម៉ាថាយ ២៤:២៩-៥១